ޕީޖީ އޮފީހުން ރަޖިސްޓްރޭޝަން ފީ ނުދެއްކުމުން ޑްރަގާ ގުޅޭ ބޮޑު މައްސަލައެއްގެ އިސްތިއުނާފް ކޯޓުން ބޭރުކޮށްލައިފި

ސ. ހުޅުދޫ، ދޭލިޔާގެ، ޢިރުފާން ތަޤިއްޔުގެ މައްޗަށް ރައްދުވާގޮތަށް ޕީޖީ އޮފީހުން ހައިކޯޓަށް ހުށަހެޅި އިސްތިއުނާފުގެ ރަޖިސްޓްރޭޝަން ފީ ދައްކާފައިނުވާތީ ކަމަށް ބުނެ ރަޖިސްޓްރާގެ ނިންމުމުން މައްސަލަ ބަލައިގަނެވެން ނެތްކަމަށް ނިންމައިފި އެވެ.

ޢިރުފާން ހައްޔަރުކޮށް ދައުވާ އުފުލީ ރާއްޖެއަށް 72 ކިލޯގެ މަސްތުވާތަކެތި އެތެރެކުރުމުގެ ތުހުމަތުގައެވެ. އޭނާގެ މައްޗަށް އުފުލީ ޑައިމޯފިން ޓްރެފިކް ކުރުމުގެ ދައުވާ އެވެ.

ނަމަވެސް ދަށު ކޯޓުން ނިންމީ އެ ދައުވާ ސާބިތުނުވާ ކަމަށެވެ. އެހެން ކަމުން އެ ނިންމުން ޕީޖީ އޮފީހުން ވަނީ ހައިކޯޓްގައި އިސްތިއުނާފް ކޮށްފަ އެވެ.

ޕީޖީ އޮފީހުން ބުނީ ހައިކޯޓަށް ހުށަހެޅި އިސްތިއުނާފުގެ ރަޖިސްޓްރޭޝަން ފީ ދައްކާފައިނުވާތީ ކަމަށް ބުނެ ރަޖިސްޓްރާގެ ނިންމުމުން މައްސަލަ ބަލައިގަނެވެން ނެތްކަމަށް ނިންމާފައިވާ ކަމަށެވެ.

އެ އޮފީހުން ބުނީ އެ ނިންމުމުގައި ރަޖިސްޓްރޭޝަން ފީ ދެއްކުމަށް އަންގާ ލިޔުން މި މަހުގެ ފަސްވަނަ ދުވަހު އެ އޮފީހަށް މެއިލްކުރިކަމަށް ބުނެފައިވާ ކަމަށާ ނަމަވެސް އެ އީމެއިލް ޕީޖީ އޮފީހުގެ ކަނޑައެޅިފައިވާ އީމެއިލްއަށް ލިބިފައިނުވާ ކަމަށެވެ.

އެފަދަ ލިޔުންތައް ޕީޖީ އޮފީހަށް ފޮނުވުމަށް ކަނޑައެޅިފައިވާ އީމެއިލްއަށް އެ ދުވަހާއި ޖެހިގެން އައި ދުވަހުވެސް ހައިކޯޓުން އެކި އީމެއިލްތައް ކޮށްފައި ހުރިނަމަވެސް، އެ މައްސަަލައާ ގުޅޭ އީމެއިލް ލިބިފައި ނުވާކަން ވެސް ފާހަގަކޮށްފަ އެވެ.

އެހެންކަމުން މި ނިންމުން މުރާޖަޢާކުރުމަށް ޕީޖީ އޮފީހުން ހުށަހަޅާނެ ކަމަށް ވަނީ ބުނެފަ އެވެ. އަދި މި ނިންމުމަކީ ހައިކޯޓުން އިސްވެ މުރާޖައާ ކުރަންޖެހޭ ނިންމުމެއްކަމަށް ދެކޭ ކަމަށެވެ.

މި މައްސަލަ އަކީ "މަސްޖަރީ 2" ނަމަކަށްކިޔާ ކަންނެލި ދޯންޏެއްގައި ބޭރުން ރާއްޖެއަށް މަސްތުވާތަކެތި އެތެރެކޮށް، ލޯންޗެއްގައި ގޮސް އެތަކެތި މާލެ ގެނެސް  ކާރެއްގެ ޑިކީއަށް އަރުވާފައިވަނިކޮށް ފެނުނު މައްސަލައަކާއި ގުޅިގެން އުފުލި ދައުވާ އެކެވެ. މި އޮޕަރޭޝަނުގައި ރާއްޖެ އެތެރެކުރި 72 ކިލޯއަށްވުރެ ގިނަ މަސްތުވާތަކެތި ހޯދާފައިވާއިރު އެ މައްސަލައިގައި 10 މީހަކަށް ދައުވާ އުފުލި އެވެ.