މާފަރު އެއާޕޯޓް ބޮޑުކުރުމުގެ މަޝްރޫޢު 29 މިލިއަން ރުފިޔާއަށް އެމްޓީސީސީއާ ހަވާލުކޮށްފި

ނ. މާފަރު އެއާޕޯޓުގެ އޭޕްރަން ބޮޑުކުރުމުގެ މަޝްރޫޢު 29 މިލިއަން ރުފިޔާއަށް މޯލްޑިވިއަނުން މިއަދު އެމްޓީސީސީއާ ހަވާލުކޮށްފިއެވެ.

މި މަޝްރޫޢު ހަވާލުކުރުމަށް ބޭއްވި ރަސްމިއްޔާތުގައި އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ ސީއީއޯ ޢަބްދުﷲ ޒިޔާދެވެ. އަދި އައިލޭންޑް އޭވިއޭޝަން ސާވިސަސް ލިމިޓެޑްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އިބްރާހިމް އިޔާސެވެ.

މި މަޝްރޫޢުގެ ދަށުން ކުރާނެ މަސައްކަތްތަކުގެ ތެރޭގައި މިހާރު އޮތް 453 އަކަ މީޓަރުގެ ފަޔާ ރޯޑު ތަޅާލުމާއި، 18,660 އަކަ މީޓަރު ސަރަހައްދެއްގެ ވެލިގަނޑުގެ މަތީ ފަށަލަ ނަގައި، ސަބްބޭސް ތައްޔާރުކޮށް ވެއަރިންގް ކޯސްއެއް އެޅުމާއި، 4,047 އަކަ މީޓަރުގެ ސަރަހައްދެއް ގްރޭޑްކޮށް ކޮމްޕެކްޓްކުރުން ހިމެނެއެވެ. މީގެ އިތުރުން އެއާފީލްޑް ލައިޓިން ސިސްޓަމެއް ޤާއިމުކުރުމުގެ މަސައްކަތްވެސް ހިމެނެއެވެ.

29.85 މިލިއަން ރުފިޔާގެ މި މަޝްރޫޢު 180 ދުވަހުގެ ތެރޭގައި ނިންމުމަށް ވަނީ އެމްޓީސީސީއާ ހަވާލުކޮށްފައެވެ. މި މަޝްރޫޢު ނިމުމުން މާފަރު އެއާޕޯޓުގެ ޚިދުމަތް އިތުރަށް ޒަމާނީވެ ފުރިހަމަވެގެންދާނެ ކަމަށާއި، ވަޒީފާގެ ފުރުސަތުތައް އިތުރުވެގެންދާނެ ކަމަށް އެމްޓީސީސީން ވަނީ ބުނެފައެވެ.

1,250 މީހުންގެ އާބާދީއެއް އޮންނަ މާފަރުގެ ރައްޔިތުން އާންމުކޮށް އާމްދަނީ ހޯދަނީ މަސްވެރިކަމާއި ގެދޮރު އިމާރާތްކުރުމުގެ މަސައްކަތުންނެވެ. އަދި މާފަރު އެއާޕޯޓުގައިވެސް ގިނަ އަދަދެއްގެ ރަށު ރައްޔިތުން ވަޒީފާ އަދާކުރަމުން އަންނަކަން ފާހަގަކުރެވެއެވެ.