އެމްޑީޕީގެ ކޮމާންޑަރ ނިޔާވި ހަބަރަކީ ދޮގު ހަބަރެއް!
ލިޔުންތެރިޔާ
ޝަފްރާޒް އަހްމަދު
އެމްޑީޕީގެ މުޒާހަރާތަކުގައި 2012 ވަނަ އަހަރުން ފެށިގެން އިސްސަފުގައި ހަރަކާތްތެރިވަމުން އަންނަ އެޕާޓީގެ މަޝްހޫރު ކޮމާންޑަރ އާދަމް މޫސާ ނިޔާވެއްޖެކަމަށްބުނެ ފަތުރަމުންދަނީ ދޮގު ހަބަރެއްކަމަށް މައުލޫމާތު ލިބިއްޖެއެވެ.
ވޮއިސްއަށް މައުލޫމާތު ލިބިފައިވާގޮތުގައި އާދަމް މޫސާ ނިޔާވެފައިވާ ކަމަށް މައުލޫމާތު ފަތުރަމުންދާއިރު އޭނާ ވަނީ މީގެ ދުވަސްކޮޅެއް ކުރިން ފެށިގެން އައިޖީއެމްއެޗްގައި އެޑްމިޓްކޮށް، އައިސީޔޫގައި ފަރުވާދެމުންނެވެ. ނިޔާވެފައިވަނީ އޭނާ ހުރިތަނާއި ކައިރީގައި އޮތް އެހެންމީހެއްކަމަށް މައުލޫމާތު ލިބެއެވެ.
އާދަމް މޫސަ ނިޔާވި ވާހަކަ ދޮގުކޮށްފައިވަނީ ކުރީގެ މަޖިލިސް މެންބަރު އިބްރާހިމް ރަސީދު (ބޮންޑާ) އެވެ. އޭނާއަކީ އާދަމް މޫސަ ހާލު ދުވަހުން ދުވަހަށް ބަލަމުންއަންނަ ފަރާތެއްކަން ފާހަގަކޮށްލަން ޖެހެއެވެ.
އާދަމް މޫސާ އާންމުގޮތެއްގައި އެމްޑީޕީގެ މުޒާހަރާތަކުން ފެނިފައިވަނީ ޖެހިލުންކުޑަ، ކެރޭ ފަރާތެއްގެ ގޮތުގައެވެ. އާދަމްއަށް އެމްޑީޕީގެ ކޮމާންޑަރުގެ ލަގަބު އެރުވުނީ، ފުލުހުން އަދި ސިފައިންނަށް ކޮމާންޑަރުން ތިބޭފަދައިން އޭނާއަކީ އެމްޑީޕީގެ އެކްޓިވިސްޓުންނަށް ކޮމާންޑްކުރަން ހުންނަ ފަރާތަކަށް ވާތީއެވެ.
އާދަމްއަކީ އާންމުކޮށް މުޒާހަރާގައި ތިބޭ ފަރާތްތަކާއި އަމަން ބަލަހައްޓަން ތިބޭ ފުލުހުންވެސް ހެއްވާލާފަދަ މީހެއްގެ ގޮތުގައި ފާހަގަވެފައިވާ ފަރާތެކެވެ.
އާދަމް މޫސާ އަކީ ސެކިއުރިޓީ ފާމެއްގައި ސެކިއުރިޓީ ގާޑެއްގެ ވަޒީފާވެސް އަދާކުރާ ފަރާތެކެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
