މިއަހަރު ލަންކާއަށް ޒިޔާރަތްކުރާނޭކަމަށް ބެލެވޭ ފަތުރުވެރިންގެ އަދަދަށް ބަދަލެއް

އަވައްޓެރި ސްރީލަންކާއަށް މިއަހަރުގެ ތެރޭގައި ޒިޔާރަތްކުރާނޭކަމަށް ލަފާކުރި ފަތުރުވެރިންގެ އަދަދު އެގައުމުގެ ކަމާ ބެހޭ އިދާރާއިން ދަށްކޮށްފިއެވެ.

ސްރީލަންކާގެ ޓޫރިޒަމް ޑިވެލޮޕްމަންޓް އޮތޯރިޓީގެ ޗެއާމަން ބުއްދިކާ ހެވަވަސަމް ވިދާޅުވީ ކުރިން 3 މިލިއަން ފަތުރުވެރިން މިއަހަރުގެ ތެރޭގައި ޒިޔާރަތްކުރާނޭކަމަށް ލަފާކުރިނަމަވެސް މިހާރު އެއަދަދު 2.6 މިލިއަން ދަށްކޮށްފައިވާކަމަށެވެ. މީގެ މައިގަނޑު ސަބަބެއްކަމަށް އޭނާ ފާހަގަކުރެއްވި ޤައުމުގެ މާލީ ހާލަތު އަދިވެސް ހުރި ގޮތެވެ.

މިއަހަރު ޒިޔާރަތްކުރާނޭ ފަތުރުވެރިންގެ އަދަދު 2.6 މިލިއަނަށް ދަށްވިނަމަވެސް، މިއީ މިދިޔަ އަހަރަށްވުރެ ރަނގަޅު އަދަދެއްކަމަށް އޭނާ ވިދާޅުވިއެވެ. ލަންކާ ސަރުކާރުން ވަނީ މިއަހަރު އެޤައުމަށް ފަތުރުވެރިކަމުގެ ސިނާއަތުން އާމްދަނީގެ ގޮތުގައި 5 ބިލިއަން ޑޮލަރުގެ އަދަދެއް ލިބޭނޭކަމަށް ލަފާކޮށްފައެވެ. މިއަހަރުގެ މިހާތަނަށް ލަންކާއަށް 1.6 މިލިއަން ފަތުރުވެރިން ޒިޔާރަތްކޮށްފައިވާއިރު ލިބުނު އާމްދަނީ 3.4 ބިލިއަން ޑޮލަރަށް އަރާނޭކަމަށް ލަންކާ ސަރުކާރުން ވަނީ ލަފާކޮށްފައެވެ.

އަވައްޓެރި ސްރީލަންކާއިން ދަނީ އެޤައުމުގެ އިގްތިސާދަށް ދިމާވެފައިވާ ހީނަރުކަމުން އަރައިގަނެ، މައިގަނޑު ސިނާއަތްތައް ކުރިއެރުވުމަށް ބޮޑެތި މަސައްކަތްތަކެއް ކުރަމުންނެވެ.