ރަސްމާލޭގެ 50 އިންސައްތަ އަށްވުރެ ބޮޑު ބައެއް މިހާރު ވަނީ ހިއްކިފަ: މުއްތަލިބު

ރަސްމާލޭގެ 50 އިންސައްތަ އަށްވުރެ ބޮޑު ބައެއް މިހާރު ހިކިފާވާ ކަމަށް މިނިސްޓަރ އޮފް އިންފްރާސްޓްރަކްޗަރ، ހައުސިންގ އެންޑް އަރބަން ޑިވެލޮޕްމަންޓް، އަބްދުﷲ މުއްތަލިބު ވިދާޅުވެއްޖެއެވެ.

މިނިސްޓަރު މިހެން ވިދާޅުވެފައިވަނީ، މިއަދު އެ މިނިސްޓްރީން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުންނެވެ.

ރަސްމާލެ މަޝްރޫއުގެ 50 އިންސައްތަ އަށްވުރެ ބޮޑު ބައެއް މިހާރު ވަނީ ހިއްކިފަ. އެއީ 504 ހެކްޓަރު. އެއީ ނިސްބަތުން ބަލާނަމަ ހުޅުމާލޭގެ 2 ފޭސް އެއްކޮށްލީމަ އެވަރުގެ ބިމެއް ގާތްގަނޑަކަށް ހިކިފަ އެ އޮތީ. ބާކީ ބައި އިރާދަކުރެއްވިއްޔާމުން ހިއްކުމުގެ މަސައްކަތް ކުރިއަށް އެބަދޭ.

މިނިސްޓަރު ވިދާޅުވިއެވެ.

މީގެ އިތުރުން، މިނިސްޓަރު ވިދާޅުވިގޮތުގައި، މެދުއިރުމަތީގައި ހިނގަމުންދާ ހަނގުރާމައާއި ގުޅިގެން ތެލުގެ އަގު ބޮޑުވުމާއި އިމާރަތްކުރުމަށް ބޭނުންވާ ބައެއް ތަކެތި ލިބުމުގައި ދަތިތަކެއް ހުރުމުގެ ސަބަބުން ރަސްމާލޭ މަޝްރޫއުގެ ޓައިމްލައިނަށް ވެސް އަސަރުކުރާނެ ކަމަށެވެ.

ރަސްމާލޭ މަޝްރޫއު އަކީ ރައީސް ޑރ. މުޙައްމަދު މުޢިއްޒު ރިޔާސަތަށް އައުމުގެ ފަހުން، ރާއްޖޭގެ ބޯހިޔާވަހިކަމުގެ މައްސަލައަށް ހައްލެއް ގެނައުމުގެ ގޮތުން ފަށާފައިވާ މަޝްރޫއުއެކެވެ. މި ސަރަހައްދުގައި ސަރުކާރުގެ "ބޯހިޔާވެހިކަން އެންމެންނަށް" ސިޔާސަތުގެ ދަށުން ބިމާއި ފްލެޓްތައް ދޫކުރެވޭނެއެވެ.