ފޭކް ސްލިޕް ހަދައިގެން ގެސްޓްހައުސްތައް ބުކްކުރާ މައްސަލަ ހުރާގައި ބޮޑުވެއްޖެ

ފޭކް ސްލިޕްތައް ހަދައިގެން ގެސްޓްހައުސްތަކުގެ ރޫމްތައް ބުކްކުރާ މައްސަލަތަކެއް ފެންމަތިވެ، އެކަމަށް ސަމާލުވުމަށް ހުރާ ކައުްނސިލުން އިލްތިމާސްކޮށްފިއެވެ.

މިކަމާ ގުޅިގެން ހުރާ ކައުންސިލުން ބުނީ، މި މަހުގެ ތެރޭގައި އެ ރަށުގައި ބޭއްވުމަށް ހަމަޖެހިފައިވާ ފުޓްބޯޅަ މުބާރާތާ ގުޅިގެން ކޮޓަރިތަކަށް އޮތް ޑިމާންޑް ވަރަށް ބޮޑަށް އިތުރުވެފައިވާ ކަމަށެވެ. އަދި މި ފުރުޞަތުގެ ނާޖާއިޒު ފައިދާ ނަގައިގެން ބައެއް ފަރާތްތަކުން ގެސްޓްހައުސްތަކަށް ގުޅައި، ކޮޓަރި ބުކްކުރުމަށްފަހު ފޭކް ސްލިޕް ފޮނުވަމުންދާކަމުގެ ޝަކުވާ ލިބެމުންދާ ކަމަށް ކައުންސިލުން ވަނީ ފާހަގަކޮށްފައެވެ.

ކައުންސިލުން ބުނި ގޮތުގައި، މިގޮތަށް މަކަރު ހަދާ ފަރާތްތަކުން ފޭކް ސްލިޕް ފޮނުވުމަށްފަހު ބުކިންގ ކެންސަލްކޮށް، ފައިސާ އަނބުރާ (ރިފަންޑް) ދިނުމަށް އެދެއެވެ. އަދި ފައިސާ އަނބުރާ ނުދެވޭނެކަމަށް ބުނުމުން، އޭގެ ތެރެއިން ބައެއް ނަމަވެސް ހޯދުމަށް އެދި އޮޅުވާލަން މަސައްކަތްކުރާ ކަމަށް ވެސް ކައުންސިލުން ބުނެފައިވެއެވެ.

މިފަދަ މަކަރާއި ހީލަތުގެ ސަބަބުން ލިބިދާނެ މާލީ ގެއްލުމަކުން ސަލާމަތްވުމަށްޓަކައި، ކައުންސިލުން ވަނީ ޚާއްޞަ ފިޔަވަޅުތަކެއް އެޅުމަށް ގެސްޓްހައުސް ވިޔަފާރިވެރިންނަށް އިލްތިމާސްކޮށްފައެވެ. އޭގެ ތެރޭގައި:

- ކަސްޓަމަރުން ފޮނުވާ ސްލިޕަށް އެކަނި ބަރޯސާނުވެ، ބޭންކް އެކައުންޓަށް ފައިސާ ޖަމާވިކަން ސީދާ ޔަޤީންކުރުން

- ފައިސާ ޖަމާވިކަން ޔަޤީންނުވަނީސް ބުކިންގ ކަށަވަރު ނުކުރުން

- އެކައުންޓަށް ފައިސާ ވަދެފައިވާކަން ޔަޤީންނުކޮށް އެއްވެސް ފައިސާއެއް ރިފަންޑްގެ ގޮތުގައި އަނބުރާ ނުދިނުން

ހުރާ ކައުންސިލުން ބުނީ މީގެ މި މައްސަލައިގެ މަޢުލޫމާތު ރަށުގެ އެހެން ވިޔަފާރިވެރިންނާ ޙިއްޞާކޮށް، ހުރިހާ ފަރާތްތަކުންވެސް މާލީ މުޢާމަލާތްތަކުގައި މިހާރަށްވުރެ ބޮޑަށް ސަމާލުވުމަށް ހުރާ ކައުންސިލުން އެދިފައިވާކަމަށެވެ.