ދަނގެތީ ”ފިޔުޗަރ އިމާމް 1446“ މުބާރާތުގެ ވަނަވަނައަށް އައި ދަރިވަރުން ހޮވައިފި!

މުސްތަގުބަލުގެ އިމާމުން އުފެއްދުމަށް “ފިޔުޗަރ އިމާމް 1446” ނަމުގައި އދ. ދަނގެތީގައި ބޭއްވި މުބާރާތުގެ ވަނަވަނަ އަށް އައި ދަރިވަރުން ހޮވައިފިއެވެ.

އދ ދަނގެތީ ޖަމިއްޔަތުލް ޤަލަމުން އިސް ނަގައިގެން ކުރިއަށް ގެންދިޔަ މި މުބާރާތަކީ އެ ރަށު ސުކޫލުގެ ގުރޭޑް 6 އިން މަތީގެ ފިރިހެން ދަރިވަރުންނަށް އަމާޒުކޮށް ކުރިއަށް ގެންދެވުނު މުބާރާތެކެވެ.

މިފަދަ މުބާރާތެއް ބޭއްވުމުގެ މަގުސަދަކީ، ކުދިންގެ ހިތްތަކުގެ އިމާމްކަން ކުރުމަށް ލޯބިޖައްސުވައި، އެންމެ ތުއްތުއިރުން ފެށިގެން އިމާމްކަން ކުރުމުގެ ރޫޙް އަށަގަންނުވައި އެކަމަށް އަހުލުވެރި ހުނަރުވެރި ޤާބިލް ކުދިންތަކެއް އުފެއްދުމުގެ އިތުރުން، ދަރިވަރުންގެ ހިތްތަކުގައި މިއަޅުކަމާއިމެދު އޮންނަ ލޯބި އިތުރުކޮށް، ހިތްޖެއްސުން ކަމަށް ޖަމިއްޔަތުލް ޤަލަމުން ބުނެއެވެ.

މި މުބާރާތް، ބޭއްވުމުގެ ގާތްގަނޑަކަށް އެއްމަސް ދުވަސް ކުރިން، މުބާރާތުގައި ބައިވެރިވި 20 ދަރިވަރުން ތަމްރީނު ކުރުމުގެ މަސައްކަތް ވަނީ ކުރިއަށް ގެންގޮސްފައެވެ. އެގޮތުން، މި ތަމްރީނުގެ ތެރެއިން، އިމާމްކަން ކުރުމަށް ބޭނުންވާ މުހިއްމު މަޢުލޫމާތާއި ހުނަރުތައް ދަރިވަރުންނަށް ދަސްކޮށްދީފައިވެއެވެ.

އެއަށްފަހު އެ 20 ދަރިވަރުންގެ އޮޑިޝަން ބާއްވައި، ޖަޖުންގެ ޕެނަލަކުން ވަނީ އެންމެ ރަނގަޅު 10 ދަރިވަރުން ކަނޑައަޅާފައެވެ.

ފިޔުޗަރ އިމަާމް މުބާރާތް ބޭއްވިފައިވަނީ މި 10 ދަރިވަރުންގެ މެދުގައެވެ. އެގޮތުން، އިއްޔެ ހަވީރާއި ރޭގަނޑު މުބާރާތް ކުރިއަށް ގެންގޮސްފައިވާއިރު، މުބާރާތުގެ ފަނޑިޔާރުކަން ކޮށްދެއްވީ، އައްޝައިން އިބްރާޙީމް ރަޝީދު، އައްޝައިޚް ހަސަން ފައިޞަލް އަދި އައްޝައިޚް އާދަމް ބަޝީރެވެ.

އެފަނޑިޔާރުން ދަރުވަރުންގެ ބަންގި ގޮވުމުގެ ހުނަރާއި، ޤަމަތާއި، ޚުތުބާ ކިޔުމުގެ  ހުނަރުގެ އިތުރުން، ފިޤުހީ ގޮތުން އެނގެންޖެހޭ ކަންކަން ކުއްޖާއަށް އެނގިފައިވާ މިންވަރު ބަލައި އެކަންކަމަށް މާކްސް ދީފައެވެ.

މި ގޮތުން އެހުރިހާ ކަމަކުން އެންމެ މަތީ މާކްސް ހޯދައިގެން ވަނަވަނަ އަށް އައި ދަރިވަރުންނަކީ؛

1 ވަނަ ޔުޢާން މުޙައްމަދު: އެއްވަނަ ދަރިވަރަށް -/2500ރގެ ފައިސާގެ އިނާމާއި، ބިޝްޓާއި ޓްރޮފީ ދީފައިވެއެވެ.

2 ވަނަ ޙަސަން ޔަނާޙް އައްބާސް: ދެވަނަ ދަރިވަރަށް -/1500ރގެ ފައިސާގެ އިނާމާއި، ޓްރޮފީ ދީފައިވެއެވެ.

3 ވަނަ މުޙައްމަދު ޖޫދު ފައިޞަލް: ތިންވަނަ ދަރިވަރަށް -/1000ރގެ ފައިސާގެ އިނާމާއި، ޓްރޮފީ ދީފައިވެއެވެ.

މުބާރާތުގެ އެއްވަނަ ބަންގި އާއި ޚުތުބާ ހުށަހެޅި ދަރިވަރުންނަށްވެސް އިނާމާއި ހަނދާނީ ލިޔުން ދީފައިވެއެވެ.

މީގެ އިތުރުން، މުބާރާތުގެ އޮޑިޝަނުން ހޮވުނު 10 ދަރިވަރުންނަށްވެސް އިނާމާއި ހަނދާނީލިޔުން ދީފައިވެއެވެ.

ޖަމިއްޔަތުލް ޤަލަމުން ބުނެފައިވާ ގޮތުން، މުބާރާތް ފުރިހަމަ ކަމާއެކު ނިންމާލެވިފައިވަނީ ގިނަ ފަރާތްތަކުގެ އެހީއާއި އެކުގައި ކަމަށާ، މުބާރާތަށް އެކިގޮތް ގޮތުން އެހީވި އެންމެހައި ފަރާތްތަކަށް އެ ޖަމިއްޔާއިން ޝުކުރު އަދާކުރެއެވެ.