ސިނަމާލެ ބްރިޖަށް ދިވެހިންގެ ތަރުހީބު ވަރަށް ރަނގަޅު: ޗައިނާ
ލިޔުންތެރިޔާ
ޝަފްރާޒް އަހްމަދު
ސިނަމާލެ ބްރިޖަށް ދިވެހިންގެ ފަރާތުން އެކަށީގެންވާ މިންވަރުގެ ރަނގަޅު ތަރުހީބެއް ލިބެމުންދާކަމަށް ޗައިނާގެ ސަރުކާރުން ބުނެފިއެވެ.
ޗައިނާ ސަރުކާރުގެ ފަރާތުން މިހެން ބުނެފައިވަނީ ޗައިނާގެ ޚާރިޖިއްޔާއިން ބާއްވާ ނޫސްވެރިންގެ ބައްދަލުވުމުގައި އިއްޔެ ވާހަކަފުޅު ދައްކަވަމުން އެގައުމުގެ ޚާރިޖިއްޔާގެ ތަރުޖަމާނު ހުއާ ޗިންގްޔުންގްއެވެ.
އެކަމަނާ ވިދާޅުވީ ރާއްޖޭގެ ފޮރިން މިނިސްޓަރ އަބްދުﷲ ޝާހިދު ރާއްޖެއާއި ޗައިނާގެ ގުޅުމާއި ބެލްޓް އެންޑް ސިލްކް އިނީޝިއޭޓިވްއާއި ގުޅޭގޮތުން ދެއްކެވި ވާހަކަތަކާއި މެދު ވަރަށް ބޮޑަށް އުފާފުޅުކުރައްވާކަމަށެވެ. އަދި އެއީ ރާއްޖޭގެ ސަރުކާރުން ޗައިނާއާއި މެދު ދެކޭ ރަނގަޅު ގުޅުންތަކުގެ ހެޔޮފާލެއްގެ ގޮތުގައިވެސް އެކަމަނާ ވަނީ ސިފަކުރައްވާފައެވެ.
ހުއާ ޗިންގްޔުންގް ވަނީ ފާއިތުވެދިޔަ އަހަރުތަކުގެ ތެރޭގައި ދެގައުމުން ގުޅިގެން ރާއްޖޭގެ އުމްރާނީ ތަރައްގީއާއި އާންމު ފަރުދުންގެ ދިރިއުޅުމުގެ ހާލަތު ރަނގަޅުކުރުމަށްޓަކައި ވަރަށް ބައިވަރު މަޝްރޫއުތައް ހިންގާފައިވާކަން ފާހަގަކޮށްފައެވެ. އެގޮތުން އެކަމަނާ ވަނީ ސިނަމާލެ ބްރިޖްގެ ވާހަކަ ފާހަގަކުރައްވައި، އޭގެ ސަބަބުން ގައުމުގެ އުމްރާނީ ތަރައްގީއަށް ކުރިއެރުންލިބި އާންމު ދަތުރުފަތުރަށް ފަސޭހަތަކެއް ލިބިފައިވާކަމަށް ވިދާޅުވެފައެވެ.
އެކަމަނާ އިތުރަށްވަނީ ދޭދޭ ގައުމުގެ ގުޅުންތައް ބަދަހިކުރުމަށް ކުރެވެން ހުރި މަސައްކަތްތައް ކުރާނެކަމަށް ބުނެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
