ވިލިނގިލީގައި އެއާޕޯޓެއް އަޅައި 17 ރިސޯޓް ހަދަން ބުރުޖް ހަލީފާ އެޅި ކުންފުންޏަށް ދިން އެއްބަސްވުން ބާތިލު، އެހެން ބަޔަކާއެކު ނޮވެންބަރުގައި ފަށަނީ

ގއ. ވިލިނގިލީގައި އެއާޕޯޓެއް އަޅައި 17 ރިސޯޓް ހަދަން ބުރުޖް ހަލީފާ އެޅި ކުންފުންޏަށް ދިން އެއްބަސްވުން ބާތިލު ކޮށްފައިވާއިރު އެހެން ކުންފުންޏަކާއި ހަވާލުކޮށްގެން އެ މަޝްރޫއު ފެށުމަށް ތައްޔާރުވަމުންދާ ކަމަށް ސަރުކާރުން ބުނެފި އެވެ.

އެކަން ހާމަކޮށްފައި ވަނީ ޓްރާސްޕޯޓް މިނިސްޓަރު މުހައްމަދު އަމީން މިރޭ އޮތް "އަހާ" ފޯރަމްގަ އެވެ. މިރޭ އޮތް ފޯރަމަށް އާންމުންގެ މީހަކު ވަނީ ގއ. ވިލިނގިލީގައި އެއާޕޯޓެއް އަޅައި 17 ރިސޯޓް ހަދަން ހަވާލުކުރި މަޝްރޫއުއާ ގުޅޭގޮތުން ސުވާލުކޮށްފަ އެވެ.

އަދި އެ މަޝްރޫއު މި އަހަރު ފެށޭތޯ ސުވާލު ކޮށްފައިވެ އެވެ. އެ ސުވާލަށް ޖަވާބު ދެއްވަމުން މިނިސްޓަރު އަމީން ވިދާޅުވީ އެ މަޝްރޫއު ހަވާލުކުރީ ދުބާއީގެ ބްރުޖުހަލީފާ ހެދި ބެލްޖިއަމްގެ ބީސިކްސް ގްރޫޕާ އެކު ހަދާފައިވާ އެއްބަސްވުން ބާތިލުކޮށްފައިވާ ކަމަށެވެ. އަދި އައު ކޮންޓްރެކްޓަރަކާއެކު މަޝްރޫއު ފެށުމަށް ތައްޔާރުވަމުންދާ ކަމަށެވެ.

އަދި ވިދާޅުވީ އަންނަ ނޮވެންބަރު މަސް ނިމުގެ ކުރީން އެ މަޝްރޫއު ފެށޭނެ ކަމަށެވެ. ނަމަވެސް އިތުރު ތަފްސީލެއް ނުދެއްވަ އެވެ.

ވިލިނގިލީގައި އެއާޕޯޓެއް އަޅައި 17 ރިސޯޓް ހަދަން ބުރުޖް ހަލީފާ އެޅި ކުންފުންޏަށް ހަވާލުކޮށް ސޮއިކުރީ ރައީސް މުޢިއްޒު އެ ރަށުގެ ރައްޔިތުންނާއި ބައްދަލުކުރެއްވުމަށް 22 ފެބްރުއަރީ 2024 ގައި ބޭއްވި ޖަލްސާގަ އެވެ.

ޖުމްލަ 800 މިލިއަން ޑޮލަރު (12 ބިލިއަން ރުފިޔާ)ގެ މިމަޝްރޫޢު އަކީ ސަރުކާރުން ޚަރަދު ނުކޮށް އެ ކުންފުނިން އިންވެސްޓް ކޮށްގެން ހިންގާ ޕްރޮޖެކްޓެއް ކަމަށް އޭރު ސަރުކާރުން ބުންޏެވެ.

އަދި މި މަޝްރޫއުގެ ދަަށުން ގއ. ވިލިނގިއްޔާއި މި އެއާޕޯޓް އަޅާ ރަށް ކޯޒްވޭއަކުން ގުޅާލާނެ ކަމަށާ އެ ކޯޒްވޭގެ ދިގު މިނުގައި 17 ކިލޯމީޓަރު ހުންނާނެ ކަމަށް ބުންޏެވެ. މި ރަށުގައި ހަދާ އެއާޕޯޓަކީ އެންމެ ޒަމާނީ ހުރިހާ ވަސީލްތަކެއް ހުރި އިންޓަނޭޝަނަލް އެއާޕޯޓަކަށްވާނެ ކަމަށް ވެސް ސަރުކާރުން އޭރު ބުންޏެވެ.

މި މަޝްރޫއުގެ ދަށުން ވިލިނގިލީ ފަޅުގައި 17 ރަށް ތަރައްގީ ކުރާނެ ކަމަށާ މީގެ ތެރޭގައި ހިމެނެނީ އަށް ޕްރައިވެޓް އައިލެންޑާއި ބޮޑު ނުވަ ރިސޯޓް ކަމަށާ މި މަޝްރޫއާއެކު ހުވަދޫގެ އެނދުގެ އަދަދު 5،000 އަށް އިތުރު ވެގެންދާނެ ކަމަށް އޭރު ވަނީ ބުނެފަ އެވެ.