ނޫސްވެރިކަމުގެ އެވޯޑްގެ ބައެއް ކަންކަން އުސޫލްތަކާ ހިލާފް: ފަނޑިޔާރުން

މޯލްޑިވްސް މީޑިއާ ކައުންސިލްގެ 11 ވަނަ ނޫސްވެރިކަމުގެ އިނާމުދިނުމުގެ ބައެއް ކަންކަން މިފަހަރު ކުރިއަށްގެންގޮސްފައިވަނީ، އުސޫލްތަކާ ހިލާފަށްކަމަށް އެވޯޑްތަކަށް އިންސާފްކުރެއްވި ފަނޑިޔާރުންގެ ޓީމުން ހާމަކޮށްފިއެވެ.

މައްސަލަ ބޮޑުވެފައިވާ މީޑިއާ ކައުންސިލްގެ ތަހުގީގީ ނޫސްވެރިކަމުގެ އެވޯޑާ ގުޅޭގޮތުން ފަނޑިޔާރުންގެ ޓީމުން ނެރެފައިވާ ބަޔާނުގައި ބުނެފައިވަނީ، އެންމެ ފުރަތަމަ ތަހުގީގީ ނޫސްވެރިކަމުގެ އެވޯޑް ދީފައިވާ އުފެއްދުމަކީ ދިވެހި މީޑިއާގެ އހަުލާގީ މިންގަނޑުގައި ބަޔާންކޮށްފައިވާ އުސޫލްތަކާ ހިލާފް ކޮންޓެންޓެއްކަން މީގެ ކުރިން މީޑިއާ ކައުންސިލުން އެ ކޮންޓެންޓާ ގުޅޭގޮތުން ނެރެފައިވާ ނެރެފައިވާ ބަޔާނަކުން ހެކިދޭކަމަށެވެ. ފަނޑިޔާރުން ބުނީ، އެކަން ފާހަގަވުމުން ކައުންސިލްގެ ކަމާބެހޭ ކޮމިޓީއަށް ހުށަހެޅި ނަމަވެސް ޒިންމާދާރުކަމާއެކު ޖަވާބުދާރީ ވެފައި ނުވާކަމަށެވެ.

މީގެ އިތުރުން މިފަހަރުގެ އެވޯޑުގައި ފަނޑިޔާރުކަން ކުރުމަށް ދީފައިވާ ފުރުސަތު ހަނިކޮށްފައިވާކަން ފާހަގަކުރަމުން އެ ބަޔާނުގައި ބުނީ އެ އެވޯޑަށް އިންސާފުކުރުމުގައި 80 އިންސައްތަ ފަރުމާކޮށްފައި އޮތީ ވީޑިއޯ އުފެއްދުމުގެ ޓެކްނިކަލް ކޮލިޓީސްތަކަށް މާކްސްދޭންޖެހޭ ގޮތަށް ކަމށެވެ. އެގޮތުން ތަހުގީގީ ނޫސްވެރިކަމަށް މާކުސް ދެވޭނެ ނަޒަރިއްޔާތަކުން އެކަން ކުރެވިފައި ނެތްކަމަށް ފަނޑިޔާރުން ނެރުނު ބަޔާނުގައި ފާހަގަކުރިއެވެ.

މި ބަޔާނުގައި އިތުރަށް ބުނީ ހުށަހަޅާފައިވާ ހުރިހާ އުފެއްދުންތައް ފަނޑިޔާރުންނާ ހިއްސާކޮށްފައި ނުވާކަމަށެވެ. އަދި މީގެ ކުރީ އަހަރުތަކުގައި މާކުސްދީ ނިމުމުން ހަވާލުކުރަނީ ސިޓީއުރައިގައި ބަންދުކޮށް، ސީލްކުރުމަށްފަހު އެކަމަށް ކަނޑައަޅާފައި އޮންނަ އޮޑިޓް ފާމަށް ނަމަވެސް މިފަހަރު އެކނަ ްއެ އުސޫލުން ކޮށްފައި ނުވާކަމަށެވެ.

މީޑިއާ ކައުންސިލްގެ މި އެވޯޑް މައްސަލާގައި ކޮމިޝަނުގެ ރައީސް އަހުމަދު މުސްތޮފާ ވެސް ވަނީ މަގާމުން ވަކިކުރައްވާފައެވެ. ނަމަވެސް މުސްތަފާ ނެރުއްވި ބަޔާނަށްފަހު އޭނާގެ ވަޒީފާ ވަނީ އަލުން އިއާދަކޮށްފައެވެ.

މީޑިއާ ކައުންސިލްގެ އެވޯޑް ކަންކަން ކުރިއަށް ގެންދަނީ އެތަނުގައި އެކަމަށް ކަނޑައަޅާފައި އޮންނަ އިނާމު ކޮމިޓީއަކުންނެވެ. މި މައްސަލާގައި މިހާރު ބަޔާނެއް ނުނެރެނީ ހަމައެކަކި އިނާމް ކޮމިޓީންކަން ފާހަގަކޮށްލެވެއެވެ.