ފޮނުވާ މައުލޫމާތު ގޯސްވުމުން ދަރިވަރުންނަށް ފައިސާ ފޮނުވުމުގައި ލަސްތަކެއްވޭ: ހައިދަރު
ފައިސާ ޖަމާކުރަން ފޮނުވާ މައުލޫމާތު ސައްހަނުވުމުގެ މައްސަލައަކީ ދަރިވަރުންނަށް ފައިސާ ލިބުން ލަސްވާ އެންމެބޮޑު އެއް ސަބަބުކަމަށް ހަޔާ އެޑިއުކޭޝަން މިނިސްޓަރު ޑރ. އަލީ ހައިދަރު ވިދާޅުވެއްޖެއެވެ.
ތަރުޖަމާނާއެކު ޕޮޑްކާސްޓް ޝޯގައި ވާހަކަދައްކަވަމުން ހަޔާ އެޑިއުކޭޝަން މިނިސްޓަރު މިއަދު ވަނީ ދަރިވަރުންނަށް ފައިސާ ފޮނުވުމުގައި ލަސްވާ ސަބަބުތައް ހިއްސާކުރައްވާފައެވެ. ވަޒީރު ވިދާޅުވީ، ދަރިވަރުންނަށް ފައިސާ ދޫކުރުމުގައި މިނިސްޓްރީން އަމަލުކުރަމުންދާ އުސޫލްތަކެއް އޮންނަ ކަމަށާއި، އެގޮތުން މަިއގަނޑު ދެ ކަމެއް ޔަގީންކުރާކަމަށެވެ. އެއްކަމެއްގެ ގޮތުން އެކުއްޖާ ކިޔަވަންދިޔަ އިންސްޓިޓިއުޓްގަ ކިޔަވަމުން ގެންދޭތޯ ބަލާކަމަށައި، އަދި އަނެއް ކަމެއްގެ ގޮތުން ފައިސާ ޖަމާކުރުމަށް އެ ދަރިވަރަކު ފޮނުވާ މައުލޫމާތުގެ ސައްހަކަން ޔަގީންކުރާކަމަށެވެ.
ވަޒީރު ވިދާޅުވީ ފައިސާ ފޮނުވުމަށް ދެ މަސްދުވަހުގެ މުއްދަތެއް އޮންނައިރު، ދަރިވަރު ފޮނުވާ މައުލޫމާތުގެ ސައްހަކަން ކަށަވަރު ނުވުމުގެ ސަބަބުން އެކަންކަން ކަށަވަރުކުރަން ވަގުތު ނަގާކަމަށެވެ. ދަރިވަރުންނަށް ފައިސާ ލިބުން ލަސްވުމުގެ ޝަކުވާ އަންނަނީ އެހެންވުމުންކަމަށް ވަޒީރު ފާހަގަކުރެއްވިއެވެ.
ވަޒީރު ވިދާޅުވީ ބޭރުގައި ކިޔަވަންތިބޭ ކުދިންނަށް ފަސޭހަކުރުމުގެ ގޮތުން މިނިސްޓްރީން ފިޔަވަޅުތަކެއް އަޅަމުން އަންނަ ކަމަށެވެ. އެގޮތުން ސްޓައިޕެންޑް ރޭޓް 7 އަހަރަށްފަހު މުރާޖައާކުރުުގެ މަސައްކަތް ކުރިއަށްދާކަމަށެވެ. މިކަން މުރާޖައާކޮށް ނިންމުމަށްފަހު މިހާރު ހުރި މައްސަލަތަކަށް ހައްލު ލިބިގެންދާނޭކަން ވަޒީރު ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
