އަފްލަޙުގެ މައްޗަށް ހަ ދައުވާއެއް، ގުރޫމް ކުރުމާއި ޖިންސީ އަމަލު ހިންގުމުގެ ކުށުގެ ދައުވާތައް ހިމެނޭ

ޖިންސީ ގޯނާގެ މައްސަލައިގައި ހައްޔަރުކޮށްފައިވާ ބްރައިޓް މައިންޑްސް ޓިއުޝަން ސެންޓަރުގެ ވެރިއެއް ކަމަށްވާ ހމ. ޚައިރާތު / މާލެ، ޢަލީ އަފްލަޙު (27އ) ގެ މައްޗަށް ދައުވާ އުފުލައިފި އެވެ.

އޭނާގެ މައްޗަށް އޮތީ އެކިދުވަސްމަތިން އިތުބާރު ކުރެވޭ މަޤާމެއްގައި ހުރެ، ކުޑަކުއްޖަކަށް ޖިންސީގޯނާ ކުރުމުގެ ތުހުމަތެވެ. އޭނާގެ ޖިންސީ ޝިކާރައަކަށްވީ އުމުރުން 16 އަހަރުގެ ކުއްޖެކެވެ.

ވޮއިސްއަށް މައުލޫމާތު ދެމުން ޕީޖީ އޮފީހުން ބުނީ އަފްލަހްގެ މައްޗަށް ހަ ދައުވާއެއް އުފުލާފައިވާ ކަމަށެވެ. އެއީ ޖިންސީ ކުށުގެ ޤާނޫނުގެ ދަށުން މަޙްރަމަކާއެކު ޖިންސީ ޢަމަލެއް ހިންގުމުގެ ކުށުގެ ތިން ދަޢުވާ އާއި ކުޑަކުންދިންގެ ޙައްޤުތައް ރައްކާތެރިކުރުމުގެ ޤާނޫނުގެ ދަށުން، ކުޑަކުއްޖަކަށް ޖިންސީ ގޯނާ ކުރުމަށްޓަކައި އެ ކުއްޖާ ގްރޫމްކުރުމުގެ ކުށުގެ ދަޢުވާ އާއި

ކުޑަކުދިންނަށް ޖިންސީ ގޯނާކުރާ މީހުންނާމެދު ޚާއްޞަ އުސޫލުތަކަކަށް ޢަމަލުކުރުމުގެ ޤާނޫނުގެ ދަށުން، އިތުބާރުކުރެވޭ މަޤާމެއްގައި ހުރެ ކުޑަކުއްޖަކާއެކު ޖިންސީ ޢަމަލެއް ހިންގުމުގެ ކުށުގެ ދަޢުވާގެ އިތުރުން ޤާނޫނުލްޢުޤޫބާތުގެ ދަށުން، ޢަދުލު އިންޞާފު ޤާއިމުކުރުމަށް ހުރަސްއެޅުމުގެ ކުށުގެ ދަޢުވާ އެވެ.

ޢަލީ އަފްލަޙު ހައްޔަރުކޮށްފައިވަނީ 2026 ފެބްރުއަރީ 11 ވަނަ ދުވަހު ކޯޓު އަމުރެއްގެ ދަށުންނެވެ.

ފުލުހުން ބުނެފައިވާ ގޮތުން، ޢަލީ އަފްލަޙުގެ މައްޗަށް ތުހުމަތު ކުރެވެނީ އިތުބާރުކުރެވޭ މަގާމެއްގައި ހުރެ، ކުޑަކުއްޖެއްގެ އުމުރުން 14 އަހަރުން ފެށިގެން 16 އަހަރާ ދެމެދު ތަކުރާރުކޮށް އެކުއްޖާއަށް ޖިންސީ ގޯނާކޮށްފައިވާކަމަށެވެ.