ޕޮގްބާގެ މޮޅު ކުޅުމާއެކު މެންޗެސްޓާ ޔުނައިޓެޑް ހުއްޓުމެއްނެތި ކުރިއަށް

އިނގިރޭސި ޕްރިމިއާ ލީގުގައި ރޭ މެންޗެސްޓާ ޔުނައިޓެޑް އަދި ހަޑަސްފީލްޑް ބައްދަލުކުރި މެޗް 3-1 ކުން ޔުނައިޓެޑް ކާމިޔާބު ކޮށްފިއެވެ.

މެޗުގައި ޔުނައިޓެޑުގެ ފަރާތުން ފެނުނު ލަނޑުތައް ކާމިޔާބު ކޮށްދިނީ މެދުތެރެއަށް ކުޅެމުން އަންނަ މަޓިޗް އަދި ޕޮގްބާއެވެ. ޕޮގްބާގެ ފަރާތުން މޮޅު ކުޅުމެއް ފެނިގެންދިޔަ މި މެޗުގައި އޭނާވަނީ ޔުނައިޓެޑަށް ދެ ލަނޑު ޖަހައިދީފައެވެ. މިއީ މިދިޔަ އޭޕްރިލް މަހުގެ ފަހުން މެޗެއްގައި ޕޮގްބާ ދެ ލަނޑު ޖެހި ފުރަތަމަ ފަހަރެވެ. ހަޑަސްފީލްޑްގެ ފަރާތުން ފެނުނު ހަމައެކަނި ލަނޑު އެޓީމަށް ޖަހައިދިނީ މެޗުގެ ފުރިހަމަ ވަގުތު ހަމަވާން ކުޑަ ވަގުތުކޮޅަކަށް ވެފައިވަނިކޮށް ޖޯގެންސެންއެވެ.

މޮރީނިއޯގެ އިރުޝާދުގެ ދަށުން ކުޅެމުން ދިޔަ ޔުނައިޓެޑް މި ސީޒަނުގައި އެއްވެސް މިސްރާބެއް ނެތި ކުޅެމުން ދިޔަތަން ފެނުނު ކަމުގައިވިޔަސް ޔުނައިޓެޑުގެ ލެޖެންޑް ޝޯލްޝާ ކްލަބައި ހަވާލުވުމަށްފަހު އެޓީމް ފެނިގެންދަނީ ގިނަ ވަގުތު ބޯޅަ ހިފަހައްޓައިގެން ގިނަ ހަމަލާތަކެއް އުފައްދަމުންދާ ރީތި ކުޅުމެއް ކުޅެމުން އަންނަ މަންޒަރެވެ. ޝޯލްޝާ ޔުނައިޓެޑައި ހަވާލުވެގެން ކުޅުނު ދެ މެޗުގައި އެޓީމް ޖެހި އަށް ލަނޑު މީގެ ހެއްކަކަށް ފުދެއެވެ.

މި މެޗުން ބަލިވުމާއެކު ހަޑަސްފީލްޑްވަނީ ޕްރިމިއާ ލީގް ތާވަލުގެ ފުލަށް ވެއްޓިފައެވެ. ޔުނައިޓެޑް އޮތީ 32 ޕޮއިންޓާއެކު ތާވަލުގެ ހަވަނައިގައެވެ.

ކުރިއަށް އޮތް ލީގް މެޗުގައި ޔުނައިޓެޑް ވާދަކުރާނީ ބޯންމައުތްއާއެވެ. އެ މެޗް ކުޅުމަށް ހަމަޖެހިފައިވަނީ މި އަންނަ އާދިއްތަ ދުވަހު ރާއްޖެ ގަޑިން ރޭގަނޑު 09:30 ގައެވެ.

ލީގުގައި އާސެނަލް އަދި ބަރައިޓަން އެންޑް ހޯވް އަލްބިއޯން ބައްދަލުކުރި މެޗު ނިމުނީ 1-1 ކުން އެއްވަރު ވެގެންނެވެ. ބްރައިޓަންގެ އަމިއްލަ ދަނޑުގައި ކުޅުނު މެޗުގެ ފުރަތަމަ ލަނޑުޖަހައި ކުރި ހޯދީ އާސެނަލްއެވެ. މި ލަނޑު އެޓީމަށް ކާމިޔާބު ކޮށްދިނީ ރަނގަޅު ފޯމެއްގައި ހުރި ސްޓްރައިކާ އޮބާމެޔާންގްއެވެ. ނަމަވެސް ބްރައިޓަންގެ ލޮކާޑިއާވަނީ އެޓީމަށް ފުރަތަމަ ހާފުގައި ނަތީޖާ ހަމަހަމަ ކޮށްދީފައެވެ.

މެޗުން ލިބުނު އެއް ޕޮއިންޓާއެކު ބްރައިޓަން ތާވަލުގެ 13 ވަނައިގަ އޮތް އިރު އާސެނަލް އޮތީ 38 ޕޮއިންޓް ލިބިގެން ފަސްވަނައިގައެވެ.

ތާވަލުގެ ހަތަރުވަނައިގަ އޮތީ ހަޒާޑް ޖަހައިދިން ދެ ލަނޑާއެކު ވޮޓްފޯޑް މައްޗައް 2-1 ކުން ކުރި ހޯދި ޗެލްސީއެވެ.

ރޭ ކުޅެވުނު އެހެން މެޗުތަކުގެ ނަތީޖާތަކަށް ބަލާލާއިރު ފުލަމް އަދި ވުލްވްސް ކުޅުނު މެޗު ނިމުނީ 1-1 ކުން އެއްވަރު ވެގެންނެވެ. ކްރިސްޓަލް ޕެލަސް އަދި ކާޑިފް ސިޓީ ބައްދަލުކުރި މެޗު އެއްވެސް ޓީމަކަށް ލަނޑެއް ނުޖެހި އެއްވަރުގެން ނިމުނު އިރު އެވަޓަންވަނީ ބާންލީ ކޮޅަށް ފަސް ލަނޑުޖަހައި ތިން ޕޮއިންޓް ކަށަވަރު ކޮށްފައެވެ.