ޑިމޮކްރެޓްސްގެ ރައީސްކަމުގެ މަޤާމަށް އިންތި ކުރިމަތިލައިފި

ޑިމޮކްރެޓްސް ޕާޓީގެ ރައީސްކަމުގެ މަޤާމަށް ވާދަކުރުމަށް ހުށަހަޅާފައިވާކަމަށް އެޕާޓީގެ ތަރުޖަމާނުކަމުގެ މަޤާމުގައި މިހާރު ހުންނެވި، އިމްތިޔާޒް ފަހުމީ ވިދާޅުވެއްޖެއެވެ.

ކުރިން މާފަންނު އުތުރު ދާއިރާގެ ރައްޔިތުން މަޖިލީހުގެ މެމްބަރުކަންވެސް ކުރެއްވި އިންތި އެކްސްގައި ކުރެއްވި ޕޯސްޓެއްގައި ވިދާޅުވީ، ޑިމޮކްރެޓްސްގެ ރައީސްކަމުގެ މަޤާމަށް ވާދަކުރުމަށް ޕާޓީގެ ތަރުޖަމާނުކަމުގެ މަޤާމުންވެސް އިސްތިއުފާ ދީފައިވާކަމަށެވެ. އިންތިވަނީ ޑިމޮކްރެޓްސްގެ މެމްބަރުންގެ ކިބައިން އޭނާއަށް ތާއީދުކޮށްދިނުމަށްވެސް އެދިފައެވެ.

ޑިމޮކްރެޓްސްގެ ރައީސްކަމުގެ މަޤާމު ހުސްވެފައިވަނީ މިހާތަނަށް އެމަޤާމުގައި ހުންނެވި ހަސަން ލަތީފް، އެޕާޓީ ދޫކުރައްވައި އެމްޑީޕީއާ ގުޅި ވަޑައިގަތުމުންނެވެ. ހަސަން ލަތީފް އެމްޑީޕީއާ ގުޅިވަޑައިގެންނެވީ، ޑިމޮކްރެޓްސްގެ ތެރެއިން ސަރުކާރެއް އުފަންކުރުވައިގެން ރައްޔިތުންނަށް ހިދުމަތްކުރުމުގެ ފުރުސަތު އޮތްކަން ގަބޫލުކުރަން ދަތިކަމަށް ވިދާޅުވެއެވެ. މިކަމާ ގުޅޭގޮތުން ރާއްޖެޓީވީގައި ވާހަކަދައްކަވަމުން ހަސަން ވިދާޅުވީ ޑިމޮކްރެޓްސްއާ ހިލާފަށް، އެމްޑީޕީއަކީ ބޮޑު ޕާޓިއެއްކަމުން ރައްޔިތުންނަށް ހިދުމަތް ކުރުމަށް ކުރެވޭނެ މަސައްކަތްތައް ގިނަވާނެ ކަމަށެވެ.

ހަސަން ލަތީފްގެ އެ ވާހަކަތަކާ ގުޅިގެން ޑިމޮކްރެޓްސްގެ ބައެއް މެމްބަރުން ވަނީ ކަންބޮޑުވުން ފާޅުކޮށްފައެވެ. ޑިމޮކްރެޓްސްގެ ރައީސްގެ މައުސްއޫލިއްޔަތު މިހާރު އަދާކުރައްވަމުން ގެންދަވަނީ، ރައްޔިތުން މަޖިލީހުގެ މަޑަވެލި ދާއިރާގެ ކުރީގެ މެންބަރު މުހައްމަދު ފިރުޝާނެވެ. ޕާޓީގެ ނައިބުރައީސް އަކީ އާއިޝަތު އަލައިކާއެވެ.

ޑިމޮކްރެޓްސް ގެ ހުސްވެފައިވާ ރައީސް އަދި ފިރިހެން ނައިބު ރައީސްގެ މަގާމަށް ކުރިމަތިލުމަށް ހުޅުވާލާފައިވަނީ މިއަދެވެ.