ރެކޯޑް މިންވަރަކަށް ތުރުކީގެ އިސްތަންބޫލަށް ވާރޭވެހި ނުރައްކާތެރި ހާދިސާތަކެއް

ތުރުކީގެ އިސްތަންބޫލަށް ރެކޯޑް މިންވަރަކަށް ވާރޭވެހި ހިނގާދިޔަ ހާދިސާތަކުގައި ބައެއް މީހުންގެ ފުރާނަ ގެއްލި އެތައް ގެއްލުންތަކެއް ލިބިއްޖެއެވެ.

ބައެއް މީޑިއާތަކުން ރިޕޯތްކުރިގޮތުގައި މިފަހުން ތުރުކީއަށް ކުރި މޫސުމީ ވިއްސާރައަކީ ވޭތުވެދިޔަ 84 އަހަރު ދުވަހުގެ ތެރޭގައި މިހާ ގިނައިން ވާރޭވެހުނު ފުރަތަމަ ފަހަރެވެ. ބޯކޮށް ވާރޭވެހުމުގެ ސަބަބުން ހިނގާދިޔަ ހާދިސާތަކަށް ބަލާއިރު، ފެންގަނޑެއްގެ ތެރެއިން ދިޔަ 14 އަހަރުގެ ފިރިހެން ކުއްޖަކު ވަނީ ކަރަންޓްގައި ޖެހިގެން މަރުވެފައެވެ. އެ ކުއްޖާގެ މަރާ ގުޅިގެން ކަމާބެހޭ ފަރާތްތަކުން މިހާރު ވަނީ ތަހްގީގެއް ފަށާފައެވެ.

ފެންބޮޑުވުމާ ގުޅިގެން ތާށިވި 595 މީހަކު ރައްކާތެރި ސަރަހައްދުތަކަށް ވަނީ ބަދަލުކޮށްފައެވެ. ފެންބޮޑުވުމާ ގުޅިގެން އެހީތެރިކަން ފޯރުކޮށްދިނުމަށް މިހާރުވެސް 8,000 އަށް ވުރެ ގިނަ މަސައްކަތްތެރީން ހަރަކާތްތެރިވަމުން ދާ ކަމަށް އިސްތަންބޫލްގެ ޑެޕިއުޓީ މޭޔަރު ނޫރީ ވަނީ ވިދާޅުވެފައެވެ. އެކްސްގައި ޕޯސްޓުކޮށް ނޫރީ ވަނީ ރޭގަނޑު ގަޑީގައި ހާއްސަކޮށް، ބޯކޮށް ވާރޭ ވެހި ތޫފާން އަންނާނެ ކަމަށް ލަފާ ކުރެވޭތީ ހުރިހާ ރައްޔިތުން ވެސް ސަމާލުވެ ތިބުމަށް އެދިފައެވެ.

އިސްތަންބޫލުގެ ގަވަރުނަރު ދާވޫތު ގުލް ވަނީ، ކޮންމެހެން ނުކުންނަންޖެހިގެން ނޫނީ ގެއިން ބޭރަށް ނުނިކުތުމަށް ރައްޔިތުންނަށް އިލްތިމާސްކޮށްފައެވެ. ވިއްސާރައިގެ ސަބަބުން މާދަމާވެސް ސްކޫލްތައް ބަންދުކުރުމަށް ނިންމާފައިވާއިރު، ނުކުޅެދުންތެރިކަން ހުންނަ މުއައްޒަފުންނާއި މާބަނޑު މީހުންނާއި، ހަނގުރާމައިގެ ތަޖުރިބާކާރުންނަށް ބުރާސްފަތި ދުވަހު އޮފީހަށް ނުނިކުންނަ ގޮތަށް ވަނީ ޗުއްޓީ ދީފައެވެ.