އިސްރާއީލުގެ އެޑް-ޓެކް ކުންފުންޏަކުން އަލްޖަޒީރާގެ ޑިވައިސްތަކަށް ޖާސޫސީ ސޮފްޓްވެއާއެއް އަޅަން އެހީވެދިންކަން ހާމަވެއްޖެ

އިސްރާއީލުގެ އިޝްތިހާރު ޓެކްނޮލޮޖީ ކުންފުންޏެއް ކަމަށްވާ "ޑިސްކަވާ-ޓެކް" އިން އަލްޖަޒީރާ މީޑިއާ ނެޓްވޯކާއި އެހެނިހެން ކުންފުނިތަކުގެ ގިނަ އަދަދެއްގެ ޑިވައިސްތަކަށް ޖާސޫސީ ސޮފްޓްވެއާ (ސްޕައިވެއާ) އެޅުމުގައި އެހީތެރިވެދީފައިވާކަން ހާމަވެއްޖެއެވެ.

މިކަމާ ގުޅިގެން އަލްޖަޒީރާއިން ބުރާސްފަތި ދުވަހު ނެރުނު ބަޔާނެއްގައި ބުނީ، އެ ކުންފުނީގެ މުވައްޒަފުންނަށް އަމާޒުކޮށް ދިން މި ސައިބާ ހަމަލާތައް އެންމެ ހަރުކަށި އިބާރާތުން ކުށްވެރިކުރާ ކަމަށެވެ. އަދި ނޫސްވެރިންނަށް މިފަދަ ހަމަލާތައް ދިނުމަކީ ނޫސްވެރިކަމުގެ މިނިވަންކަމަށް އަރައިގަތުން ކަމަށް ސިފަކޮށް، މި އަމަލު ހިންގި ފަރާތްތައް ޒިންމާދާރުކުރުވުމަށް އެ ނެޓްވޯކުން ވަނީ ގޮވާލާފައެވެ. މީގެއިތުރުން، އެ ކުންފުނީގެ މުވައްޒަފުންނާއި ނިޒާމުތައް ރައްކާތެރިކުރުމުގައި ދެމިތިބޭނެ ކަމުގެ ޔަގީންކަން ވެސް އަލްޖަޒީރާއިން ވަނީ ދީފައެވެ.

ކެނެޑާގެ ޔުނިވާސިޓީ އޮފް ޓޮރޮންޓޯގެ ސައިބާ ސެކިއުރިޓީ ދިރާސާކުރާ ޔުނިޓެއް ކަމަށްވާ "ސިޓިޒަން ލެބް" އިން ހެދި ތަހުގީގުން ދައްކާ ގޮތުގައި، މި ހަމަލާގައި ބޭނުންކޮށްފައިވަނީ އިސްރާއީލުގެ ކެންޑިރޫ (Candiru) ކުންފުނީގެ ޖާސޫސީ ސޮފްޓްވެއާއެކެވެ. މިއީ އެ ކުންފުނީގެ ނުރައްކާތެރި ސައިބާ ހަރަކާތްތަކާ ގުޅިގެން 2021 ވަނަ އަހަރު އެމެރިކާ ސަރުކާރުން ބްލެކްލިސްޓް ކޮށްފައިވާ ކުންފުންޏެކެވެ. މި ފަހަރު ސްޕައިވެއާ އަޅުވާފައިވަނީ ޑިވައިސްތަކަށް ޝައްކު ނުވާ ގޮތަށް އަމާޒުކޮށްގެން ފޮނުވާ އިޝްތިހާރުތައް މެދުވެރިކޮށް، "ޒީރޯ-ކްލިކް" ޓެކްނޮލޮޖީ ބޭނުންކޮށްގެންނެވެ.

މި ޓެކްނޮލޮޖީގެ ސަބަބުން، އިޝްތިހާރު ފެންނަ ވަގުތުން ފެށިގެން އެއްވެސް ލިންކަކަށް ފިތާނުލި ކަމުގައި ވިޔަސް ޑިވައިސް އިންފެކްޓްވެއެވެ. އަދި އޭގެ ފަހުން ޑިވައިސްގައި ހުންނަ ހުރިހާ މައުލޫމާތެއް ޖާސޫސުކުރާ ފަރާތްތަކަށް ލިބެމުންދެއެވެ. މި ނުރައްކާތެރި ސޮފްޓްވެއާ ފަރުމާކޮށްފައިވަނީ ފައިލްތަކާއި، ޑޮކިއުމަންޓްތަކާއި، ބްރައުޒާގެ ޑޭޓާ އާއި ޕާސްވޯޑްތައް ފަދަ ނާޒުކު މައުލޫމާތު ވަގަށް ނެގުމަށެވެ. މީގެއިތުރުން ސްކްރީންޝޮޓް ނެގުމާއި، ކީބޯޑުން ލިޔާ އެއްޗެހި ރެކޯޑުކުރުމާއި، މައިކްރޯފޯނާއި ވެބްކެމް މެދުވެރިކޮށް އަޑާއި މަންޒަރު ރެކޯޑުކޮށް، މެސެޖިން އެޕްތަކުން މެސެޖުތައް ނެގުމުގެ ގާބިލުކަން ވެސް މި ސޮފްޓްވެއާއަށް ލިބިފައިވެއެވެ.

ސެކިއުރިޓީ ސިސްޓަމްތަކަށް ފަޅާއެރުމެއް ނެތި މި ހުރިހާ މައުލޫމާތެއް ފޮނުވަނީ އެންކްރިޕްޓްކޮށް، ވަކިވަކި ބައިތަކަށް ބަހާލައިގެންނެވެ. މިފަދަ ޒަމާނީ ސޮފްޓްވެއާއެއް އުފައްދައި ބޭނުންކުރުމަށް އެތައް މިލިއަން ޑޮލަރެއް ޚަރަދުވާ ކަމަށް ރިޕޯޓުތައް ބުނެއެވެ.

ސިޓިޒަން ލެބްގެ ރިޕޯޓުގައި ބަޔާންކޮށްފައިވާ ގޮތުގައި، އިސްރާއީލުގެ ޑިސްކަވާ-ޓެކް އިން ވަނީ މި ސްޕައިވެއާ ހިމެނޭ އިޝްތިހާރުތައް ގަނެ، އެ އިޝްތިހާރުތައް މެދުވެރިކޮށް ޑިވައިސްތައް ކެންޑިރޫގެ މެލްވެއާއަށް ޑައިރެކްޓް ކުރުވާފައެވެ. މި ހަމަލާ އަމާޒުވި ފަރާތްތަކުގެ ތެރޭގައި ހައްސާސީ މައުޟޫއުތަކަށް ރިޕޯޓުކުރާ އަލްޖަޒީރާގެ މަޝްހޫރު ނޫސްވެރިން ވެސް ހިމެނެއެވެ.

މި މައްސަލަ އެންމެ ފުރަތަމަ ފާހަގަކުރެވުނީ 2024 ވަނަ އަހަރު އަލްޖަޒީރާގެ ޓެކްނިކަލް ޓީމަށެވެ. އަދި 2025 އާ ހަމައަށް ވެސް މި އާދަޔާ ޚިލާފު ކަންތައްތައް ފެންނަމުން ދިއުމުން، އެކަން އިތުރަށް ތަހުގީގު ކުރުމަށް ސިޓިޒަން ލެބްގެ އެހީތެރިކަމަށް އެދުނީއެވެ. ސިޓިޒަން ލެބުން ވަނީ އަލްޖަޒީރާގެ ނެޓްވޯކް ލޮގްތައް ދިރާސާކުރުމަށްފަހު، މި ހަމަލާ ދީފައިވާ ގޮތުގެ ފުރިހަމަ ހެކި ހޯދާފައެވެ.

މީގެއިތުރުން، އެމެރިކާގެ ކޮންފިއަންޓް ކުންފުނިން ނެރުނު ވަކި ރިޕޯޓެއްގައި ބުނެފައިވަނީ، ޑިސްކަވާ-ޓެކްގެ މިފަދަ އިޝްތިހާރުތައް އެމެރިކާގެ ޕެންޓަގަން، އދ. ގެ އިންޓަނޭޝަނަލް އެޓޮމިކް އެނާޖީ އޭޖެންސީ (އައިއޭއީއޭ) އަދި ބައިނަލްއަގުވާމީ ޖިނާއީ ކޯޓު (އައިސީސީ) ފަދަ މުހިންމު އިދާރާތަކުގެ ނެޓްވޯކްތަކުން ވެސް ފެނިފައިވާ ކަމަށެވެ. މީގެ ކުރިން ވެސް ކެންޑިރޫގެ ސްޕައިވެއާ ބޭނުންކޮށްގެން ދުނިޔޭގެ އެކި ގައުމުތަކުގެ 100 އަށް ވުރެ ގިނަ ނޫސްވެރިންނާއި އިދިކޮޅު ފަރާތްތަކަށް ޖާސޫސުކޮށްފައިވާކަން ވަނީ ހާމަވެފައެވެ.