ވަރލްޑްކަޕާ ގުޅިގެން ރައީސްގެ ސޮއި ހިމެނޭ ހާއްސަ ފުޓްބޯޅަތަކެއް ދިވެހި ކުޅިވަރު ލެޖެންޑުންނަށް

ކުރިއަށްއޮތް ވަރލްޑްކަޕާ ގުޅިގެން ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސޮއި ހިމެނޭ ހާއްސަ ފުޓްބޯޅަތަކެއް ދިވެހި ކުޅިވަރު ލެޖެންޑުންނަށް ހަދިޔާއެއްގެ ގޮތުގައި ދިނުމަށް ކުޅިވަރާ ބެހޭ ވުޒާރާއިން ތައްޔާރުވެއްޖެއެވެ.

ވަރލްޑްކަޕްގެ ފޯރި އިތުރުކުރުމަށް ކުޅިވަރާބެހޭ ވުޒާރާއިން ކުރިއަށްގެންދާ ހަރަކާތްތަކުގެ ތެރޭގައި ހިމެނޭ މިކަމަކީ، ވަރލްޑްކަޕްގެ މެއިން ސްޕޮންސަރެއް ހަދިޔާކޮށްފައިވާ ބޯޅަ ތަކެކެވެ. ކުޅިވަރާބެހޭ ވުޒާރާއިން އާއްމުކުރި މި ވީޑިއޯގައި ވަޒީރު އަބްދުﷲ ރާފިއު ވަނީ  ވަރލްޑްކަޕްގެ މެއިން ސްޕޮންސަރަކު ހަދިޔާކުރައްވާފައިވާ ބޯޅަތައް ރާއްޖޭގެ ކުޅިވަރު ސަހްސިއްޔަތުންނަށް ދިނުމަށް ނިންމަވާފައިވާކަން ރައީސް އަރިހު ވިދާޅުވެފައެވެ. އަދި ބޯޅަ ތަކުގައި ރައީސްގެ އޮޓޯގްރާފް ދެއްވުމަށް އެދިވަޑައިގެންނެވުމުން ރައީސް ވަނީ ބޯޅަތަކުގައި ސޮކުރައްވާފައެވެ.

ބޯޅަތަކުގައި ސޮކުރައްވަމުން ގެންދެވިއިރު، ވަޒީރު ރާފިއު ވަނީ ވަރލްޑް ކަޕް ކާމިޔާބުކުރައްވާނީ ކޮން ޓީމެއްތޯ ރައީސް އަރިހު ސުވާލުކުރައްވާފައެވެ. ޖަވާބުގައި ރައީސް ވަނީ، އެމަނިކްފާނު ސަޕޯޓްކުރައްވަނީ އެންމެ ކުޑައިރުންސުރެ އާޖެންޓީނާއަށްކަމަށް ވިދާޅުވެފައެވެ. އަދި އިންގްލެންޑަކީވެސް ސަޕޯޓްކުރާ ޓީމެއް ކަމަށާއި، އާޖެންޓީނާއަށް ތަށި ނުލިބެންޏާމު އިންގްލެންޑަށް ލިބުނީމަ ހުންނާނީ ރަނގަޅަށްކަމަށް ވިދާޅުވެފައެވެ. އެގޮތުން މަރަޑޯނާއަށް ސަޕޯޓްކުރަން ފެށިފަހުން އާޖެންޓީނާއަށް ސަޕޯޓްކުރުމުގައި އަދިވެސް ހުރެވުނީކަމަށް ރައީސް ފާހަގަކުރެއްވިއެވެ.

މެޗްތައް އޮންނަ ވަގުތުގެ ގޮތުން މެޗްތައް ބެއްލެވުމުގެ ކަންކަން އޮތީ ކިހިނެތްތޯ ސުވާލުކުރެއްވުމުން ރައީސް ވިދާޅުވީ، މިފަހަރު މެޗްތައް ބެލުމުގެ ކަންކަން އޮތީ ވަރަށް އުނދަގޫކޮށް ކަމަށާއި، ހުރިހާ މެޗްތަކެއް ނުބެލުނު ނަމަވެސް ވީވަރަކުން މެޗްތައް ބައްލަވާނޭކަމަށެވެ.

ރައީސް ވިދާޅުވީ މިފަހަރު ފްރާންސްވެސް ވަރަށް ވަރުގަދަ ވާނެކަމަށާއި، އަދި ހޮލެންޑްވެސް ފަހަރެއްގައި ތަށި ނަގާފާނޭކަމަށެވެ. ވަޒީރު ރާފިއުއާއެކު ދައްކަވަމުން ގެންދިޔަ އެންމެ ފަހު ވާހަކަފުޅަކަށް ރައީސް ވިދާޅުވީ، އުއްމީދުކުރަނީ ހުރިހާ ފަރާތްތަކަށްވެސް ވަރލްޑްކަޕް ބެލޭނޭ އިންތިޒާމުތައް ހަމަޖެހިފައި ހުންނާނޭކަމަށެވެ.