ރެފްރީގެ ނިންމުން ރަނގަޅު، ރެއާލް މެޑްރިޑަށް އެހީތެރިވީ ނަސީބު!

ޔުއެފާ ޗެންޕިއަންސް ލީގު ރައުންޑް އޮފް 16 ގައި ޕެނަލްޓީ ޖަހައިގެން 4-2 ގެ ނަތީޖާއަކުން ވާދަވެރި އެތުލެޓިކޯ މެޑްރިޑް ކަޓިވާލުމަށްފަހު، އެންމެ ފަހުގެ ޗެންޕިއަން ރެއާލް މެޑްރިޑް، މުބާރާތުގެ ކުއާޓާ ފައިނަލަށް ޖާގަހޯދައިފި އެވެ.

ރެއާލްގެ ދަނޑުގައި ކުޅުނު ފުރަތަމަ ލެގުގެ މެޗު 2-1 ގެ ނަތީޖާއަކުން ރެއާލް ކާމިޔާބުކޮށްފައިވާއިރު، ރޭ އަމިއްލަ ދަނޑުގައި ކުޅުނު މެޗުގެ 28 ވަނަ ސިކުންތުގައި އެތްލެޓިކޯ އިން ވަނީ ލަނޑެއް ކާމިޔާބުކޮށް އެގްރިގޭޓް ނަތީޖާ 2-2 ގެ ނަތީޖާއަކުން އެއްވަރުކޮށްފަ އެވެ.

މިލަނޑު އެޓީމަށް ކާމިޔާބުކޮށްދިނީ މި ސީޒަންގައި ޗެލްސީ އިން އެޓީމަށް ގެނައި މިޑްފީލްޑަރު ކޯނޯ ގަލަގާ އެވެ. މިއީ އިނގިރޭސި ކުޅުންތެރިއަކު މިހާތަނަށް ޗެމްޕިއަންސް ލީގުގައި ކާމިޔާބުކުރި އެންމެ އަވަސް ލަނޑެވެ. އަދި މީގެ އިތުރުން މިއީ އޭނާ ޗެމްޕިއަންސް ލީގުގައި ކާމިޔާބު ކުރި ފުރަތަމަ ގޯލެވެ.

މެޗުގެ އެގްރިގޭޓް ނަތީޖާ ރެއާލް ކޮޅަށް އަނބުރާލަން ދެވަނަ ހާފުގައި އެޓީމަށް ރަނުގެ ފުރުސަތެއް ލިބުނެވެ. ނަމަވެސް އެތްލެޓިކޯގެ ޕެނަލްޓީ އޭރިއާ ތެރެއިން އެޓީމުގެ ކުޅުންތެރިއަކު ކިލިއަން އެމްބާޕޭއަށް ކުރި ފައުލަކާއި ގުޅިގެން ފަހުހާފުގެ 70 ވަނަ މިނެޓުގައި  ރެއާއަށް ލިބުނު ޕެނަލްޓީ، ވިނީޝިއުސް ޖޫނިއާ ފޮނުވާލުމުން ދިޔައީ ގޯލާއި އަމާޒުނުވެ މާ މަތިން ބޭރަށެވެ.

މިއާއެކުު މެޗުގެ 90 މިނެޓާއެކު އިތުރު ވަގުތުގެ 15 މިނެޓުގެ ކުޅުމަށް ފަހު ވެސް ނަތީޖާއަށް ބަދަލެއް ނައުމުން، ނަތީޖާ ނެރުނު ޖެހި ޕެނަލްޓީ ޝޫޓައުޓްގައި އެތުލެޓިކޯ ފޮނުވާލި ހަތަރު ޕެނަލްޓީގެ ތެރެއިން އެލެކްސެންޑާ ސޯލޮތާއި ހޫލިއަން އަލްވަރޭޒް އަދި އަންހެލް ކޮރެއާގެ ޕެނަލްޓީ ގޯލަށް ވައްދާލި އެވެ.

ނަމަވެސް، އަލްވަރޭޒްގެ ޕެނަލްޓީ ވީއޭއާރުން ބެލުމަށްފަހު ރެފްރީ ނިންމީ ބޯޅަ ގޯލަށް ފޮނުވާލުގެ ތެރެގައި އަލްވަރޭޒްގެ ދެ ފައިގައި ބޯޅަ ޖެހިފައިވާތީ އެއީ ގޯލެއް ނޫންކަމަށެވެ. އަދި އެޓީމުގެ ހަތަރުވަނަ ޕެނަލްޓީ މާކޮސް ލޮރެންޓޭ ފޮނުވާލުމުން އަމާޒުވީ ގޯލުގެ ހުރަސް  ދަނޑިއަށެވެ.

ރެއާލް މެޑްރިޑުގެ އެމްބާޕޭ އާއި ޖޫޑެ ބެލިންހަމް އަދި ފެޑެރިކޯ ވެލްވާޑޭ އެޓީމުގެ ފުރަތަމަ ތިން ޕެނަލްޓީ ކާމިޔާބު ކުރި ނަމަވެސް، ލޫކަސް ވަސްކޭޒްގެ ޕެނަލްޓީ އެތުލެޓިކޯގެ ގޯލްކީޕަރު ޔާން އޮބްލަކް ވަނީ ދިފާއު ކޮށްފަ އެވެ. ނަމަވެސް އެންޓޮނީ ރުޑިގާ ކުރިއަށް ފޮބުވާލި ފަސްވަނަ ޕެނަލްޓީގައި އޮބްލަކްގެ އަތުގައި ޖެހިފައި ގޯލަށް ވަނުމުން ރެއާލް މެޑްރިޑަށް ކުއާޓާ ފައިނަލް ޔަގީންވިއެވެ.

މެޗަށް ފަހު އޮތް ނޫސްވެރިންގެ ބައްދަލުވުމުގައި އެތްލެޓިކޯގެ ކޯޗު ޑިއެގޯ ސިމިއޯނީ ވަނީ އަލްވަރޭޒްގެ ދެފައިގައި ބޯޅަ ޖެހުނުތަން އެއްވެސް ނޫސްވެރިއަކަށް ފެނުނުތޯ ސުވާލުކޮށްފައެވެ. ނަމަވެސް ވިޑިއޯ ރިޕްލޭއިން ފެންނަގޮތުގައި އެއްވެސް ސުވާލެއް ނުއުފެދޭ މިންވަރަށް ސާފުކޮށް އަލްވަރޭޒްގެ ދެފައިގައި ބޯޅަ ޖެހޭ މަންޒަރު ވަރަށް ސާފުކޮށް ފެނެއެވެ.

މިއާ އެކު މުބާރާތުގެ ކުއާޓާގައި ރެއާލް މެޑްރިޑުން ނުކުންނާނީ އާސެނަލްއާ ދެކޮޅަށެވެ. އާސެނަލް އިން ރޭ އަމިއްލަ ދަނޑުގައި ޕީއެސްވީއާ ދެކޮޅަށް ކުޅުނު މެޗު ނިމިފައިވަނީ 2-2 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ. އަދި އެޓީމު ކުއާޓާ ފައިނަލުން ޖާގަހޯދީ 9-3 ގެ އެގްރިގޭޓް ނަތީޖާއަކުން ކުރިހޯދައިގެންނެވެ.

ލަވަޕޫލް ކަޓުވާލި ޕީއެސްޖީ އިން ކުއާޓާގައި ވާދަކުރާނީ ޕްރެމިއާ ލީގުގެ އެސްޓަން ވިލާއާ ދެކޮޅަށެވެ. ވިލާ ވަނީ ރޭ 3-0 ގެ ނަތީޖާއަކުން ބެލްޖިއަމްގެ ކްލަބް ބުރޫޖް ބަލިކޮށް، 6-1 ގެ އެގްރިގޭޓް ނަތީޖާއަކުން ކުރިހޯދާފައެވެ.

ކުއާޓާ ފައިނަލުގައި ސްޕެއިންގެ ބާސެލޯނާ އާއި އެންމެ ފަހުގެ ރަނަރަޕް ބޮރޫޝިއާ ޑޯޓްމަންޑް ވާދަ ކުރާއިރު، ޖަރުމަނުގެ ބެޔާން މިއުނިކް ނުކުންނާނީ އިޓަލީގެ އިންޓަ މިލާނާ ދެކޮޅަށެވެ.