ހުރާގައި ގެއެއްގައި ބޮޑު އަލިފާނުގެ ހާދިސާއެއް؛ އަލިފާން ފުރަތަމަ ރޯވީ ތިންމައިން ނިދާފައި ތިބި ކޮޓަރީގައި

‏ކ.ހުރާގައި 15 މީހުން ދިރިއުޅެމުންދާ ގެއެއްގައި، ބޮޑު އަލިފާނުގެ ހާދިސާއެއް ހިނގައި އެގޭ ބޭނުން ނުކުރެވޭ ވަރަށް އަނދައިފިއެވެ.

ހުރާ ކައުންސިލުގެ ރައީސް ޢީސާ އަހުމަދު ”ވޮއިސް“ އަށް މައުލޫމާތު ދެއްވި ގޮތުގައި އަލިފާން ރޯވެފައިވަނީ ރޭ ގާތްގަނޑަކަށް 12:30 ކަންހާއިރުއެވެ. އަދި އަލިފާން ނިއްވައިލެވުނީ 2 ޖަހާ ދިޔަފަހުންނެވެ.

ފުރަތަމަ އަލިފާން ރޯވީ މަންމަ އަކާއި އޭނާގެ ދެ ދަރިން ނިދާފައި އޮތް ކޮޓަރީގައެވެ. އަދި އެ ކޮޓަރީގައި ރޯވި ސަބަބު އަދި ޔަގީން ނުވި ނަމަވެސް، ބޮޑަށް ބެލެވެނީ ޗާޖަށް ޖަހާފައި އޮތް ފޯނު ހޫނުވެ ދިމާވި ކަމަކުން ކަމަށް ވިދާޅުވިއެވެ.

”ބެލެވެނީ ޗާޖަށް ޖަހާފައި އޮތް ފޯނު ގޮވައިގެން ދިމާވި ކަމެއް ކަމަށް. ރޯވި އިރު އެ ކޮޓަރީގައި ތިބީ މަންމަ އާއި އޭނާގެ ދެ ދަރިން. މާތް اللهގެ އިރާދަފުޅުން ކުދިންނަށް އަނިޔާއެއް ނުވެ ސަލާމަތް ކުރެވުނު. ކުދިންގެ މަންމަގެ އަތުގެ އިނގިލިތައް ފިހުނު.“

ހުރާ ކައުންސިލުގެ ރައީސް ވިދާޅުވިއެވެ.

ކުދިންގެ މަންމައަށް ލިބުނު އަނިޔާއަށް ހުރާ ސިއްޙީ މަރުކަޒުގައި ފަރުވާ ދިނުމަށްފަހު އޭނާ މިއަދު 6:00 ހާއިރު މާލެ ފޮނުވާލާފައިވާ ކަމަށްވެސް ކައުންސިލުން މައުލޫމާތު ދެއެވެ.

”ޖިސްމާނީ އަނިޔާއެއް ނުލިބުނު ނަމަވެސް ނަފްސާނީ ގޮތުން ވަރަށް އަސަރު ކޮށްފައި ހުރީ މަންމައަށް. ވާހަކައެއްވެސް ނުދައްކާ އަދިވެސް. ހުއްޓިފަ ހުންނަނީ. އެހެންވެ މާލެއަށް ފޮނުވާލާފައި ވަނީ މިހާރު. “ ހުރާ ކައުންސިލުން ބުންޏެވެ.

ރޭގެ ވަގުތެއްގައި ހިނގި މި އަލިފާނުގެ ހާދިސާގައި އެ ކޮޓަރީގައި ހުރި ހުރިހާ ތަކެތި ވަނީ ބޭނުން ނުކުރެވޭ ވަރަށް އަނދާފައެވެ. އަދި މުޅި އެ ގެވެސް އަނދާފައިވާ ކަމަށް އެންޑީއެމްއޭއިން ބުނެއެވެ.

އަދި، މި އަލިފާނުގެ ސަބަބުން އެގޭގައި ދިރިއުޅުނު 15 ފަރާތަކަށް އިންސާނީ އެހީތެރިކަން ފޯރުކޮށްދިނުމުގެ މަސައްކަތް އެ އޮތޯރިޓީން ކައުންސިލާ ގުޅިގެން ކުރަމުންދާ ކަމަށްވެސް އެ އޮތޯރިޓީން ބުނެފައިވެއެވެ.