ރާއްޖެއަށް 100 މިލިއަން ޑޮލަރުގެ ފެސިލިޓީއެއް ދިނުމަށް މެލޭޝިއާ ސަރުކާރުން އެއްބަސްވެއްޖެ

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އެދިފައިވާ 100 މިލިއަން ޑޮލަރުގެ ފައިނޭންޝަލް ފެސިލިޓީ ދިނުމަށް މެލޭޝިއާ ސަރުކާރުން އެއްބަސްވެފައިވާ ކަމަށް އެ ގައުމުގެ ބޮޑުވަޒީރު އަންވަރު އިބްރާހީމް މިއަދު ވިދާޅުވެއްޖެއެވެ.

މެލޭޝިއާގެ ބޮޑުވަޒީރު މިކަން ހާމަކުރެއްވީ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއެކު ރައީސް އޮފީހުގައި ބޭއްވެވި ރަސްމީ މަޝްވަރާތަކަށްފަހު މީޑިއާއަށް ދެއްވި ގުޅިފައިވާ ބަޔާނުގައެވެ.

މީޑިއާއަށް މައުލޫމާތު ދެއްވަމުން ބޮޑުވަޒީރު އަންވަރު އިބްރާހީމް ވިދާޅުވީ، ރާއްޖެއިން އެދުނު އެހީތެރިކަމާ ގުޅޭގޮތުން ރައީސް މުޢިއްޒު އެމަނިކުފާނަށް ސިޓީފުޅެއް ފޮނުއްވާފައިވާ ކަމަށެވެ. އަދި އެކަމަށް މެލޭޝިއާގެ ސެންޓްރަލް ބޭންކް، "ބޭންކް ނެގާރާ މެލޭޝިއާ" އިން އިޖާބަދިނުމަށް މަސައްކަތް ކުރަމުންދާ ކަމަށް ވިދާޅުވިއެވެ.

"އެމްއެމްއޭ އިން އެދުނު 100 މިލިއަން ޑޮލަރުގެ ފެސިލިޓީ ދިނުމަށް އަޅުގަނޑުމެން އުސޫލެއްގެ މަތިން މިވަނީ އެއްބަސްވެފައި. ނަމަވެސް، ދެ ގައުމުގެ މަރުކަޒީ ބޭންކުން މިކަމުގެ މެކޭނިޒަމާއި އުސޫލުތައް އެންމެ އަވަސް މުއްދަތެއްގެ ތެރޭގައި ހަމަޖައްސައި، އެއްބަސްވުން އަވަހަށް ނިންމުމަށް މަސައްކަތް ކުރަންޖެހޭ. މިއީ ދެގައުމުގެ ދެމެދުގައިވާ އިތުބާރާއި ގާތް ރަހުމަތްތެރިކަމުގެ މައްޗަށް ބިނާވެގެން ކުރެވޭ ކަމެއް،" އަންވަރު އިބްރާހީމް ވިދާޅުވިއެވެ.

މީގެއިތުރުން، ތަޢުލީމީ އަދި ޞިއްޙީ ދާއިރާއިން ދެ ގައުމުގެ ދެމެދުގައި އޮތް ގުޅުމަށް އަލިއަޅުއްވާލައްވަމުން ބޮޑުވަޒީރު ވިދާޅުވީ، މެލޭޝިއާގައި 2،000 އަށްވުރެ ގިނަ ދިވެހި ދަރިވަރުން ތަޢުލީމު ހާސިލުކުރަމުންދާ ކަމަށެވެ. މިއީ މެލޭޝިއާގެ ތަޢުލީމީ ނިޒާމަށް ދިވެހިން ކުރާ އިތުބާރު ހާމަކޮށްދޭ ކަމެއްކަން ފާހަގަކުރައްވައި، އެ ދަރިވަރުންނަށް ލުއިފަސޭހަތައް ހޯދައިދިނުމަށް މެލޭޝިއާ ސަރުކާރުން އިސްކަންދޭނެ ކަމަށް ވިދާޅުވިއެވެ.

ހަމައެއާއެކު، ކިޔަވާ ކުދިންނާއެކު އެ ގައުމަށްދާ ބެލެނިވެރިންނަށް ދިމާވާ އިދާރީ ދަތިތައް ހައްލުކޮށްދިނުމާ ގުޅޭގޮތުން ކަމާބެހޭ ފަރާތްތަކާއެކު މަޝްވަރާކުރައްވާނެ ކަމުގެ ޔަގީންކަން ވެސް މެލޭޝިއާގެ ބޮޑުވަޒީރު ވަނީ ދެއްވާފައެވެ.