ޕާކިސްތާނަށް ކުރަމުންދާ ވިއްސާރާގައި މަރުވި މީހުންގެ އަދަދު 340 ހަށް އަރައިފި
ލިޔުންތެރިޔާ
އަބްދުﷲ ހުސައިން
ޕާކިސްތާނަށް މިހާރު ކުރަމުންދާ މޫސުމީ ވިއްސާރާގައި އެކި އަވަށްތަކުން މަރުވި މީހުންގެ އަދަދު 340 ހަށް އަރައިފިއެވެ.
އެޤައުމުގެ ޕްރޮވިންޝަލް ޑިޒާސްޓާ މެނޭޖްމަންޓް އޮތޯރިޓީން ބުނެފައިވަނީ، އުތުރުގެ ޕްރޮވިންސް ހިސާބުތަކަށް ކުރި ވިއްސާރައިގައި ބިންގަނޑު ކަނޑައިގެން ގޮސް ހިނގާދިޔަ ހާދިސާތަކުގައި 340 މީހަކު މަރުވެފައިވާކަމަށް މިހާތަނަށް ޔަގީންކުރެވިފައިވާކަމަށެވެ. މަރުވިމީހުންގެ ތެރެއިން ގިނައީ އަންހެނުންނާއި ކުޑަކުދިންނެވެ.
އެއޮތޯރިޓީން ބުނީ މޫސުން ގޯސްވުމުގެ ސަބަބުންނާއި މަގުތައް ހަލާކުވުމުގެ ސަބަބުން ގެއްލުން ލިބިފައިވާ ސަރަހައްދުތަކަށް ކަމާބެހޭ އިދާރާތަކުން ވާސިލްވުމުގައިވެސް އުނދަގޫތަކެއް ކުރިމަތިވެފައިވާކަމަށެވެ. އެގޮތުން ލިބުނު ގެއްލުންތަކުގެ ސަބަބުން މަރުވި މީހުންގެ އަދަދު ސީދާ ޔަގީންކުރަން އުނދަގޫވެފައިވާކަމަށް ޕީޑިއެމުން ބުންޏެވެ.
ޕާކިސްތާނުގެ މޫސުމާ ބެހޭ އިދާރާއިން ވަނީ ކުރިއަށްއޮތް ތިން ދުވަހަކީވެސް މޫސުން ވަރަށްބޮޑަށް ގޯސްވާނެ ދުވަސްތަކެއްކަމަށް ބުނެފައެވެ. ޕާކިސްތާނަށް ކުރަމުން އަންނަ ވިއްސާރައިގެ ސަބަބުން ބޮޑެތި ގެއްލުންތަކެއް ލިބެމުންދާއިރު، އެންމެބޮޑަށް ގެއްލުން ލިބުނު އެއް ސަރަހައްދަކީ ޚައިބަރު ޕަޚްތުންޚްވާން ޕްރޮވިންސް އެވެ.
ވިއްސާރާގައި ލިބުނު ގެއްލުންތަކަށް އެހީވުމަށް ޕާކިސްތާނުގެ ޚައިބަރު ޕަޚްތުންޚްވާން ޕްރޮވިންސް އޮފީހުން ވަނީ އެހީގެ މަސައްކަތްތަކަށް 3 ބިލިއަން ރުޕީސް ދޫކުރުމަށް ސަރުކާރުން ނިންމާފައިވާކަން ހާމަކޮށްފައެވެ. މީގެ އިތުރުން ޕާކިސްތާނުގެ އަސްކަރިއްޔާއިން ވަނީ ގެއްލުން ލިބުނު ފަރާތްތަކަށް އެހީގެ ގޮތުގައި އެމީހުންގެ އެއްދުވަހުގެ މުސާރަ ދިނުމަށް ނިންމާފައިކަމަށް އެޤައުމުގެ ބައެއް ނޫސްތަކުން ވަނީ ބުނެފައެވެ.
ޕާކިސްތާނަކީ އެޤައުމަށް ކުރާ މޫސުމީ ވިއްސާރާގައި ވަރަށްބޮޑަށް ގެއްލުންލިބޭ ޤައުމެކެވެ އެންމެފަހުން 2022 ވަނަ އަހަރު އެޤައުމަށް ކުރި ވިއްސާރާގައި 33 މިލިއަނަށްވުރެ ގިނަ މީހުންނަށް އެކި ގޮތްގޮތުން ގެއްލުންލިބި 9 މިލިއަނަށްވުރެ ގިނަ މީހުން ހާލުގައި ޖެހުނެވެ. މީގެ އިތުރުން ދެހާހާ ގާތްކުރާ އަދަދެއްގެ މީހުންގެ ފުރާނަ ގެއްލުނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
