އިނގިރޭސީން ފޯޅަވަހި ކޮންޓްރޯލް ކުރަނީ ގަވާއިދާއި ޚިލާފަށް: އައިސީޖޭ

އިނގިރޭސިވިލާތުގެ ސަރުކާރުން 1960ގެ އަހަރުތަކުގެ ތެރޭގައި މީހުން ހުސްކޮށް، އެފަރާތުގެ ބާރުގެ ދަށަށް ފޯޅަވަހީގެ ޖަޒީރާ ރަށްތައް ގެންދިޔައީ އުސޫލުތަކާއި ޚިލާފަށްކަމަށް އިންޓަރނޭޝަނަލް ކޯޓް އޮފް ޖަސްޓިސް އިން ބުނެފިއެވެ.

ނޮން ބައިންޑިންގް ނުވަތަ އަމަލުކުރަން މަޖުބޫރުނުވާގޮތަށް ނެރުނު މި އަމުރުގައި އެކޯޓުން ބުނެފައިވަނީ 1965ވަނަ އަަހަރު އެރަށްތައް މޮރިޝަސްެގެ ކިބައިން ވަކިކުރިއިރު އަމަލުކޮށްފައިވަނީ ފޯޅަވަހީގެ ރައްޔިތުންނަށް އެންމެ ފައިދާކުރަނިވި ގޮތަށް ނޫންކަމަށެވެ.

އަދި ފޯޅަވަހީގެ ރަށްތަކުގެ މައްޗަށް އިނގިރޭސިން ކުރަމުންދާ ވެރިކަން ހުއްޓާލުމަށް މި އަމުރުގައި ވަނީ އެދިފައެވެ.

މި މައްސަލަ އައިސީޖޭއަށް ހުށައެޅި މޮރިޝަސްއިން ބުނެފައިވަނީ ކުރިން އެގައުމުގެ ބައެއްގެ ގޮތުގައި އޮތް ފޯޅަވަހި، އެގައުމުން ވަކިކޮށްފައިވަނީ ގާނޫނާއި ޚިލާފަށްކަމަށެވެ. އެގޮތުން މިއީ އދ.ގެ ޗާޓަރގައި ހިމެނޭ ރިޒޮލިއުޝަން ނަންބަރ 1514 އާއި ޚިލާފްކަމެއްކަމުގައި މޮރިޝަސް އިން ވަނީ ބުނެފައެވެ.

ފޯޅަވައްސަކީ އައްޑޫ ސިޓީގެ ދެކުނުން 310 މޭލު ދުރުގައި އޮންނަ އަތޮޅެކެވެ. މިހާރު އެ އަތޮޅަކީ އިނގިރޭސި ސަރުކާރާއި އެމެރިކާ ސަރުކާރުގެ ބެލުމުގެ ދަށުން، އަސްކަރީ ބޭނުންތަކަށް ބޭނުންކުރާ ސަރަހައްދެކެވެ.