ކޮމިޝަންއިން ދެ މައްސަލައެއް އާންމުކޮށް ހުޅުވާލައިގެން ބަލަނީ

މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަހުގީގުކުރާ ކޮމިޝަނުން ތަހުގީގުކުރުމަށް ހަމަޖެހިފައިވާ މައްސަލަތަކުގެ ތެރެއިން ދެ މައްސަލައެއް ކޮމިޝަނުން ބަލާނީ އާންމުކޮށް ހުޅުވާލައިގެން، ޕަބްލިކް އިންކުއަރީއެއްގެ ގޮތުގައި ކަމަށް އެ ކޮމިޝަނުން ބުނެފިއެވެ.

އެ ކޮމިޝަންގެ ފަރާތުން މިހެން ބުނެފައިވަނީ މިއަދު ރައީސުލްޖުމްހޫރިއްޔާގެ އޮފީހުގައި އޮތް ނޫސްވެރިންގެ ބައްދަލުވުމެއްގައި ކޮމިޝަންގެ ރައީސް ހުސްނުއްސުއޫދުއެވެ.

ސުއޫދު ވިދާޅުވީ އެ ކޮމިޝަނުން މިހާތަނަށް 24 މައްސަލައެއް ބެލުމަށް ނިންމާފައިވާކަމަށެވެ. އޭގެ ތެރެއިން މަދުވެގެން ދެ މައްސަލައެއް ކޮމިޝަނުން ބަލާނީ އާންމުކޮށް ހުޅުވާލައިގެން، ޕަބްލިކް އިންކުއަރީއެއްގެ ގޮތުގައި ކަމަށްވެސް ސުއޫދު ފާހަގަކުރެއްވިއެވެ.

ކޮމިޝަނުން ބެލުމަށް ހަމަޖެހިފައިވާ މައްސަލަތަކަކީ:

1. މ. ޝައިނިން ސްޓާ، އަހްމަދު ރިލްވާން އަބްދުﷲ ގެއްލުނު މައްސަލަ

2. އެމްއެމްއޭ ކައިރީގައި ތޫނު އެއްޗަކުން ހަމަލާދީ އިބްރާހިމް އާގިލް މަރާލި މައްސަލަ

3. 2014 ވަނަ އަހަރު ހިނގާފައިވާ މަރުގެ މައްސަލައެއް

4. ލ. ކަލައިދޫގައި ހިނގި އެކްސިޑެންޓެއްގައި ޒަހަމްވި އުމުރުން 14 އަހަރުގެ އަހްމަދު ވިޝާލް މަރުވި މައްސަލަ

5. ރ. މީދޫ ފެންފިޔާޒުގޭ މުހައްމަދު އަނަސް މަރާލި މައްސަލަ

6. ހ. ދޫހިމެރިގޭ ނަދާލް ރަޝީދުގެ މަރުގެ މައްސަލަ

7. ހ. ފިލިކުރިގޭ މޫސާ ނައީމް ދޫނިދޫ ޖަލުގައި ބަންދުކޮށްފައި ވަނިކޮށް ކުއްލި ގޮތަކަށް މަރުވި މައްސަލަ

8. ގ. ފެހިމާގޭ އަލީ އަބްދުﷲ ޖަލުގައި ހުކުމް ތަންފީޒުކުރަނިކޮށް މަރުވި މައްސަލަ

9. ދ. ކުޑަހުވަދޫ އަބްދުﷲ މާހިލް ގެއްލިފައިވާ މައްސަލަ

10. ރައުދާ އާތިފްގެ މަރުގެ މައްސަލަ

11. ޖަލުގައި ހުކުމް ތަންފީޒުކުރަނިކޮށް ގ. ކީމާ އަބްދުﷲ ރަޝީދު މުހައްމަދު މަރުވި މައްސަލަ

12. ޏ. ފުވައްމުލަކު އޮޅުތެރޭގެ މުހައްމަދު ޝަފީއު އިބްރާހިމް ގެއްލިފައިވާ މައްސަލަ

13. ހއ. ތަކަންދޫ ޖަނަވަރީގޭ އަބްދުއްޝަކޫރު އަބްދުﷲ މަރުވި މައްސަލަ

14. ރ. އުނގޫފާރު ގުލްފާމުގޭ ޑރ. އަފްރާޝީމް އަލީ މަރާލި މައްސަލަ

15. ސ. ފޭދޫ ޗަނބޭލީގޭ ޔާމީން ރަޝީދު މަރާލި މައްސަލަ

16. ހ. އޮގަސްޓާ އަހްމަދު ނަޒީފް ޝައުކަތު، އަޑު ޕާކުތެރޭ މަރުވެފައި އޮއްވައި ފެނުނު މައްސަލަ

17. މ. މާކަރީ މުހައްމަދު ޝަހުދުގެ މަރުގެ މައްސަލަ

18. މާލެ، ހާބަރު ޅިޔަނު ކެފޭ ތެރޭ ބަންގްލަދޭޝް މީހެއް ކަމަށްވާ ޝާހީން މިއާ މަރާލި މައްސަލަ

19. ލ. މުންޑޫ ނޫވިލު، އަލީ ޒިޔަދަމް އަށް ހަމަލާދީ މަރާލި މައްސަލަ

20. 2016 ވަނަ އަހަރު މާލޭގައި ހިނގާފައިވާ މަރުގެ ދެ މައްސަލަ

21. ހ. ހަންޑްރެޑް ފްލާވާ އަހްމަދު ޖައިލަމް ޝާކިރު މަރާލި މައްސަލަ

22. ފުވައްމުލަކު ދޫޑިގަމު ނާޝިދު މޫސާގެ މަރުގެ މައްސަލަ

23. ހާއްސަ އެހީއަށް ބޭނުންވާ މީހުންގެ މަރުކަޒުގައި ފަރުވާ ހޯދަމުން ދިޔަ އަހްމަދު މިޝްފާގު ގެއްލިފައިވާ މައްސަލަ

24. 2016 ވަނަ އަހަރުގެ ކުޑަކުދިންގެ ހިޔާގައި ފަސް މަހުގެ ކުއްޖަކު މަރުވި މައްސަލަ، މިއެވެ.

މިއަދުގެ ބައްދަލުވުމުގައި ސުއޫދުވަނީ ޝަރުއީ ނިޒާމާއި މެދު ބޮޑެތި ކަންބޮޑުވުންތަކެއް ފާޅުކުރައްވާފައެވެ. ސުއޫދު ވިދާޅުވީ ފަނޑިޔާރުން ކޮންމެވެސް ވަރަކަށް ޝާމިލުވެގެން މަރުގެ މައްސަލަތައް ސާބިތު ނުކޮށްއެބަހުރިކަމަށާއި ގޭންގުތަކުގެ ނުފޫޒު ފަނޑިޔާރުންގެ މައްޗަށް ފޯރާފަ އެބަހުރިކަމަށެވެ.

ސުއޫދުވަނީ މިހާރު ތިބި ފަނޑިޔާރުން ބައިތިއްބައިގެން ކްރިމިނަލް ކޯޓުން އިންސާފު ލިބިދާނެތޯ ސުވާލު އުފައްދަވާފައެވެ.