ލަކުސަނަ 2024: ގިނަ ހަދިޔާ ތަކާއެކު، ޕެބްލްސް އާއިލީ ހަވީރު މިއަދު!

ޕީސް ފައުންޑޭޝަނުން ހިންގާ ދީނީ އަދި އިޖްތިމާޢީ ހަރަކާތްތަކުގެ "ލަކުސަނަ" ޕްރޮގްރާމްގެ ތެރެއިން، މިފަހަރު ތ.ވިލުފުށީގައި ބާއްވާ އެންމެ ބޮޑު އެއްހަރަކާތް، އާއިލީ ހަވީރު މިއަދު ބާއްވަން ތައްޔާރުވެއްޖެއެވެ.

ޕީސް ފައުންޑޭޝަނުން ބުނީ، މި ހަވީރު އޮންނާނީ ވިލުފުށީ ކައުންސިލް ފުރަގަހުގައި އޮންނަ ހުސް ބިމުގައި، މިއަދު ހަވީރު 16:00 އިން 18:00 އަށް ކަމަށެވެ.

މި ހަވީރުގައި، ކުޑަކުދިންނަށް ގިނަ ހަދިޔާ ތަކެއް ދެވިގެންދާއިރު އެކުދިންނަށް މަދަހަ ކިޔުމާއި އެފަދަ ހުނަރު ދައްކައިގެންވެސް ހަދިޔާ ހޯދުމުގެ ފުރުސަތު އޮންނާނެ ކަމަށް ޕީސްފައުންޑޭޝަނުން ބުނެއެވެ. އަދި ހަމަ އެހެންމެ، ހަވީރުގައި ގިނަ ސްޓޯލްތަކެއް ބެހެއްޓިފައި ހުންނާނެ ކަމަށާ، ހަވީރު ހުށަހަޅައިދިނުމުގައި އިސްކޮށް ހަރަކާތްތެރިވާނީ ރީތި މަދަހަތަކެއް ކިޔުއްވާފައިވާ މޫސާ ޝިފާއު (ޝިފާއުބެ) ކަމަށެވެ.

އެހެންކަމުން ކުދި ބޮޑު އެންމެން ހަވީރުގައި ބައިވެރިވުމަށް ޕީސްފައުންޑޭޝަނުން އެދެއެވެ.

ލަކުސަނަ އަކީ 4 ދުވަހުގެ މުއްދަތަށް ކުރިއަށްދާ، އެއް ރަށަކަށް ޚާއްޞަކޮށްގެން އެ ރަށުގެ މުޅި މުޖުތަމަޢުއަށް ފައިދާކުރާނެ ގޮތަށް ފަރުމާކުރެވިފައިވާ ޕްރޮގްރާމެކެވެ. މި ޕްރޮގްރާމްގައި ރަށުގެ ކުދި ބޮޑު އެންމެންނަށް ޚާއްޞަ ހަރަކާތްތައް ހިމެނެއެވެ.

ޕީސް ފައުންޑޭޝަނުން “ވޮއިސް” އަށް މައުލޫމާތު ދީފައިވާ ގޮތުގައި މި ޕްރޮގްރާމް މިފަހަރު ތ. ވިލުފުށީގައި ބާއްވަން ހަމަޖެހިފައިވަނީ ޖުލައި 31 އިން އޮގަސްޓް 3 އަށެވެ. އަދި މި ޕްރޮގްރާމް ކުރިއަށް ގެންދަނީ ވިލުފުށީ ހެޔޮބަސް ޖަމިއްޔާއާއި ގުޅިގެން ކަމަށާ، ޕްރޮގްރާމްގެ ހޯސްޓިންގ ޕާޓްނަރަކީ ރަށު ކައުންސިލް ކަމަށް ޕީސް ފައުންޑޭޝަނުން މައުލޫމާތު ދެއެވެ.

ޕީސް ފައުންޑޭޝަނުން އިތުރަށް ބުނީ، މި ޕްރޮގްރާމްގައި ދީނީ އަދި އިޖްތިމާޢީ އެކި އެކި ހަރަކާތްތައް ކުރިއަށްދާނެ ކަމަށެވެ. އެގޮތުން، ނަމާދާ ގުޅޭ ވޯކްޝޮޕްތަކާއި، ޢަޤީދާގެ ވޯކްޝޮޕްތަކުގެ އިތުރުން، ބޮޑެތި މީހުންނަށް ޚާއްޞަ ވޯކްޝޮޕްތަކާއި ކުޑަކުދިންނަށް ޚާއްޞަ ވޯކްޝޮޕްތައް ވެސް ހިމެނޭކަން ފާހަގަކޮށްފައިވެއެވެ.

އަދި މުއައްސަސާތަކުގެ ވެރިންނަށް ބާއްވާ 'ނަމޫނާ ވެރިން'، މުދައްރިސުންނަށް ބާއްވާ 'ނަމޫނާ މުދައްރިސް'، މަންމައިންނާއި ބައްޕައިންނަށް ވަކިން ބާއްވާ ދަރިން ތަރުބިއްޔަތު ކުރުމާ ގުޅޭ ވޯކްޝޮޕް، ސްކޫލް ސީނިއަރ ގްރޭޑްތަކަށް ބާއްވާ 'ފުރާވުނަ' ޕްރޮގްރާމްވެސް ހިމެނޭ ކަމަށް އެ ޖަމިއްޔާއިން ބުނެފައިވެއެވެ. މިނޫންވެސް އެހެނިހެން ގިނަ ހަރަކާތްތަކެއް ޕްރޮގްރާމްގެ ތެރެއިން އަންނަނީ ކުރިއަށް ގެންދަމުންނެވެ.

ތ. ވިލުފުށީގައި މިފަހަރު ބާއްވާ ލަކުސަނަ ޕްރޮގްރާމަކީ މީގެ 4 ވަނަ ޕްރޮގްރާމެވެ. މީގެ ކުރިން މި ޕްރޮގްރާމް ހިންގާފައިވަނީ ރ. މީދޫ، ދ. ކުޑަހުވަދޫ އަދި ތ. ގުރައިދޫގައެވެ.