ދެ އިންޖެކްޝަން ޖަހައިގެން މަރު ނުވި އެމެރިކާ އަންހެން މީހާ ހޭއަރައި ވާހަކަދައްކަން ފަށައިފި: ލޯޔަރުން

ވިހަ އިންޖެކްޝަން (ލީތަލް އިންޖެކްޝަން) ޖަހައިގެން މަރުގެ އަދަބު ތަންފީޒުކުރުމަށް ކުރި މަސައްކަތް ނާކާމިޔާބުވެ ސަލާމަތްވި އެމެރިކާގެ ގައިދީ ކްރިސްޓާ ޕައިކް ހޭއަރައި، މިހާރު ވާހަކަދައްކަން ފަށާފައިވާ ކަމަށް އޭނާގެ ވަކީލުން ހާމަކޮށްފިއެވެ.

މިއީ ވިހަ މާއްދާ ހަށިގަނޑަށް ފޮނުވާލުމަށްފަހު މަރުގެ އަދަބުން މީހަކު ސަލާމަތްވި ފުރަތަމަ ފަހަރު ކަމަށް ބީބީސީން ބުނެއެވެ.

އުމުރުން 50 އަހަރުގެ ޕައިކްގެ ވަކީލުން ނެރުނު ބަޔާނެއްގައި ބުނެފައިވަނީ، އޭނާ އަދިވެސް އޮތީ ހޮސްޕިޓަލުގައި ބިޑިއަޅުވައިގެން ފަރުވާ ދޭ ހާލަތުގައި ކަމަށެވެ. އަދި އޭނާ ރަނގަޅުވުމަށް ދިގު މުއްދަތެއް ނަގާނެ ކަމަށް ލަފާކުރެވޭ ކަމަށްވެސް ވަކީލުން ބުންޏެވެ.

ޕައިކް މަރަން ހުކުމްކޮށްފައިވަނީ 1995 ވަނަ އަހަރު، އޭނާގެ އުމުރުން 18 އަހަރުގައި، އޭރުގެ ލޯބިވެރިޔާއާ ގުޅިގެން ކޮލީން ސްލެމާ ނަމަކަށް ކިޔާ 19 އަހަރުގެ އަންހެން ކުއްޖަކަށް އަނިޔާކޮށް މަރާލި މައްސަލައިގައެވެ.

އެމެރިކާގެ ޓެނެސީ ސްޓޭޓްގައި އޭނާގެ ގަޔަށް ދެ ފަހަރެއްގެ މަތިން ވިހަ މާއްދާއެއް ކަމަށްވާ 'ޕެންޓޯބާބިޓަލް' ޖަހައިގެން މަރަން މަސައްކަތް ކުރި ނަމަވެސް އެކަން ކާމިޔާބުވާ ގޮތެއް ނުވިއެވެ. އެއަށްފަހު އޭނާ ވަގުތުން ހޮސްޕިޓަލަށް ގެންގޮސް، ވިހައިގެ އަސަރު ހަށިގަނޑުން ފިލުވުމަށް ފަރުވާ ދެމުން ދިޔައިރު އޭނާ ވަނީ ހޭނެތިފައެވެ.

ފޯޑަމް ލޯ ސްކޫލްގެ ޕްރޮފެސަރެއް ކަމަށްވާ ޑެބޮރާ ޑެންނޯ ބީބީސީއަށް ވިދާޅުވީ، މީގެ ކުރިންވެސް މަރުގެ އަދަބުން މީހުން ސަލާމަތްވެފައި އެބަހުރި ކަމަށާއި ނަމަވެސް އެ ހުރިހާ ހާލަތެއްގައިވެސް ކަން ހިނގާފައިވަނީ ލޭ ހޮޅި ނުފެނިގެން ވިހަ އިންޖެކްޝަން ނުޖެހި ކަމަށެވެ. އެހެންނަމަވެސް ޕައިކްގެ ހަށިގަނޑަށް ވިހަ ފޮނުވާލުމަށްފަހުވެސް އޭނާ ސަލާމަތްވުމަކީ މުޅިން އަލަށް ހިނގި، ހައިރާންކުރުވަނިވި ކަމެއް ކަމަށް އޭނާ ފާހަގަކުރެއްވިއެވެ.

ޕައިކްގެ ދިފާއީ ޓީމުގައި ހިމެނޭ އެނެސްތީސިއޮލޮޖިސްޓް ޑރ. ޖޮއެލް ޒިވޮޓް ވިދާޅުވީ، ޕައިކްގެ ހަށިގަނޑަށް ޖެހި ވިހައިގެ ދެ ޑޯޒަކީ އާދައިގެ ހާލަތެއްގައި އޭނާ ވަގުތުން މަރުވާނެ މިންވަރެއް ކަމަށެވެ. ނަމަވެސް އޭނާ ސަލާމަތްވީ އެ ވިހަ މާއްދާތައް ސީދާ ލޭގެ ހިނގުމުގެ ތެރެއަށް ނުގޮސް، ހަމުގެ ދަށުގައިވާ މަސްތަކުގެ ތެރެއަށް ފެތުރިގެން ދިއުމުން ކަމަށް ބެލެވޭ ކަމަށް އޭނާ ވިދާޅުވިއެވެ. ޕައިކްގެ އަތަށް މިކަމުގެ ސަބަބުން ބޮޑެތި އަނިޔާތަކެއް ލިބިފައިވާ ކަމަށްވެސް ވަކީލުން ބުނެއެވެ.

މި ހާދިސާއާ ގުޅިގެން ޓެނެސީގެ ގަވަރުނަރު ބިލް ލީ ވަނީ މި އަހަރުގެ ބާކީ އޮތް ބައިގައި އެ ސްޓޭޓްގައި މަރުގެ އަދަބު ތަންފީޒުކުރުން ވަގުތީ ގޮތުން މެދުކަނޑާލައްވާފައެވެ. އަދި އެ ސްޓޭޓްގެ ޖަލުތަކާ ބެހޭ އިސްވެރިޔާ ވަނީ އިސްތިއުފާ ދެއްވާނެކަން އިއުލާނު ކުރައްވާފައެވެ.

މި މައްސަލައިގައި ޕައިކްގެ ވަކީލުން ނޭޝްވިލްގެ ކޯޓަށް ހާޒިރުވުމަށް ހަމަޖެހިފައިވާއިރު، އޭނާއަށް ދެވަނަ ފަހަރަށް މަރުގެ އަދަބު ދޭން މަސައްކަތް ކުރާނެ ކަމެއް ކަމާބެހޭ އިދާރާތަކުން އަދި ހާމައެއް ނުކުރެއެވެ.