ދިއްގަރުގައި 75 ހައުސިން ޔުނިޓު އިމާރާތްކުރަން އެމްޓީސީސީއާ ހަވާލުކޮށްފި

މ.ދިއްގަރުގައި 75 ހައުސިންގ ޔުނިޓު އިމާރާތްކުރުމުގެ މަސައްކަތް ކުރުމަށް ހައުސިން މިނިސްޓްރީން އެމްޓީސީސީއާ ހަވާލުކޮށްފިއެވެ.

މިމަސައްކަތުގެ އެއްބަސްވުމުގައި މިއަދު ސޮއި ކޮށްފައިވާއިރު، ހައުސިން މިނިސްޓްރީގެ ފަރާތުން ސޮއިކުރެއްވީ ޕާރމަނަންޓް ސެކްރެޓަރީ ޒީނިޔާ އަޙްމަދު ހަމީދެވެ. އަދި އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ ސީއީއޯ އަބްދުﷲ ޒިޔާދުއެވެ.

މިކަމާއި ގުޅިގެން އެމްޓީސީސީން ނެރުނު ނޫސްބަޔާނެއްގައި ބުނީ، ޒަމާނުއްސުރެ ގެދޮރުގެ ދަތިކަން ދިމާވެފައިވާ ދިއްގަރުގެ ރައްޔިތުންނަށް މި މަޝްރޫއުގެ ސަބަބުން ވަރަށް ބޮޑު ހިތް ހަމަ ޖެހުމެއް ލިބިގެންދާނެ ކަމަށެވެ.

ދިއްގަރުގައި އެޅުމަށް ހަމަޖެހިފައިވާ ހައުސިން ޔުނިޓް މަޝްރޫއުގެ ދަށުން، 1000 އަކަފޫޓުގެ ސަރަޙައްދެއްގައި 3 ފަންގިފިލާގެ 75 ފްލެޓް އިމާރާތް ކުރެވިގެން ދާނެކަމަށާއި، ކޮންމެ ޔުނިޓެއްގައި 3 ކޮޓަރި އިމާރާތް ކުރެވިގެން ދާނެ ކަމަށް އެމްޓީސީސީ އިން ބުނެއެވެ.

ހައުސިން މިނިސްޓްރީން މި މަޝްރޫއު އެމްޓީސީސީ އާއި ހަވާލުކޮށްފައިވަނީ، 117.97 މިލިއަން ރުފިޔާގެ ބަޖެޓެއް ކަނޑައަޅައި، 420 ދުވަސް ތެރޭގައި ނިންމާ ގޮތަށެވެ.