ޖާޔާ ކުޝަން ކައިރީ ހުންނަ އިމާރާތުގައި ރޯވި އަލިފާންގަނޑު ކޮންޓްރޯލްކޮށްފި

މ.މުނިޔާމަގު ޖާޔާ ކުޝަން ކައިރީ ހުންނަ އިމާރާތުގައި ރޯވި އަލިފާންގަނޑު ކޮންޓްރޯލް ކޮށްފިއެވެ.

މިކަމާ ގުޅިގެން ނެޝަނަލް ޑިޒާސްޓާ މެނޭޖްމަންޓް އޮތޯރިޓީން ބުނީ، ރޯވީ ދެ ފަންގިފިލައަށް ހަދާފައި ހުންނަ އިމާރާތެއްގައި ކަމަށެވެ. މި އިމާރާތަކީ މިހާރު މީހުން ދިރިއުޅުމަށް ބޭނުންކުރާ އިމާރާތެއް ނޫންކަމަށްވެސް ޑިޒާސްޓާއިން ބުންޏެވެ.

އަދި ރައްކާތެރިކަމުގެ ފިޔަވަޅެއްގެ ގޮތުން ރޯވި އިމާރާތާ ޖެހިގެންހުރި ގޭގައި ދިރިއުޅެމުން އައިމީހުން ވަނީ އެތަނުން ހުސްކޮށްފައެވެ. ޑިޒާސްޓާއިން ބުނީ ހުސްކުރި ގޭގައި 10 ބިދޭސީއަކު އުޅެމުންދިޔަ ކަމަށެވެ.

އިމާރާތުގައި ރޯވި ސަބަބެއް އަދި މިހާތަނަކަށް ސާފެއް ނުވެއެވެ. މި ހާދިސާ ހިނގިކަމުގެ ރިޕޯޓް ފުލުހުންނަށް ލިބުނީ ހެނދުނު 09:19 ހާއިރުއެވެ. ފުލުހުން ބުނީ މި ހާދިސާ ތަހްގީގްކުރަމުންދާކަމަށެވެ.

އަލިފާންގަނޑު ކޮންޓްރޯލް ކޮށްފައިވަނީ އެމްއެންޑީއެފްގެ ފަޔަރ އެންޑް ރެސްކިއުޓީމުން ގޮހެވެ. އެ ސަރަހައްދަކީ ހަނި ގޯޅިތަކެއް ހުންނަ ސަރަހައްދެއްކަމުން ފަޔަރ ލޮރީއަށް ވަދެ ނިކުމެ ހަދަން ދަތިކަން ފާހަގަކޮށްވެއެވެ.