ކާބޯތަކެތީގެ ރައްކާތެރިކަން ކަށަވަރުކުރުމަކީ އެންމެންގެ ޒިންމާއެއް: ރައީސް މުޢިއްޒު

ދިވެހިރާއްޖޭގެ ކާބޯތަކެތީގެ ނިޒާމުތައް ހަރުދަނާކޮށް، ދަނޑުވެރިކަމާއި މަސްވެރިކަމުގެ ދާއިރާގައި ހަރަކާތްތެރިވާ ފަރާތްތަކަށް އެއްބާރުލުން ދީގެން ހުރިހާ ދިވެހިންނަށް އަގުހެޔޮ، ފައިދާހުރި ކާބޯތަކެތި ލިބޭނެ މަގު ފަހިކޮށްދެވޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ދުނިޔޭގެ ކާބޯތަކެތީގެ ދުވަހުގެ މުނާސަބަތުގައި ރައީސުލްޖުމްހޫރިއްޔާ އެކްސްގައި ކުރެއްވި ޕޯސްޓެއްގައި ވިދާޅުވީ، އެންމެންނަށް ރައްކާތެރި، އަދި އަގުހެޔޮ ކާބޯތަކެތި ކަށަވަރުކޮށްދިނުމަށްޓަކައި ޒަމާނީ އީޖާދީ އަދި ދެމެހެއްޓެނިވި ކާބޯތަކެތީގެ ނިޒާމުތަކެއް ޤާއިމުކުރުމަކީ ނުހަނު މުހިންމު ކަމެއް ކަމަށެވެ. މިއަހަރުގެ ޝިޢާރު ކަމަށްވާ "އިންނޮވޭޓް ޓުޑޭ، ނަރިޝް ޓުމޯރޯ" އިން ހަނދާންކޮށްދެނީ މިއަދު އަޅުގަނޑުމެން ކުރާ އިންވެސްޓްމަންޓްތަކަކީ އަންނަން އޮތް ޖީލުތަކުގެ ކާބޯތަކެތީގެ ރައްކާތެރިކަން ބައްޓަންކުރާނެ ކަންކަން ކަމުގައި އެމަނިކުފާނު ފާހަގަކުރެއްވިއެވެ.

ރާއްޖެއަކީ ޖަޒީރާ ޤައުމަކަށް ވުމާއެކު، ޤައުމީ ފުދުންތެރިކަމާއި އިޤްތިޞާދީ ދެމެހެއްޓެނިވިކަމަށްޓަކައި ކާބޯތަކެތީގެ ރައްކާތެރިކަން ކަށަވަރުކުރުމަކީ ކޮންމެހެން ބޭނުންތެރި ކަމެއް ކަމަށް ރައީސް ވިދާޅުވިއެވެ. މިގޮތުން، ޒަމާނީ ޓެކްނޮލޮޖީ ބަލައިގަނެ، ރާއްޖޭގައި އުފައްދާ މިންވަރު އިތުރުކޮށް، ދަނޑުވެރިންނާއި މަސްވެރިންނަށް އެހީތެރިކަން ފޯރުކޮށްދީ، ދިރިއުޅުމުގެ ވަސީލަތްތަކާ ގުޅިފައިވާ ޤުދުރަތީ ވަސީލަތްތައް ރައްކާތެރިކުރަން ޖެހޭކަމަށް އެމަނިކުފާނު ވިދާޅުވިއެވެ.

މަސްވެރިކަމުގެ ދާއިރާ ހަރުދަނާކުރުމަށް ސަރުކާރުން އަޅަމުންދާ ފިޔަވަޅުތަކަށް އަލިއަޅުއްވާލައްވަމުން ރައީސް ވިދާޅުވީ، މަސްވެރިން ބާނާ މަހަށް 48 ގަޑިއިރުގެ ތެރޭގައި ފައިސާ ދޫކުރުމާއި، މަސް ރައްކާކުރެވޭ މިންވަރާއި ޕްރޮސެސްކުރާ އިންފްރާސްޓްރަކްޗަރ ފުޅާކުރުމަށް މުހިންމު މަސައްކަތްތަކެއް ކުރެވެމުންދާ ކަމަށެވެ. މީގެއިތުރުން، ޕަބްލިކް-ޕްރައިވެޓް ޕާޓްނަރޝިޕްގެ ދަށުން ދަނޑުވެރިކަން ކުރިއެރުވުމަށް އެކި ރަށްރަށުގައި މަޝްރޫޢުތައް ފަށާފައިވާ ކަމަށާއި، ބޭނުންނުކޮށް ހުރި ބިންތަކުގެ ބޭނުން ހެޔޮގޮތުގައި ހިފައި، ތާޒާ މޭވާއާއި ތަރުކާރީ އުފެއްދުން އިތުރުކުރުމަށް ބާރުއަޅަމުންދާ ކަމަށްވެސް އެމަނިކުފާނު ވިދާޅުވިއެވެ.

ރައީސުލްޖުމްހޫރިއްޔާ އިތުރަށް ފާހަގަކުރެއްވި ގޮތުގައި، ކާބޯތަކެތީގެ ރައްކާތެރިކަން ކަށަވަރުކުރުމަކީ އެންމެންގެ ޒިންމާއެކެވެ. ރާއްޖޭގެ ދަނޑުވެރިންނާއި މަސްވެރިން ބާރުވެރިކުރުވައި، އެ ފަރާތްތަކުގެ ޢާއިލާތަކަށް ތަނަވަސްކަން ލިބި، އަދި ކޮންމެ ގެއަކަށްވެސް ފައިދާހުރި އަގުހެޔޮ ކާބޯތަކެތި ލިބޭނެ މުސްތަޤްބަލެއް ބިނާކުރުމަށް އެންމެހައި ރައްޔިތުން އެކުގައި މަސައްކަތް ކުރުމަށް ރައީސް ޑރ. މުޢިއްޒު ވަނީ ގޮވާލައްވާފައެވެ.