ޕީޕީއެމް ކޮންގްރެސްއަށް ވާގޮތެއް މިއަދު މެންދުރުފަހު

ނިމިދިޔަ ސެޕްޓެމްބަރ މަހު 28 ގައި ބޭއްވުނު ޕީޕީއެމްގެ ކޮންގްރެސް ބަލައި ނުގަތުމަށް އިލެކްޝަންސް ކޮމިޝަނުން ނިންމި ނިންމުން ބާތިލް ކުރުމަށް އެޕާޓީއިން ހައިކޯޓަށް ހުށަހަޅާފައިވާ މައްސަލައިގެ ހުކުމް އިއްވުން މިއަދު 13:00 އަށް ހައިކޯޓުގައި ތާވަލްކޮށްފިއެވެ.

މިމައްސަލައިގައި ޕީޕީއެމްގެ ކޮންގްރެސް ބޭއްވުމުގަ އިޖްރާއުތަކެއް ހުރި ކަމަށް އިލެކްޝަން ކޮމިޝަނުން ބުނި ނަމަވެސް ޕީޕީއެމް އިން ވަނީ އެކަން ދޮގުކޮއްފައެވެ.

އަދި ކޮންގްރެސް ކުރިއަށްް ދިޔައީ އީސީގެ އޮބަޒާވަރުންގެ ހާޒިރުގާކަމަށާއި އެތަނުގައި އެއްވެސް މައްސަލައެއް ފާހަގަ ނުކުރައްވާ ފަހުން އިޖްރާއުތަކެއް ގޯސްކަމަށް އީސީއިން ވިދާޅުވީ ކަމަށެވެ.

މިއަދު ހުކުމް އިއްވޭ މިމައްސަލައާގުޅޭ ކޮންގްރެސްގައި ވަނީ މުހިންމު ނިންމުންތަކެއް ނިންމާފައެވެ. އޭގޭތެރޭގައި އެ ޕާޓީގެ މުޝްތަޝާރު ރައީސް އަބްދުﷲ ޔާމީން އެ ޕާޓީގެ ރައީސް ކަމަށް އިންތިހާބުކުރުމާއި ޑެޕިއުޓީ ލީޑަރުންގެ ގޮތުގައި، ރައީސް އޮފީހުގެ ލީގަލް އެފެއާޒް މިނިސްޓަރު އައިޝަތު އާޒިމާ ޝަކޫރާއި، ފޮނަދޫ ދާއިރާގެ މެންބަރު އަބްދުއްރަހީމް އަބްދުﷲ އަދި އިކޮނޮމިކް މިނިސްޓަރު މުހައްމަދު ސައީދު އައްޔަންކުރުން ހިމެނެއެވެ. އަދި އާ ކައުންސިލެއް ވެސް ޕީޕީއެމްއިން  މިކޮންގްރެސްގައި އެކުލަވާލިއެވެ.

ހައިކޯޓުން މިމަހުގެ 15 ވަނަ ދުވަހުވެސް ވަނީ މިމައްސަލައިގެ ހުކުމް އިއްވުމެއް ތާވަލްކުރުމަށްފަހު ކެންސަލް ކޮއްލާފައެވެ.

2016 ވަނަ އަހަރު ސިވިލް ކޯޓުންވަނީ ރައީސް އަބްދުﷲ ޔާމީންއާ ޕާޓީ ހަވާލުކޮށް ޕާޓީގެ ގައުމީ ޖަލްސާއެއް ނޫނީ ކޮންގްރެސް ރައީސް އަބްދުﷲ ޔާމީންގެ ބެލުމުގެ ދަށުން ބޭއްވުމަށް ހުކުމް ކޮއްފައެވެ.

ނަމަވެސް ވޭތުވެދިޔަ ދެ އަހަރުވެސް ކޮންގްރެސް އެއް ނުބާއްވާ އެންމެފަހުން ކޮންގްރެސްއެއް ބާއްވާފައިވަނީ މިދިޔަ ސެޕްޓެމްބަރު މަހުގެ ތެރޭގައެވެ.

ޕީޕީއެމްގެ ކޮންގްރެސް ބޭއްވިއިރު ޕީޕީއެމްގެ ލީޑަރޝިޕް ސައްޚަ ނޫންކަމަށް ބުނެ އެޕާޓީ ރައީސް މައުމޫނަށް ހަވާލްކޮއްދިނުމަށްއެދި ސިވިލް ކޯޓަށް އަމިއްލަ މެންބަރަކކު ހުށައަޅާފައިވަނިކޮއްނެވެ. މިމައްސަލަ މިހާރުވަނީ ސުޕްރީމް ކޯުން ހުއްޓުވާފައެވެ.