މަޖިލިސް ޗުއްޓީގައި އޮތަސް ސަރުކާރަށް މުހިއްމުވާ ހާލަތްތަކުގައި ޖަލްސާ ބާއްވާނަން: އަދުރޭ
މަޖިލީސް ޗުއްޓީއަށް ދިޔަނަމަވެސް ސަރުކާރަށް މުހިއްމުވާ ހާލަތްތަކުގައި ޖަލްސާތައް ކުރިއަށްގެންދާނޭކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
ޕީއެންސީން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ރައްޔިތުން މަޖިލީހުގެ ރައީސްކަމުގެ އިތުރުން ޕީއެންސީގެ ޗެއާޕާސަންގެ މަގާމުވެސް ފުރުއްވަމުން ގެންދަވާ އަބްދުއްރަހީމް އަބްދުﷲ (އަދުރޭ) ވިދާޅުވީ، މަޖިލިސް ޗުއްޓީއަށް ދިޔަނަމަވެސް ސަރުކާރަށް މުހިއްމުވެގެންދާ ހާލަތްތަކުގައި ޖަލްސާ ބާއްވާނޭ ކަމަށެވެ.
އަދުރޭ ވިދާޅުވީ، ރައްޔިތުންގެ މަޖލީހުގެ އިންތިހާބުގައި ރައްޔިތުން މި ސަރުކާރަށް މިހާ ބޮޑު އަގުލަބިއްޔަތެއް ދެއްވީ މަޖިލީހުގެ ތެރެއިން ސަރުކާރަށް އެއްބާރުލުން ދިނުމަށް ކަމަށެވެ. އެހެންކަމުން ރައްޔިތުން ދިން ވޯޓާ އެއްގޮތަށް ސަރުކާރުން ބޭނުންވާ ކަންކަމުގައި މަޖިލީހުގެ އެއްބާރުލުން ފުރިހަމަޔަށް ލިބޭނޭކަން އަދުރޭ ފާހަގަކުރެއްވިއެވެ.
ރައްޔިތުން މަޖިލީހުގެ ވަރަށް ތަނަވަސް އަގުލަބިއްޔަތެއް މިއަދުގެ ސަރުކާރަށް ރައްޔިތުން ދެއްވީ. ސަރުކާރު ހިންގަން ބޭނުންވާ ހުރިހާކަމެއް ރައްޔިތުންގެ މަޖިލީހުގެ ތެރެއިން ކުރަންޖެހޭ ކަންތައްތައް ސަރުކާރަށް ދަތިނުވާގޮތަށް ކޮށްދިނުމުގެ ބޭނުމުގައި ރައްޔިތުން އެ ފުރުސަތު ދެއްވީ.
އަބްދުއްރަހީމް އަބްދުﷲ (އަދުރޭ) ވިދާޅުވިއެވެ.
އަދުރޭ ވިދާޅުވީ، އެކަން އެގޮތަށް އޮތުމުން މަޖިލީސް ޗުއްޓީގަ އޮތަސް ސަރުކާރަށް މުހިއްމު ކަމެއް ދިމާވެއްޖެއްޔާ މަޖިލީހުގެ ދައުރުންބޭނުން ޖަލްސާ ބާއްވައިގެން ސަރުކާރުން އެދޭ ކަންކަން މަޖިލީހުގެ ތެރެއިން ކޮށްދޭނޭ ކަމަށެވެ. ސަރުކާރުން ތައްޔާރުވިހާ އަވަހަކަށް ރައްޔިތުންގެ މަޖިލީހުގެ ޖަލްސާތައް ކުރިއަށްގެންދަވާނޭކަމަށް އަދުރޭ ވިދާޅުވިއެވެ
އަދުރޭ އިތުރަށް ވިދާޅުވީ، ސަރުކާރަށް އާމްދަނީ ހޯދުމަށާއި ރައްޔިތުންނަށް ހިދުމަތް ފޯރުޮށްދިނުމަށްޓަކައި ބޭނުންވާ ކަންކަން ކުރުމަށްޓަކައި ދައުރު ނިމެންދެން ރައްޔިތުންގެ މަޖިލީސް ނޯންނާނޭ ކަމަށެވެ.
ރައީސް ޑރ.މުހައްމަދު މުއިއްޒު ވިދާޅުވެފައިވަނީ މި ސަރުކާރުގެ ވައުދުތައް ފުއްދެވުމަށް 200 އަށް ވުރެ ގިނަ އިސްލާހާއި އާބިލްތަކު އިތުރުން ޤާނޫނުތަކަށް ބަދަލުގެންނަން ޖެހޭ ކަމަށެވެ. އަދި އެކަމަށް ރައްޔިތުންގެ މަޖިލީހުގެ އެހީތެރިކަން ވަރަށްބޮޑަށް ބޭނުންވާކަމަށްވެސް ރައީސް ޑރ.މުއިއްޒު ވަނީ ވިދާޅުވެފައެވެ.
މިހާރު ރައްޔިތުންގެ މަޖިލީހުގައި ސަރުކާރު ހިންގާ ޕީއެންސީއަށް ނިސްބަތްވާ 75 މެމްބަރުން ތިއްބަވައެވެ. ރައްޔިތުން މަޖިލީހުގެ 19 ވަނަ ދައުރު ނިންމަވާލެއްވުމަށްފަހު އިއްޒަތްތެރި މެމްބަރުން ވަނީ ޗުއްޓީއަށް ވަޑައިގަންނަވާފައެވެ. މިއީ 20 ވަނަ މަޖިލީހަށް ނިސްބަތްވާ މެމްބަރުން ޗުއްޓީއަށް ދިއަ ފުރަތަމަ ފަހަރެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
