ކުޅުދުއްފުށި އެއަރޕޯޓްގެ ޕެސެންޖަރ ޓަރމިނަލް އަލުން ތަރައްޤީކުރުމަށް ބަޔަކު ހޯދަނީ

ކުޅުދުއްފުށި އެއަރޕޯޓްގެ ޓަރމިނަލް އެކްސްޕެންޑްކޮށް އަލުންހަދާނެ ފަރާތެއް ހޯދުމަށް އިއުލާން ކޮށްފިއެވެ.

ކުޅުދުއްފުށި އެއަރޕޯޓް ހިންގައި ބަލަހައްޓާ ކުންފުނި، ރީޖަނަލް އެއަރޕޯޓްސް ކޮންޕަނީ ލިމިޓެޑް(އާރް.އޭ.ސީ.އެލް) އިން ކޮށްފައިވާ އިއުލާނުގައި ބުނީ ލ، ކުޅުދުއްފުށި އެއަރޕޯޓްގެ ޓަރމިނަލް އެކްސްޕެންޑްކޮށް އަދި އަލުން ހެދުމަށްޓަކައި ޝައުގު ވެރިވެއްލައްވާ ކޮންސްޓްރަކްޝަން ކުންފުނިތަކުން އެކްސްޕްރެޝަން އޮފް އިންޓަރެސްޓް (އީ.އޯ.އައި) ހުށަހެޅުމުގެ ފުރުޞަތު ހުޅުވާލާފައިވާ ކަމަށެވެ. އަދި އެއަރޕޯޓްގެ ޓަރމިނަލް އެކްސްޕެންޑްކޮށް އަދި އަލުން ތަރައްޤީކުރަން ޖެހޭނީ އެކުންފުނިންދޭ ކޮންސްޕްޓް ކުރެހުމާއި އެއްގޮތްވާ ގޮތުގެ މަތިން ކަމަށެވެ.

މި މަސްރޫޢުގެ ދަށުން 11،345 އަކަފޫޓުގެ ޕެސެންޖަރ ޓަރމިނަލްއަކާއި، ފެސެންޖަރ ޓަރމިނަލް ސަރަހައްދުގައި ޝޭޑިންގ އެއް ލުމަށާއި، މިވަގުތު ބޭނުންކުރެވެމުންދާ ޕެސެންޖަރ ޓަރމިނަލްގެ ސްޓްރަކްޗަރއަށް ގެންނަންޖެހޭ ބަދަލުތަށް ގެނައުމަށާއި، އަދި ޕެސެންޖަރުންނަށް ދެވޭ ޙިދުމަތްތައް ފުޅާކުރުމަށް ބޭނުންވާ އެހެނިހެން ތަންތަން ޤާއިމްކުރުންވެސް ހިމެނެއެވެ.

މި މަޝްރޫޢު ކުރިއަށް ގެންދިއުމަށް ޝައުގު ވެރިވެއްލައްވާ ކޮންސްޓްރަކްޝަން ކުންފުނިތަކުން، އެކްސްޕްރެޝަން އޮފް އިންޓަރެސްޓް (އީ.އޯ.އައި)އެއް ގެޒެޓްގައި ބަޔާކުރެވިފައިވާ މާޢުލޫމާތުތަކާއެކު 09 ޖަނަވަރީ 2024 ވާ އަންގާރަ ދުވަހުގެ 23:59 ގަނޑި ސުންމިނެޓްގެ ކުރިން [email protected] އަށް ފޮނުއްވުމަށް ވަނީ އެދިލައްވާފައެވެ. އަދި މި މަސްރޫޢަށް ކަނޑައަޅާފައިވާ ބިޑް ޑޮކިއުމަންޓް ދޫކުރެވޭނީ ރެޖިސްޓަރ ވެފައިވާ ފަރާތްތަކަކަން ވަނީ ފާހަގަކުރައްވާފައެވެ.

ކުޅުދުއްފުށި އެއަރޕޯޓްގެ ޕަސެންޖަރ ޓަރމިނަލްގެ ޙިދުމަތްތައް ފުޅާކުރުމުގެ މަސައްކަތްތައް ފެށުމަށް ވަނީ ރައީސްގެ “ހަފްތާ 14” ގެ މަގުޗާޓުގައި ހިމަނާފައެވެ.

އަދި ރައީސް ވެވަޑައިގެންފައިވާ ވައުދުފުޅާއި އެއްގޮތަށް 14 (ސާދަ) ހަފްތާގެ ތެރޭގައި އަމަލީ މަސައްކަތްތައް ފެށުމަށް ރީޖަނަލް އެއަރޕޯޓްސް ކޮންޕަނީ ލިމިޓެޑް(އާރް.އޭ.ސީ.އެލް)ގެ ފަރާތުން ދަނީ މަސައްކަތް ކުރަމުންނެވެ.

ކުންފުނީގެ މެނޭޖިންގ ޑިރެކްޓަރ، އަޙްމަދު މުބީން ކުރިންވެސް ފާހަގަކުރެއްވި ގޮތުގައި، ކުންފުންޏާއި ހަވާލުވި ފުރަތަމަ ދުވަހުން ފެށިގެން އެންމެ ބޮޑު އިސްކަމެއް ދީފައިވާ އެއް މަސްރޫއަކީ ކުޅުދުއްފުށި އެއަރޕޯޓަށް ގެންނަންޖެހޭ ބަދަލުތައް ދެނެގަނެ، އިތުރުކުރަންޖެހޭ އެންމެހައި ޙިދުމަތްތަކެއް އިތުރު ކުރުމާއި، ޕަސިންޖަރުންނަށް އެއަރޕޯޓުން އަދި ޓަރމިނަލްއުން ލިބެންޖެހޭ އެންމެހައި ޙިދުމަތްތައް ހިމެނޭ ގޮތަށް ކޮންސެޕްޓް ޑްރޮވިންގ އެއް އެކުލަވާލާއި މަސްރޫޢުގެ މަސައްކަތްތައް ފަށައި ތަޢާވާލް އާއި އެއްގޮތަށް މަސައްކަތްތައް ނިންމުން ކަމަށް އެ ކުންފުނިން ބުނެއެވެ.

އަދި މުބީން ފާހަގަ ކުރެއްވިގޮތުގައި އަލަށް ހެދޭ ޓަރމިނަލްގައި ދަތުރުކުރާ ފަރާތްތަކަށާއި އާއްމު ފަރާތްތަކަށް ބޭނުންވާ ހުރިހާ ހިދުމަތްތަކެއް އެކުލެވިފައިވާނެވެ. މިސާލަކަށް، ފާހަނަ، މައިންނަށް ހާއްސަ ކުރެވިފައިވާ ކޮޓަރި، ނަމާދު ކުރާ ކޮޓަރި، ކެފޭގެ ހިދުމަތް، ދަތުރުކުރާ ފަތުރުވެރިންނަށް ނުވަތަ އެހެން ފަރާތްތަކަށް އިންފޮމޭޝަން  ދޭނެ ކައުންޓަރ ފަދަ ހިދުމަތްތަކާއި ސްޓާފުންނަށް ބޭނުންވާ ވަސީލާތްތަކާއި ޙިދުމަތްތައް ގާއިމްކުރެވިގެންދާނެވެ.

އަދި މި މަސްރޫޢުގެ ތެރޭގައި އެއަރޕޯޓުގެ ސަރަހައްދަށް  ބޭނުންވާ ޕާކިންގެ ޙިދުމަތްތަކާއި އަދި މީގެ އިތުރުންވެސް އެއަރޕޯޓަށް އިތުރު ފުރިހަމަކަން ގެނެސްދޭނެ ކަންކަންވަނީ ހިމަނާފައެވެ.

މިބަދަލުތަކާއެކު އާރް.އޭ.ސީ.އެލްއިން ދަނީ، ކުޅުދުއްފުށި އެއަރޕޯޓުގައި ހިމެނޭ ސަރަހައްދަށް އިތުރު އިންގިލާބީ ބަދަލުތަކެއް ގެނައުމުގެ މަސައްކަތްތަކެއް ކުރަމުންނެވެ. އޮގޮތުން، ޓުއަރިޒަމް އާއި ގުޅުންހުރި ކަންކަން އެއަރޕޯޓުގެ އުތުރަށް އޮތް ހުސްބިމުގައި ތަޢާރަފް ކުރުމަށް  އާރް.އޭ.ސީ.އެލް އާއި ކައުންސިލާއެކުވަނީ ސޮއިކުރެވިފައެވެ.

މިކަންކަމުގެ ސަބަބުން ކުޅުދުއްފުށި ސިޓީއަށް އިތުރަށް ފުރިހަމަކަން ގެނެސްދީ ޓުއަރިޒަމް އިތުރަށް ފުޅާވުމަށް އެހީއަކަށްވެގެންދާނެއެވެ.