ވައިގެ ދަތުރުތައް އިތުރުކުރުމާއި ގުޅޭގޮތުން ރާއްޖެ-އިންޑިއާ މަޝްވަރާކޮށްފި

ވައިގެ ދަތުރުތައް އިތުރުކުރުމާއި ގުޅޭގޮތުން ރާއްޖެ އާއި އިންޑިއާގެ ކަމާގުޅޭ މިނިސްޓަރުން މިއަދު މަޝްވަރާ ކުރައްވައިފި އެވެ.

ރާއްޖެއަށް މިހާރު ވަޑައިގެން އުޅުއްވާ އިންޑިއާގެ މިނިސްޓަރ އޮފް ސިވިލް އޭވިއޭޝަން މިނިސްޓަރު ރާމް މޯހަން ނައިޑޫ އާއި ޓްރާސްޕޯޓް މިނިސްޓަރު މުހައްމަދު އަމީން މިއަދު ވަނީ ބައްދަލުކުރައްވާފަ އެެވެ. މި ބައްދަލްވުމުގައި ވައިގެ ދަތުރުތައް އިތުރުކުރުމާއި ގުޅޭގޮތުން ދެ މިނިސްޓަރުން މަޝްވަރާ ކުރައްވާފައިވާ ކަމަށް އިންޑިއާ ހައިކޮމިޝަނުން ބުނެ އެވެ.

އިންޑިއާގެ މިނިސްޓަރ އޮފް ސިވިލް އޭވިއޭޝަން މިނިސްޓަރު ރާމް މޯހަން ނައިޑޫ ރާއްޖެ ވަޑައިގެންނެވީ ރާއްޖޭގެ އުތުރުގެ އިގްތިސާދީ މައި ދޮރޯށީގެ ގޮތުގައި ސިފަކުރާ ހދ. ހަނިމާދޫ އިންޓަރނޭޝަނަލް އެއާޕޯޓް ހުޅުވުމުގެ ރަސްމިއްޔާތަށެވެ. މިނިސްޓަރު ރާމް މޯހަން ނައިޑޫ ވަޑައިގެންނެވީ އިންޑިއާގެ ބޮޑު ވަޒީރު ނަރެންދުރަ މޯދީގެ ހާއްސަ މަންދޫބެއްގެ ގޮތުގަ އެވެ.

މި އެއާޕޯޓް ތަރައްގީކޮށްފައި ވަނީ އިންޑިޔާގެ އެގްޒިމް ބޭންކުގެ އެހީގަ އެވެ.