އިންތިހާބުތަކުގައި ވާދަކުރައްވާ ބޭފުޅުން ސާބިތު ދަރަންޏެއް އޮތުމަކީ މައްސަލައެއް ނޫން: ހަބީބް

އިންތިހާބުތަކުގައި ވާދަކުރައްވާ ކެންޑިޑޭޓުންގެ ސާބިތު ދަރަންޏެއް އޮތުމަކީ މައްސަލައެއް ނޫންކަމަށް އިލެކްޝަން ކޮމިޝަން (އީސީ)ގެ ނައިބު ރައީސް އިސްމައިލް ހަބީބް ވިދާޅުވެއްޖެއެވެ.

ހަބީބް މިއަދު އެކްސްގައި ކުރެއްވި ވިދާޅުވީ ސާބިތު ދަރަންޏެއް އޮތަސް އިންތިހާބުތަކުުގައި ވާދަކުރެވޭނެ ކަމަށާއި ދަރަންޏެއް އޮތުމަކީ މައްސަލައެއް ނޫން ކަމަށެވެ.

"މައްސަލައަކަށް ވާނީ، ސާބިތު ދަރަނީގެ ޙުކުމްގައި އޮންނަ މުއްދަތަށް، ޙުކުމާ އެއްގޮތަށް ފައިސާ ދައްކަވަމުން ނުގެންދަވާނަމަ." ހަބީބު ވިދާޅުވި އެވެ.

ހަބީބް މިހެން ވިދާޅުވެފައި މިވަނީ، މާލެ ސިޓީ މޭޔަރު ކަމަށް ސަރުކާރު ހިންގާ ޕީއެންސީގެ ފަރާތުން ވާދަކުރައްވާ ކުރީގެ ބަންޑާރަ ނާއިބު ޢާއިޝަތު ޢާޒިމާ ޝަކޫރު، މޯލްޑިވްސް އިސްލާމިކް ބޭންކް (އެމްއައިބީ) އިން ނެގި ލޯން ސްކީމަކަށް ފައިސާ ގަވާއިދުން ނުދައްކާ އޮތުމުން އެ ބޭންކުން އާޒިމާގެ މައްޗަށް ދައުވާ ކޮށް، އޭނާގެ މައްޗަށް ހަތަރު މިލިޔަން ރުފިޔާ ދައްކަން ސިވިލް ކޯޓުން ވަނީ ހުކުމްކުރުމާއި ގުޅިގެން ބައެއް މީހުންގެ ފާޑުކިޔުން އޭނާއަށް އަމާޒުވެފައި ވަނިކޮށެވެ.

ސިވިލް ކޯޓުން މިފަދައިން ހުކުމް ކުރުމާއި ގުޅިގެން ޢާޒިމާ ވިދާޅުވީ، ލޯނު ގަވާއިދުން ދެއްކުމުގައި ކުރި އެރުމެއް ލިބިފައި ނުވަނީ އާޒިމާ އަކީ އަމިއްލަ މަސައްކަތުން ދިރިއުޅުމުގެ ހަރަދުތައް ހަމަޖައްސައިގެން ދިރިއުޅޭ މަޔަކަށް ވެފައި ކޮވިޑް ގެ ހާލަތުގެ ސަބަބުން އާމްދަނީއެއް ހޯދުމަށް ކުރި ތަފާތު މަސައްކަތްތަކަށް އެކަށީގެންވާ ކުރިއެރުމެއް ލިބިފައި ނުވާތީ ކަމަށެވެ. އަދި މި ހުކުމް ކޮށްފައި މިވަނީ މި ލޯނު ދެއްކުމަށް ތާވަލެއް ރާވައި، ލޯނު ރީސްޓަރަކްޗާ ކުރުމުގެ މަޝްވަރާތައް ބޭންކާއި އެކު ކުރިއަށް ދަނިކޮށް ކަމަށެވެ.

އަދި އެ ހުކުމް އިސްތިއުނާފް ކުރަން ނިންމާފައިވާ ކަމަށްވެސް އޭނާ ވިދާޅުވި އެވެ.

މާލެ ސިޓީ މޭޔަރު ކަމުގެ މއިންތިހާބު އޮންނާނީ މިމަހު 13 ވަނަ ދުވަހުގައެވެ.