އެއްބަސްވުން ބާތިލު ކުރުމަށް ފަހު ގިރާވަރު ފަޅު ހިއްކުމުގެ މަސައްކަތް އަލުން ފަށަނީ

ބޮސްކާލިސް ޖޮއިންޓު ވެންޗާ ކުންފުންޏާއެކު ވެފައިވާ އެއްބަސްވުން ބާތިލު ކުރުމަށް ފަހު ގިރާވަރު ފަޅު ހިއްކުމުގެ މަސައްކަތް އަލުން ފެށުމަށް ނިންމާފައިވާ ކަމަށް ގެދޮރުވެރިކަމާއި ބިނާރާ ބެހޭ ވަޒީރު ޑރ. ޢަބްދުالله މުއްޠަލިބް ވިދާޅުވެއްޖެ އެވެ.

ޕީއެސްއެމް އިން ކުރިއަށް ގެންދާ އަހާ ފޯރަމްގައި ވާހަކަފުޅު ދައްކަވަމުން ވަޒީރު ޑރ. މުއްޠަލިބު ވިދާޅުވެފައިވަނީ، ގިރާވަރު ފަޅުން ގޯތި ލިބިފައިވާ ރައްޔިތުންނަށް ގުޅީފަޅުން ގޯތި ދިނުމަށް ހަމަޖެހިފައިވާ އުސޫލުން ގޯތި ދޭން ޖެހޭކަމަށް ޤަބޫލުފުޅުކުރައްވާ ކަމަށެވެ.

ބޮސްކާލިސް ޖޮއިންޓު ވެންޗާ ކުންފުންޏާ ގިރާވަރު ފަޅު ހިއްކުމުގެ މަޝްރޫއުގެ 160 ހެކްޓަރުގެ ބިން ހިއްކުމަށް ހަވާލުކޮށްފައިވާއިރު، ހިއްކާފައި އޮތީ އެންމެ 60 ހެކްޓަރުގެ ބިންކަން ފާހަގަކުރައްވާ ވަޒީރު ވިދާޅުވީ ގިރާވަރުފަޅު ހިއްކުމަށްޓަކައި ދެފަހަރެއްގެ މަތިން 20 މިލިޔަން ޑޮލަރު ދީފައިވާކަމަށެވެ. މީގެ އިތުރުން ބޮސްކާލިސް ކުންފުނީގެ އެދުމަށް ގިރާވަރު ފަޅުގެ އިތުރު މަސައްކަތްތަށް ކުރުމަށް، 15 މިލިއަން ޑޮލަރު ވެސް ދީފައިވާކަމަށް ވަޒީރު ވަނީ ވިދާޅުވެފަ އެވެ.

"ދެން އެފަރާތުން ޑިމާންޑް ކުރީ ހިއްކާފައި އޮތް މިންވަރަށް ވާވަރަށް ޑިމާންޑްކުރާ އަދަދަށް ފައިސާ ދިނުމަށް. ޙަޤީގަތުގައި ބެލިބެލުމުން އެތަނުގައި ހިއްކާފައި އޮތީ 20 މިލިޔަން ޑޮލަރަށް ވާވަރަށް."

ވަޒީރު ޑރ. މުއްޠަލިބް ވިދާޅުވި އެވެ.

ސަރުކާރުން ކޮންޓްރެކްޓަރާއެކު ވެފައިވާ އެއްބަސްވުން ބާތިލް ކުރުމަށްފަހު ގިރާވަރު ފަޅުން ގޯތިދިނުމުގެ މަސައްކަތް ވީ އެންމެ އަވަހަކަށް ފެށުމުގެ މަސައްކަތް މިހާރުކުރަމުން އަންނަކަމަށް ވަޒީރު ޑރ. މުއްޠަލިބު ވިދާޅުވި އެވެ.

އަދިހަމައެހެންމެ، ގިރާވަރު ފަޅުން ލިބިފައިވާ ގޯތިތަކުން ބައެއް ގޯތި ގުޅީފަޅަށް ބަދަލުކުރުމުގެ ސަބަބުން ގުޅީފަޅުގެ ލޭންޑް ޔޫސް ޕްލޭން ރިވައިޒްކުރުމުގެ މަސައްކަތް މިހާރު ކުރަމުން އަންނަ ކަމަށާއި، ރިވައިސް ކުރުމަށްފަހު ލޭންޑް ޔޫސް ޕްލޭނަށް ބަދަލުތަކެއް ގެނައުމުގެ މަސައްކަތް ކުރަމުން އަންނަކަމަށް ވަޒީރު ޑރ މުއްޠަލިބު ވިދާޅުވި އެވެ.

ފާހަގަކޮށްލަންޖެހޭ ގޮތުގައި ނިމިދިޔަ ސަރުކާރުން ވަނީ ގިރާވަރު ފަޅުން ޖުމްލަ 160 ހެކްޓަރު ހިއްކުމަށް ނިންމައިފަ އެވެ. އަދި ގިރާވަރު ފަޅު ހިއްކުމުގެ ޕްރޮޖެކްޓަށް އިތުރު 50 ހެކްޓަރުގެ ބިން އިތުރުކުރެއްވުމަށް ނިންމަވާފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މީގެ ކުރިން ވިދާޅުވެފަ އެވެ.