ވީއައިއޭ މެދުވެރިކޮށް ޖުލައިމަހު ރެކޯޑް އަދަދަކަށް ޓްރާންޝިޕްމަންޓް ކާގޯ އުފުލައިފި
ލިޔުންތެރިޔާ
އަބްދުﷲ ހުސައިން
ހުސްވި ޖުލައިމަހު ވެލާނާ އިންޓަރނޭޝަނަލް އެއާޕޯޓުން ރެކޯޑް މިންވަރަކަށް ޓްރާންޝިޕްމަންޓް ކާގޯ އުފުލައިފިއެވެ.
މިކަމާ ގުޅޭގޮތުން ވީއައިއޭ ހިންގާ އެމްއޭސީއެލުން ބުނީ ޖުލައިމަހު ރާއްޖެއިން ބޭރަށް ފޮނުވި ޓްރާންޝިޕްމަންޓް ކާގޯގެ މިންވަރު 2،000 ޓަނަށްވުރެ އިތުރުކަމަށެވެ.
ސީ ޓު އެއަރ އަދި އެއަރ ޓު އެއަރ އޮޕަރޭޝަންތައް މެދުވެރިކޮށް ހޯދި މި ކާމިޔާބީއާ އެކު ވީއައިއޭ އިން ކުރިން ހާސިލުކޮށްފައިވާ ހުރިހާ ރެކޯޑެއް ވަނީ މުގުރާލާފައެވެ. އެމްއޭސީއެލުން ބުނީ މިއީ އެއް މަސް ދުވަހުގެ ތެރޭގައި މި މިންވަރަށް ވީއައިއޭ މެދުވެރިކޮށް މުދާ ބޭރުކުރި ފުރަތަމަ ފަހަރުކަމަށެވެ.
ސީ ޓު އެއަރ ޚިދުމަތަށް ވަކިން ބެލި ނަމަވެސް ޖުލައި މަހު ވަނީ ރެކޯޑެއް ޤާއިމުވެފައެވެ. އެ ޚިދުމަތް ތަޢާރަފުކުރި ފަހުން އެންމެ ގިނައިން މުދާ އެއް މަސް ދުވަހެއްގެ ތެރޭގައި ފޮނުވީ ޖުލައި މަހު ކަމަށް ވާއިރު އެ މުއްދަތުގައި 621 ޓަނުގެ މުދާ ވަނީ ސީ ޓު އެއަރ މެދުވެރިކޮށް އުފުލާފައެވެ.
އެމްއޭސީއެލުން ބުނީ މި ނަތީޖާތަކުން ހާމަވަނީ އޭޝިއާ އާއި ޔޫރަޕް އަދި ދުނިޔޭގެ އެހެން ބޮޑެތި ބާޒާރުތައް ގުޅުވައިދޭ ހިންދު ކަނޑުގެ މުހިންމު ލޮޖިސްޓިކްސް މަރުކަޒެއްގެ ގޮތުގައި ވީއައިއޭ ތަރައްޤީވަމުން އަންނަ ކަމެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
