ޅޮހީގައި ބައިނަލްއަޤްވާމީ މުބާރާތްތައް ބޭއްވޭ ރާޅާއަޅާ ސަރަޙައްދެއް ހެދުމުގެ މަސައްކަތް މިއަހަރު ފެށޭނެ: ރައީސް
ނ. ޅޮހީގައި ބައިނަލްއަގުވާމީ މުބާރާތްތައް ބޭއްވޭ ފެންވަރުގެ ރާޅާ އަޅާ ސަރަހައްދެއް ހެދުމުގެ އަމަލީ މަސައްކަތް މި އަހަރު ފެށޭނެ ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.
ނ. ޅޮއްސަށްް މިއަދު ހެނދުނު ވަޑައިގެން، އެ ރަށުގެ ރައްޔިތުންނާ ބައްދަލުކުރައްވައި، ވާހަކަދައްކަވަމުން ރައީސުލްޖުމްހޫރިއްޔާ ވަނީ، އެރަށުގެ ރައްޔިތުން މިއަދު އެދިވަޑައިގެންނެވި ކަންކަމުގައި ޢަމަލީ ސިފަޖައްސަވައި ދެއްވައި، އެ ހުރިހާކަމެއް ފުއްދަވައިދެއްވާނެ ކަމުގެ ޔަޤީންކަން ދެއްވާފައެވެ.
އެގޮތުން ރައީސް ވިދާޅުވީ، ޅޮހީގެ ބަނދަރު އެންމެ އެދެވޭގޮތުގައި ހުރިހާ މޫސުމެއްގައި ފުރިހަމައަށް ބޭނުންކުރުމުގައި ދަތިތަކެއް ހުރިކަމަށާ، އެކަމުގެ ފަންނީލަފައާއެކު، ރައްޔިތުން އެދިވަޑައިގެންނެވި ގޮތަށް، ދިގުމުއްދަތަކަށް ބަނދަރުގެ ބޭނުންހިފޭނެގޮތަށް އެ މަސައްކަތް ނިންމަވައިދެއްވާނެކަމަށެވެ.
އަދި، ނ. ޅޮހީ ޞިއްޙީ މަރުކަޒަށް ބޭނުންވާ ހުރިހާ ޚިދުމަތްތަކެއް ދެވޭގޮތަށް ޢިމާރާތް އެޅުމަށް ބަޔަކާ ޙަވާލުކޮށް މިއަހަރުގެ ފަހުކޮޅު ޢަމަލީ މަސައްކަތް ފެށޭނެކަމަށާ، އެ ރަށު ސްކޫލަށް ދިމާވެފައިވާ ޖާގައިގެ ދަތިކަން ހައްލު ކުރުމަށް ވަސީލަތްތައް ފުރިހަމަވެފައިވާ ޢިމާރާތެއް އެޅުމުގެ މަޝްރޫޢެއް އަންނަ އަހަރު ފެށޭނެކަމުގެ ޔަޤީންކަންވެސް އެ މަނިކުފާނު ދެއްވިއެވެ.
ކުޅިވަރުގެ ދާއިރާއިން ރަށަށް ބޭނުންވާ މަސައްކަތްތަކަށް އަލިއަޅުއްވާލައްވަމުން ރައީސުލްޖުމޫހޫރިއްޔާ ވަނީ، މިއަދު އެ ރަށުގައި އިފްތިތާޙުކުރެއްވި ފިޓްނަސް ރެކްރިއޭޝަން ސެންޓަރާއި އައުޓްޑޯރ ޖިމްގެ މަސައްކަތްތާއި، މިހާރު މަސައްކަތް ކުރިއަށްދާ ފުޓްބޯޅަ ދަނޑުގައި ބޮކިޖަހައި، ރޭގަނޑު ކުޅެވޭނެގޮތަށް، ވޮލީކޯޓެއްވެސް އަޅުއްވައިދެއްވާނެކަމުގައި ވިދާޅުވެފައެވެ.
ޅޮހީގެ ރާޅާ އަޅާ ސަރަހައްދަކީ އިންޓަނޭޝަނަލް ފެންވަރުގެ މުބާރާތްތަކާއި ކަންކަން ކުރެވޭ ފެންވަރުގެ ތަނަކަށް ހަދާނެ ކަމަށް އެއީ ރިޔާސީ އިންތިޚާބުގައި އަޅުގަނޑު ވެފައި އޮތް ވައުދެއް. އެ މަޝްރޫޢު އިރާދަކުރެއްވިއްޔާ މި އަހަރު ކުރިއަށް ގެންގޮސްދޭނަން. އެ މަޝްރޫޢުގެ އަމަލީ މަސައްކަތް މި އަހަރު ފަށައިދޭނަން
ރައީސް ޑރ. މުޙައްމަދު މުޢިއްޒު
މީގެ އިތުރުން ރަށުގެ މަގުހެދުމުގެ މަޝްރޫޢުގެ ޢަމަލީ މަސައްކަތްވެސް މާ ލަހެއް ނުވެ ފެށޭނެ ކަމުގެ ޔަޤީންކަން އެމަނިކުފާނު ވަނީ ދެއްވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
