މިނިމަމްވޭޖު ރިވިޔު ކުރުމަށް ދިރާސާއެއް ދަނީ ކުރިއަށް، ޑިސެމްބަރުގެ ނިޔަލަށް އެކަން ނިމޭނެ: ޑރ.ހައިދަރު

މިނިމަމްވޭޖު ރިވިޔު ކޮށް، އައު މިނިވަމްވޭޖެއް ކަނޑައެޅުމަށް ދިރާސާތަކެއް ކުރަމުންދާ ކަމަށާ، އެ ދިރާސާތައް ޑިސެމްބަރު މަހުގެ ނިޔަލަށް ނިންމާލެވޭނެ ކަމަށް، މަތީތަޢުލީމާއި، މަސައްކަތްތެރިކަމާ ބެހޭ ވުޒާރާގެ ވަޒީރު ޑރ.ޢަލީ ހައިދަރު އަޙްމަދު ވިދާޅުވެއްޖެއެވެ.

ވަޒީފާއާ ބެހޭ ގާނޫނުގެ ދަށުން، މިނިމަމްވޭޖަކީ ކޮންމެ ދެ އަހަރަކުން މުރާޖަޢާކުރަންޖެހޭ އެއްޗެކެވެ. އެގޮތުން އެންމެ ފަހުން މިނިމަމްވޭޖު މުރާޖަޢާ ކޮށްފައިވަނީ 2022 ވަނަ އަހަރު ކަމަށްވާއިރު، އެފަހުން މުރާޖަޢާ ކޮށްފައެއް ނުވެއެވެ.

އެކަމާއި ގުޅިގެން މަޖިލީހުގެ މިއަދުގެ ޖަލްސާގައި ކެންދޫ ދާއިރާގެ މެންބަރު މަޢުރޫފް ޒާކިރު ވަނީ، މިނިމަމްވޭޖު ކަނޑައެޅުން ލަސްވާ ސަބަބާއި އެ ކަނޑައެޅޭނެ ތާރީޚެއް ސާފުކޮށްދެއްވުންއެދި ވަޒީރު ހައިދަރުއާ ސުވާލު ކުރައްވާފައެވެ.

އެ ސުވާލަށް ޖަވާބުދެއްވަމުން ވަޒީރު ހައިދަރު ވިދާޅުވީ، ފުރަތަމަ މިނިމަމްވޭޖު ކަނޑައަޅާފައިވަނީ 8 ނޮވެމްބަރު 2021 ގައި ކަމަށެވެ. އެހެން ކަމުން، ދެން އެކަން ކުރަން ޖެހޭނީ 2023 ވަނަ އަހަރުގެ އެދުވަހުގައި ކަމަށާ، މިދިޔަ ސަރުކާރު ނިމުނު އިރު އޮތީ އެކަން ނުކޮށް ކަމަށް ހައިދަރު ވިދާޅުވިއެވެ.

ވުމާއެކު، މި ސަރުކާރު އައިފަހުން އެ މަސައްކަތް ފެށުމަށް މިނިމަމްވޭޖުގެ ބޯޑު އެކުލަވާލުމުގެ މަސައްކަތްފަށައި، ޖުލައި 3، 2024 ގައި އައު ބޯޑެއް އެކުލަވާލެވުނު ކަމަށް ހައިދަރު ވިދާޅުވިއެވެ. އަދި ބޯޑު ބައްދަލުވުން ބާއްވައި މެމްބަރުންގެ މަޝްވަރާއާއި އެއްގޮތަށް ކުރީގެ ބޯޑުގެ ލިޔެކިޔުންތައް އައުބޯޑާ ހިއްސާ ކުރުމަށް ވަގުތު ނެގިކަން ހައިދަރު ފާހަގަކުރެއްވިއެވެ.

އޭރު މިނިމަމްވޭޖުގެ ކަންކަމުގެ މަޝްޣޫލުވެއުޅުނު ގިނަ ޓެކްނިކަލް މުވައްޒަފުން އެކިއެކި ސަބަބުތަކާއިހުރެ ވަނީ މަސައްކަތާ ދުރަށް ގޮސްފައި. އެހެންކަމުން މިފަދަ މަސައްކަތަށް ބޭނުންވާ ޓެކްނިކަލް ތަޖުރިބާއާ، އެހީތެރިކަން ލިބުމުގައި ދަތިތަކެއް ހުރިކަން ފާހަގަކޮށްލަން.

އެހެންކަމުން އައު މިނިމަމްވޭޖު ބޯޑުގެ ޗެއާމަނާއި، އިންޓަނޭޝަނަލް ލޭބާ އޮގަނައިޒޭޝަން(އައިއެލްއޯ)އާ ގުޅިގެން ފަންނީ އެހީ ހޯދުމުގެ މަސައްކަތް މިދިޔަަ އަހަރު ކުރިއަށް ގެންގޮސްފައިވާ ކަމަށާ، އައިއެލްއޯއިން ލަފާދީފައިވަނީ ދެ ފިޔަވަށްސަކަށް ބަހާލައިގެން މިނިމަމްވޭޖު ކަނޑައެޅުމުގެ ކަންކަން ކުރިއަށް ގެންދާން ކަމަށް ވަޒީރު ވިދާޅުވިއެވެ.

"މިނިމަމްވޭޖު ކަނޑައެޅުންފަދަ ޚައްސާސް ކަންތަކުގައި ރިޢާޔަތްކުރަންޖެހޭ ވަރަށް ގިނަ ކަންކަން ހުންނާނެ. އަދި ކަނޑައެޅޭ މިނިމަމްވޭޖަކީ އޭގެ ބުރަ އިގްތިޞާދަށާ މަސައްކަތްތެރިންނަށާ މަސައްކަތްތެރި ކަމަށް، ނުކުރާނެ ގޮތަށް ކަނޑައެޅުމުގެ ޒިންމާ ދައުލަތުގެ މައްޗަށް އޮތް އިރު، ވަރަށް ވިސްނުންތެރިކަމާއި ހިކުމަތްތެރިކަމާއެކު އަދި ދިރާސާގެ މައްޗަށް ބިނާކޮށް ކަނޑައަޅަންޖެހޭ އެއްޗެއް މިނިމަމް ވޭޖަކީ. މި މަސައްކަތްކުރަނީ އަޅުގަނޑުމެންގެ ދިރާސާގެ މަސައްކަތް މި އަހަރުގެ ޑިސެންބަރުގެ ނިޔަލަށް ނިންމާލެވޭތޯ،" މިނިސްޓަރު ހައިދަރު ވިދާޅުވިއެވެ.

2021 ވަނަ އަހަރު މިނިމަމް ވޭޖު އިއުލާން ކުރިއިރު ކަނޑައަޅައިފައިވަނީ ހަތަރު ދާއިރާއަކަށެވެ. އެއީ؛

ކުދި ވިޔަފާރިތަކަށް މަހަކު 4,500 ރުފިޔާ،

މެދު ފަންތީގެ ވިޔަފާރިތަކަށް މަހަކު 7,000 ރުފިޔާ،

ބޮޑެތި ވިޔަފާރިތަކަށް މަހަކު 8,000 ރުފިޔާ

ސިވިލް ސާވިސް (ޕަބްލިކް ސެކްޓާ)އަށް މަހަކު 7,000 ރުފިޔާ