މަސްޖިދުލް ޙަރާމްގެ މުއައްޛިން، ޝައިޚް އިބްރާހީމް އަލްމަދަނީ އަވަހާރަވެއްޖެ

މައްކާގެ މަސްޖިދުލް ޙަރާމްގެ މަޝްހޫރު މުއައްޛިން، ޝައިޚް އިބްރާހީމް އަލްމަދަނީ އަވަހާރަވެއްޖެއެވެ. ޝައިޚް އަވަހާރަވީ މިއަދު ހެނދުނުގެ ވަގުތެއްގައެވެ. އަވަހާރަވިީ އުމުރުން 48 އަހަރުގައެވެ.

މަދީނާއަށް އުފަންވެވަޑައިގެންނެވި ޝައިޚް އިބްރާހީމް އަލްމަދަނީ ބޮޑުފުޅުވެގެން އައީ ދީނީ މާޙައުލެއްގައެވެ. ޚާއްޞަކޮށް ޤުރުއާން ހިތުދަސް ބޭފުޅެއް ކަމުގައިވާ އެމަނިކުފާނުގެ ކާފާފުޅުގެ ސަބަބުން ދީނީ ކަންކަމަށް ވަރަށް ބޮޑު ޝައުޤުވެވަޑައިގެންނެވިއެވެ.

ޝައިޚް އިބްރާހީމް ބަންގި ގޮވަން ފެއްޓެވީ އުމުރުފުޅުން އެންމެ 15 އަހަރުގައެވެ. އެއީ މަދީނާގައި ޝެއިޚް ދިރިއުޅުއްވި އަވަށު މިސްކިތުގައެވެ. ކޮލެޖް ތަޢުލީމު ނިންމަވަންދެން އަވަށުގެ އެހެން މީހުންނާ އެކު ބަހާލައިގެން އެ މިސްކިތުގައި ބަންގި ގޮއްވަމުން ގެންދެވިއެވެ. ނަމަވެސް، މަދީނާއިން ބޭރުގައި ކިޔަވައިދިނުމުގެ މަސައްކަތް ކުރައްވަން ޖެހިވަޑައިގަތުމުން ދުވަސްކޮޅަކަށް އެ ޚިދުމަތް މެދުކަނޑާލަން ޖެހުނެވެ.

އޭގެ ފަހުން، ހިޖުރައިން 1428 ވަނަ އަހަރު މަސްޖިދުލް މަދާޙުގައި އަލުން ބަންގި ގޮވުމުގެ ޚިދުމަތް ފެއްޓެވިއެވެ. އަދި މަސްޖިދުލް ޙަރާމްގެ ރަސްމީ މުއައްޛިނެއްގެ ގޮތުގައި އެމަނިކުފާނު ހަމަޖެއްސެވީ 2018 ވަނަ އަހަރު ގައެވެ.

ޤުރްއާނިކް ސްޓަޑީޒްގެ ދާއިރާއިން މަތީ ތަޢުލީމު ޙާޞިލުކުރައްވާފައިވާ ޝައިޚް އިބްރާހީމް އަލްމަދަނީ ފާހަގަކުރެވިފައިވަނީ މަދީނާ އަދި މައްކާގެ ބަންގީގެ ރާގުތައް އެއްކޮށްލައްވައިގެން ރީތިކޮށް ބަންގި ގޮއްވެވި ބޭފުޅެއްގެ ގޮތުގައެވެ. މަދީނާގެ ރާގުތަކުގެ އިތުރުން މައްކާގެ ޚާއްޞަ ރާގުތައް އެމަނިކުފާނު ދަސްކުރެއްވީ ބައްޕާފުޅާއެކު މައްކާއަށް ކުރެއްވި ދަތުރުފުޅުތަކުގައި، މަސްޖިދުލް ޙަރާމްގެ ކުރީގެ މުއައްޛިން ޝައިޚް ޢަބްދުއްލަޠީފް މުއްލާގެ އަރިހުންނެވެ.

ޝައިޚް އިބްރާހީމް އަލްމަދަނީ އަވަހާރަވުމާ ގުޅިގެން އިސްލާމީ އުންމަތުގެ ގިނަ ބަޔަކު ދަނީ އެމަނިކުފާނުގެ ފުރާނަފުޅަށް ހެޔޮ ރަޙްމަތް ލެއްވުމަށާއި ސުވަރުގޭގެ ދާއިމީ ނިޢުމަތް ދެއްވުން އެދި ދުޢާކުރަމުންނެވެ.