އަމިއްލަ ނަފްސަށް ގެއްލުންދިނުމުގެ ހާދިސާތައް ރިޕޯޓްކުރުމުގައި ޒިންމާދާރުވުމަށް އިލްތިމާސްކޮށްފި

އަމިއްލަ ނަފްސަށް ގެއްލުންދިނުމުގެ ހާދިސާތައް ރިޕޯޓުކުރުމުގައި ނޫސްވެރިން އަމަލުކުރަންޖެހޭ ޚާއްސަ މީޑިއާ އެޑްވައިޒަރީ އެއް މިއަދު މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އާއި މޯލްޑިވިއަން ރެޑް ކްރެސެންޓް (އެމްއާރްސީ) އާއި ގުޅިގެން ނެރެފިއެވެ.

މި އިރުޝާދުތަކަކީ ނޫސްތަކާއި، އެޑިޓަރުން އަދި ނޫސްވެރިން މިފަދަ ހައްސާސީ މައުލޫމާތުތައް ފެތުރުމުގައި ޒިންމާދާރުކަން އިތުރުކުރުމަށް ބާރުއެޅުމުގެ ގޮތުން އެކުލަވާލާފައިވާ އުސޫލުތަކެއްކަން އެ އިދާރާތަކުން ފާހަގަކުރެއެވެ.

އެކްސްގައި އެ ޖަމިއްޔާތަކުން ކުރި ޕޯސްޓް

މި އެޑްވައިޒަރީގައި ބަޔާންކޮށްފައިވާ ގޮތުގައި، މިފަދަ ހާދިސާތައް ރިޕޯޓުކުރާއިރު އެކަން ކުރި ގޮތުގެ ތަފްސީލު ހާމަކުރުމާއި، މަރުވުމުގެ ކުރިން ދޫކޮށްފައިވާ ނޯޓުތައް ޝާއިއުކުރުމަކީ ކޮށްގެންވާނެ ކަންކަމެއް ނޫނެވެ.

އަދި ހާދިސާ "ސެންސޭޝަނަލައިޒް" ކުރުން ނުވަތަ މާބޮޑު ކަމެއްގެ ގޮތުގައި ސުރުޚީތައް ބޭނުންކޮށްގެން ފެތުރުމަކީ، އެހެން ބަޔަކު އެ އަމަލު ތަކުރާރުކުރުމަށް (ކޮޕީކެޓް ބިހޭވިއަރ) ހިތްވަރު ލިބިދާނެ ކަމެއް ކަމަށް އެ ޖަމިއްޔާތަކުން ފާހަގަކުރެއެވެ.

މީގެ އިތުރުން، ޒިންމާދާރުކަމެއް ނެތި މިފަދަ ޚަބަރުތައް ފެތުރުމުގެ ސަބަބުން، ވަކިވެދިޔަ ފަރާތްތަކުގެ އާއިލާތަކަށް ލިބިފައިވާ ފުން ހިތާމަ އިތުރަށް ބޮޑުވެގެންދާ ކަމަށްވެސް މި ބަޔާނުގައިވެއެވެ. އެހެންކަމުން، ހާދިސާގެ ބިރުވެރިކަން ދެއްކުމުގެ ބަދަލުގައި، އުންމީދު އާކޮށްދޭނެ ފަދަ ވާހަކަތަކާއި، ކަމާބެހޭ މާހިރުންގެ އިރުޝާދުތަކާއި، އެހީތެރިކަން ހޯދޭނެ ގޮތްތަކަށް ޚަބަރުތަކުގައި އިސްކަންދިނުމަށް ވަނީ އިލްތިމާސްކޮށްފައެވެ.

ނޫސްވެރިންނަށް ދީފައިވާ އެންމެ މުހިންމު އެއް އިރުޝާދަކީ، އަމިއްލަ ނަފްސަށް ގެއްލުންދިނުމާ ގުޅޭ ކޮންމެ ޚަބަރަކާއި ސޯޝަލް މީޑިއާ ކޮންޓެންޓެއްގައިވެސް، އެހީތެރިކަން ފޯރުކޮށްދޭ ގައުމީ ހެލްޕްލައިންތަކުގެ މައުލޫމާތު ހިމެނުމެވެ.