އިޒްރޭލުން ދަނީ މެދުއިރުމަތީގެ ހަމަޖެހުން ނަގާލަމުން: ޑރ. ހަލީލް

އިޒްރޭލުން ދަނީ މުޅި މެދުއިރުމަތީގެ ހަމަޖެހުމާއި ސުލްހަ ނަގާލަމުން ކަމަށާ، އިޒުރޭލުގެ އަނިޔާވެރިކަން ހައްދުން ނައްޓާފައިވާ ކަމަށް ފޮރިން މިނިސްޓަރ ޑރ. އަބްދުﷲ ހަލީލް ވިދާޅުވެއްޖެއެވެ.

ޑރ. ހަލީލް މިފަދައިން ވިދާޅުވެފައިވަނީ އެކްސްގައި ކުރެއްވި ޕޯސްޓެއްގައެވެ.

ފާހަގަކޮށްލަންޖެހޭ ގޮތުގައި ޑރ. ހަލީލް ވަނީ އޯގަނައިޒޭޝަން ފޯ އިސްލާމިކް ކޯޕަރޭޝަން (އޯއައިސީ) ގެ 51 ވަަނަ ބައްދަލުވުމުގައި ބައިވެރިވެވަޑައިގެން އިސްލާމީ އުއްމަތަށް ދިމާވެފައިވާ ގޮންޖެހުންތަކަށް އަދި ހާއްސަކޮށް ފަލަސްޠީނުގެ ރައްޔިތުންނަށް ކުރިމަތިވެފައިވާ ދަތިތަކަށް ހައްލު ހޯދައިދިނުމަށް ވެސް މުޅި އިސްލާމީ އުންމަތް ގުޅިގެން މަސައްކަތްކުރުމަށް ގޮވާލައްވައިފައެވެ.

ފަލަސްޠީނާއި އިރާނަށް، އިޒުރޭލުން ދެމުންދާ ހަމަލާތަކުން ވެސް އިޒުރޭލުގެ އަނިޔާވެރިކަން ހައްދުން ނެއްޓިފައިވާ މިންވަރު ދޭހަވާ ކަމަށާއި އިޒުރޭލަކީ މުޅި މެދުއިރުމަތީގެ ސުލްހައާއި ހަމަޖެހުމަށް އޮތް ނުރައްކަލެއްކަމަށް ޑރ. ހަލީލް ވިދާޅުވިއެވެ.

ދިވެހިރާއްޖެެއިން އަބަދުވެސް ފަލަސްޠީނުގެ ހައްގުގައި ވަކާލާތުކުރާނޭކަމަށާ، ފަލަސްޠީނުގެ ދައުލަތަކީ މިނިވަން އަދި އިސްތިގްލާލީ ދައުލަތެއްގެ ގޮތުގައި ބަލައިގަތުމަކީ މެދުއިރުމަތީގައި ސުލްހައާއި އިންސާފު ގާއިމްކުރުމަށްޓަކައި އެޅިގެންދާނެ މުހިންމު ފިޔަވަޅެއް ކަމަށް ޑރ. ހަލީލް އިތުރަށް ވިދާޅުވިއެވެ.

ފާހަގަކޮށްލަންޖެހޭ ގޮތުގައި ދިވެހިރާއްޖެއިން އަބަދުވެސް ދަނީ ފަލަސްޠީނުގެ ޙައްގުގައި ވަކާލާތުކޮށް އަޑުއުފުލަމުންނެވެ. އަދި އިޒުރޭލުގެ އަނިޔާވެރިކަން ހުއްޓުވުމަށް ބައިނަލްއަގުވާމީ ދުނިޔޭގައިވެސް ދިވެހިރާއްޖެ އިން ދަނީ ވަކާލާތު ކުރަމުންނެވެ.