އީދު ފާހަގަކުރުމުގައި ހުރި ކަންބޮޑުވުންތަކާ އެކު އިލްމުވެރިން ސަގާފަތާ ބެހޭ ވަޒީރާ ބައްދަލުކުރައްވައިފި
އީދު ފާހަގަކުރުމުގައި ހުރި ކަންބޮޑުވުންތަކާ އެކު އިލްމުވެރިންގެ ގުޅުމުން ސަގާފަތާ ބެހޭ ވަޒީރު އާދަމް ނަސީރު އިބްރާހިމްއާ ބައްދަލު ކުރައްވައިފި އެވެ.
އިލްމުވެރީންގެ ގުޅުމުން ބުނީ މި ބައްދަލްވުމުގައި މުހިންމު ކަންތައްތަކަކާއި ގުޅޭގޮތުން މަޝްވަރާ ކޮށްފައިވާ ކަމަށެވެ.
އެގޮތުން އީދު ކުޅިވަރުތައް އިންތިޒާމު ކުރުމާއި ގުޅޭ ކަންކަމާއި، އެކަންކަން ދީނީ އިމުގެ ތެރެއިން ކުރިއަށް ގެންދިއުމުގެ މުހިންމުކަމާ ބެހޭގޮތުން ވަނީ މަޝްވަރާ ކޮށްފަ އެވެ. އަދި މިނިސްޓްރީގެ މަސައްކަތްތައް ކުރިއަށް ގެންދިއުމުގައި އިލްމުވެރިންގެ ފަރާތުން ކޮށްދެވިދާނެ ކަންކަމާއި ގުޅޭގޮތުން ވެސް ވަނީ މަޝްވަރާ ކޮށްފަ އެވެ.
މީގެ އިތުރުން ދިވެހި ގައުމިއްޔަތާއި ބަސް ހިމާޔަތްކޮށް އާލާކުރުމަށް އެ ވުޒާރާ އިން ކުރަމުން ގެންދަވާ މަސައްކަތްތަކާއި ދިވެހި ބަސް ރައްކާތެރި ކުރުމަށް ކުރެވިދާނެ ކަންކަމާ ގުޅޭގޮތުން ވެސް މަޝްވަރާކޮށްފައި ވެ އެވެ.
އަދި ތަރިކައާއި އާސާރީ ތަކެއްޗާއި ތަންތަން ހިމާޔަތް ކުރުމުގައި ބަލާ މިންގަނޑު ތަކާ ގުޅޭގޮތުން ވެސް މަޝްވަރާ ކޮށްފައިވާ ކަމަށް އިލްމުވެރީންގެ ގުޅުމުން ބުނެ އެވެ.
ރާއްޖޭގެ ވަރަށް ގިނަ ދީނީ އިލްމުވެރީންގެ ބައިވެރިވުމާއެކު އުފައްދާފައިވާ އިލްމުވެރީންގެ ގުޅުމުން ދަނީ ދިވެހީންގެ ދީނީ ހޭލުންތެރިކަމާއި އަދި މުޖްތަމައުގައި ހުރި ދީނާ ބީރައްޓެހި ކަންކަން އިސްލާހު ކުރުމަށް މަސައްކަތް ކުރަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
