ފަހަތުން އަރައި ޗެކް ރިޕަބްލިކް އަތުން، ދެކުނު ކޮރެއާއަށް މޮޅެއް

ވަރލްޑްކަޕް ދެވަނަ މެޗްގައި މިއަދު އޭޝިއާއަށް ނިސްބަތްވާ ދެކުނު ކޮރެއާ އާއި ޔޫރަޕްގެ ޗެކްރިޕަބްލިކް ބައްދަލުކުރިމެޗް ކޮރެއާ ކާމިޔާބުކޮށްފިއެވެ.

މެކްސިކޯގައި ކުޅުނު މިމެޗް ޗެކްރިޕަބްލިކްގެ މައްޗަށް ދެކުނު ކޮރެއާ ކުރި ހޯދީ ފަހަތުން އަރައި 2-1 ގެ ނަތީޖާއަކުންނެވެ. ފޯރިގަދަ ކުޅުމެއް ފެނިގެންދިޔަ މިމެޗްގައި ހުރިހާ ގޯލެއްވެސް ޖަހާފައިވަނީ މެޗްގެ ފަހު ހާފްގެ ތެރޭގައެވެ. މެޗްގައި އެންމެ ފުރަތަމަ ގޯލް ޖަހައި ލީޑް ނަގާފައިވަނީ، ޗެކްރިޕަބްލިކުންނެވެ. އެއީ މެޗްގެ 59 ވަނަ މިނެޓް ތެރޭގައި ކްރެޗީ ކާމިޔާބުކޮށްދިން ލަނޑުންނެވެ.

މެޗްގެ ދެވަނަ ހާފްގެ ވަކި ހިސާބަކުން ކޮރެއާއިން ވަނީ ކުޅުން ރަނގަޅުކޮށް ކޮންޓްރޯލް ނަގައި ލަނޑެއް ޖަހާފައެވެ. މެޗްގައި ކޮރެއާއިން ލީޑް ނަގާފައިވަނީ 68 ވަނަ މިނެޓް ތެރޭގައެވެ. މި ލަނޑު އެޓީމަށް ކާމިޔާބުކޮށްދިނީ، ބޮއެމް އެވެ. މެޗުން ކޮރެއާ މޮޅުކޮށްދިން ލަނޑު އެޓީމަށް ޖަހައިދިނީ، 80 ވަނަ މިނެޓް ތެރޭގައި ހިޔުން ޖޫއެވެ.

މެޗްގެ އުސްއަލިތަކަށް ބަލާއިރު، ގިނައިރު ބޯލަ ގެންގުޅެ ގިނަ ހަމަލާތައް އުފައްދާފައިވަނީ ދެކުނު ކޮރެއާއިންނެވެ. މެޗްގައި ދެޓީމްގެ ކުޅުންތެރިންގެ ފަރާތުންވެސް ރީތި ކުޅުމެއް ފެނިގެންދިޔައިރު، މެޗްގައި ފެނިގެން ގޮސްފައިވަނީ އެންމެ ރީނދޫ ކާޑެކެވެ.

ވަރލްޑްކަޕްގައި ދެން އޮންނާނީ ގްރޫޕް ބީގައި ކެނެޑާ އާއި ބޮސްނިއާ ބައްދަލުކުރާ މެޗެވެ. މިމެޗް ފަށާނީ މިރޭ ދަންވަރު 12 ޖަހާއިރުއެވެ.