ހިރިމަރަދޫ މީހުން ހަނިމާދޫއަށް ބަދަލުކުރުމަށް ނިންމައިފި

ހދ.ހިރިމަރަދޫ މީހުން އެއަތޮޅު ހަނިމާދޫއަށް ބަދަލުކުރުމަށް ސަރުކާރުން ނިންމައިފިއެވެ.

ހިރިމަރަދޫ ކައުންސިލުން ސަރުކާރުގައި އެދިފައިވަނީ ކ.ތުލުސްދޫއަށް ބަދަލުވުމަށެވެ. ނަމަވެސް ސަރުކާރުން މިހާރު ނިންމާފައިވަނީ އެރަށުގެ މީހުން ހަނިމާދޫއަށް ބަދަލުކުރުމަށެވެ. މިކަން ރައީސުލްޖުމްހޫރިއްޔާ އޮފީހުގެ ތަރުޖަމާނު ހީނާ ވަލީދުވެސް ވަނީ ކަށަވަރުކޮށްދެއްވާފައެވެ. އެކްސްގައި ހީނާކުރެއްވި ޕޯސްޓެއްގައި ވިދާޅުވީ، ހދ. ހިރިމަރަދޫ ރައްޔިތުން އެދިވަޑައިގަތްގޮތަށް، އެރަށު ރައްޔިތުން ހދ. ހަނިމާދޫއަށް ބަދަލުކުރުމަށް ސަރުކާރުން ނިންމަވާފައިވާކަމަށެވެ.

ނަމަވެސް އެކަމުގެ އިތުރު ތަފްސީލެއް ތަރުޖަމާނު ހާމައެއް ނުކުރައްވައެވެ.

މިދިޔަ އޮކްޓޯބަރުމަހުގެ ތެރޭގައިވެސް ހިރިމަރަދޫ ކައުންސިލުން ވަނީ އެރަށުގެ މީހުން ތުލުސްދޫއަށް ބަދަލުކޮށްދިނުމަށް އެދިފައެވެ. އަދި ތުލުސްދޫ ކައުންސިލުން ވަނީ އެކަމަށް މަރުހަބާ ކިޔާކަން ހާމަކޮށްފައެވެ. ހިރިމަރަދޫގެ އާބާދީއަކީ ގާތްގަނޑަކަށް 590 އެވެ. ނަމަވެސް އެރަށުގައި ދިރިއުޅެމުންދަނީ އާބާދީގެ ނިސްބަތުން މަދުބައެކެވެ. އެއީ ގާތްގަނޑަކަށް 293 މީހުންނެވެ. ހިރިމަރަދޫއަކީ ލަފާފުރުމަށްވެސް ދަތި ރަށެކެވެ. ސަބަބަކަށްވަނީ ރަށުގެ ނެރު ތިލަވުމެވެ.

އުތުރުގެ ރަށްތަކުގެ ތެރެއިން ހދ.ހަނިމާދޫއަކީ މިހާރު ކުރިމަގުގެ ތަރައްޤީގައި އެންމެބޮޑު ކުރިއެރުމެއް އަންނާނޭކަމަށް ބެލެވޭ އެއް ރަށެވެ. ހަނިމާދޫ އިންޓަރނޭޝަނަލް އެއާޕޯޓް ތަރައްޤީގެ މަޝްރޫޢުއާއެކު އެ ރަށުގެ އިތުރުން ސަރަހައްދަށްވެސް ބޮޑު ކުރިއެރުންތަކެއް ލިބޭނޭކަމަށް ސަރުކާރުން ދެކެއެވެ.