ކައުބަތުالله ގެފުޅު ހިފައި މުސްލިމުންނާ ދެކޮޅަށް ނުކުތުމަށް ހިންދޫ ފާދިރީއެއް ގޮވާލައިފި
މުސްލިމުންގެ އެންމެ މުގައްދަސް ބިނާ ކަމުގައިވާ މާތްވެގެންވާ ކަޢުބަތު الله ގެފުޅަކީ ހިންދޫންގެ ފައްޅިއެއްހުރި ތަނެއް ކަމަށްބުނެ މައްކާ ހިޞާރުކޮށް، އަދި މުސްލިމުންނާއި ދެކޮޅަށް ނުކުތުމަށް އިންޑިއާގެ ހިންދޫންގެ ހަރުކަށި ފާދިރީއަކު ގޮވާލައިފިއެވެ.
މިފަދައިން ގޮވާލާފައިވަނީ އިންޑިއާގެ އުއްތަރަ ޕްރަދޭޝްގައި ހުންނަ ހިންދޫންގެ ދަޝްނާ ދޭވީ ފައްޅީގެ އިސް ފާދިރީއެއް ކަމުގައިވާ ޔަތީ ނަރަސިންގއާނަންދު ސަރަސްވަތީއެވެ.
ހިންދޫންގެ ބޮޑު އެއްވުމެއްގައި ވާހަކަ ދައްކަމުން ޔަތީ ނަރަސިންގއާނަންދު ވަނީ މައްކާގައި ހުރި ކަޢުބަތުالله ގެފުޅަކީ ކުރިން ހިންދޫންގެ މުގައްދަސް ފައްޅިއެއް ހުރި ތަނެއް ކަމަށް ބުނެ ދޮގު ހަދާފައެވެ.
"ހިންދު ކަރަ ފަތަހަ ކުރުމަކީ ހުވަފެނެއް. އަހަރުމެން ހިފަންޖެހޭނީ ހަމައެކަނި އަފްޣާނިސްތާން އެއް ނޫން. މައްކާވެސް ހިފަންޖެހޭ. ގަންގާ ކޯރުގެ ފެން އެތަނުގައި (މައްކާގައި) ޒަމްޒަމް ފެނުގެ ގޮތުގައި ދައުރުވަމުން އެދަނީ." ޔަތީ ނަރަސިންގއާނަންދު ބުނެފައިވެއެވެ.
މީގެ އިތުރުން އޭނާ ބުނީ މިއީ މުޅިދުނިޔެ މުސްލިމުންނާ އަދި އިސްލާމްދީނާއި ދެކޮޅަށް އެއްބައިވާންވީ ވަގުތު ކަމަށާއި ހިންދުކަރަ އެއްކޮށް ހިފުމަކީ ހިންދޫންގެ ލީޑަރު ވީރްޝަވަރްކަރް އަދި ސިވާޖީގެ ހުވަފެނެއްކަމަށް ބުނެ، އޭނާ ވަނީ ހުރިހާ ހިންދޫއިންވެސް އެ ހުވަފެން ދެކެން ޖެހޭ ކަމަށް ބުނެފައެވެ.
ޔަތީ ނަރަސިންގއާނަންދު އަކީ އިންޑިޔާގެ ބީޖޭޕީގެ އިސް ލީޑަރެއް ކަމުގައިވާ ކަޕިލް ޝަރުމާއާއި ގާތް ގުޅުމެއް އޮންނަ މީހެކެވެ. އެ ފާދިރީ އަކީ މީގެ ކުރިންވެސް މުސްލިމުންނާއި ދެކޮޅަށް އަނިޔާވެރި ޢަމަލުތައް ކުރުމަށް ގޮވާލައި ނަފްރަތު އުފައްދައި ވާހަކަ ދައްކާފައިވާ މީހެކެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
