ހިޔާގައި މީހަކު ރަހީނުކޮށް، އިނގިލި ބުރިކޮށްލަން އުޅުނު މީހުން ދޫކޮށްލައި ދައުވާކުރަން ފޮނުވައިފި

ހިޔާގައި މީހަކު ރަހީނުކޮށް, އެމީހާގެ އިނގިލި ބުރިކޮށްލަން އުޅުނު މައްސަލާގައި ޝާމިލްވާ 12 މީހުންނަށް ދައުވާކުރުމަށް ނިންމައި އެމީހުން ދޫކޮށްލައިފިއެވެ.

މި ހާދިސާ ހިނގާފައިވަނީ މިދިޔަ ނޮވެމްބަރުމަހުގެ 7 ވަނަ ދުވަހުގެ ރޭ ހިޔާ ޓަވަރު 9 ގެ 20 ވަނަ ފަންގިފިލާގައި ހުންނަ 11 ވަނަ އެޕާޓްމަންޓްގައެވެ. މިކަމާގުޅިގެން ފުލުހުން ވަނީ 12 މީހަކު ހައްޔަރުކޮށްފައެވެ. މި މައްސަލާގައި ފުލުހުންގެ ފަރާތުން ކުރަންޖެހޭ ތަހުގީގު ނިންމައި ޕްރޮސެކިއުޓަރ ޖެނެރަލްގެ އޮފީހަށް މައްސަލަ ފޮނުވާފައިވަނީ މިދިޔަ ހޮނިހިރުދުވަހުއެވެ

މި ހާދިސާގައި ރަހީނުކޮށްފައިވަނީ، ފިރިހެނެކެވެ. ރަހީނުކުރުމުގައި ބައިވެރިވި މީހުން، ރަހީނުކުރި މީހާގެ ބޮލުގެ އިސްތަށިގަނޑު ކޮށާލައި އޭނާއަށް ޖިސްމާނީގޮތުން އަނިޔާދިނުމަށް ވަނީ މަސައްކަތްކޮށްފައެވެ. މިގޮތުން ފުލުހުން އެޕާޓްމަންޓް ދޮރު ހަލާކުކޮށްލައިގެން ވަތްއިރު، އެމީހުން ތައްޔާރުވަމުންދިޔައީ ރަހީނުކުރި މީހާގެ އިނގިލި ބުރިކޮށްލަން ކަމަށް ފުލުހުން ބުންޏެވެ.

ފުލުހުން ބުނެފައިވަނީ އިނގިލި ބުރިކޮށްލަން އުޅުނީ މަސްތުވާ ތަކެތީގެ މައްސަލައެއްގައި ކަމަށެވެ.