ކުލައިވެޓްގެ ހެޓްރިކާއެކު ބޯންމައުތުން ނިއުކާސަލް ބަލިކޮށްފި

އިގިރޭސި ޕްރެމިއާ ލީގުގައި މިރޭ ރަށުން ބޭރުގައި ނިއުކާސަލް ޔުނައިޓެޑާއި ދެކޮޅަށް ކުޅުނު މެޗު ފަސޭހަކަމާއެކު 4-1 ގެ ނަތީޖާއަކުން ކާމިޔާބުކޮށް ބޯންމައުތުން ލީގު ތާވަލުގެ ފަސްވަނައަށް ކުރިއަށްޖެހިލައިފިއެވެ.

ނިއުކާސަލް ލީގުގައި އެންމެ ފަހުން ކުޅުނު މެޗުގައި 3-0 ގެ ނަތީޖާއަކުން ވުލްވްސް އަތުން މޮޅުވެފައިވާއިރު، އެޓީމު ހުރިހާ މުބާރާތެއްގައި އެންމެ ފަހުން ކުޅުނު ނުވަ މެޗުން ވެސް ވަނީ މޮޅުވެފައެވެ. އަދި ބޯންމައުތުން ލީގުގައި އެންމެ ފަހުން ކުޅުނު މެޗުގައި ޗެލްސީ އާއި ވާދަކޮށް 2-2 ގެ ނަތީޖާއަކުން އެއްވަރުވެފައިވާއިރު، މިދެޓީމި އެންމެ ފަހުން ކުޅުނު ދެމެޗު ވެސް ނިމިފައިވަނީ އެއްވަރުވެގެންނެވެ.

މިވަގުތު ލީގުގައި އެންމެ ރަނގަޅު ފޯމެއްގައި އޮތް ދެޓީމުގެ ކުރިމަތިލުން ބޯންމައުތުން ކާމިޔާބުކުރިއިރު، މިމެޗުގައި އެޓީމުގެ ނެދަލޭންޑް ފޯވާޑް ޖަސްޓިން ކުލައިވެޓް ވަނީ ތިން ލަނޑު ކާމިޔާބުކޮށް ހެޓްރިކް ހަދާފައެވެ. އަދި އެޓީމުގެ އަނެއް ލަނޑު ޑިފެންޑަރު މިލޯސް ކެރްކެޒް ކާމިޔާބުކުރިއިރު، ނިއުކާސަލްގެ ހަމައެކަނި ލަނޑު ކާމިޔާބުކޮށްދިނީ މިޑްފީލްޑަރު ބުރޫނޯ ގުއިމަރޭޒް އެވެ. އަދި މިމެޗުގެ މޮޅު ކުޅުންތެރިއަކަށް ހޮވުނީ ބޯންމައުތުގެ ފޯވާޑް ޖަސްޓިން ކުލައިވެޓް އެވެ.

މިނަތީޖާއެކު ލީގުގައި ކުޅުނު 22 މެޗުން ބޯންމައުތަށް 37 ޕޮއިންޓް ލިބިފައިވާއިރު، ލަނޑުގެ ތަަފާތުން އެޓީމު މިވަގުތު އޮތީ ލީގު ތާވަލުގެ ހަވަނައިގައެވެ. އަދި މިމެޗުން ބަލިވި ނިއުކާސަލް ލީގުގައި ކުޅުނު 22 މެޗުން ލިބުނު 38 ޕޮއިންޓާއެކު އެޓީމު މިވަގުތު އޮތީ ލީގު ތާވަލުގެ ހަތަރުވަނައިގައެވެ.