ޝަމްޢާންގެ ތުހުމަތުތައް ދޮގުކޮށް ތަހުގީގުގެ ތަފްސީލް ފުލުހުން ހާމަކޮށްފި

އިމިގްރޭޝަންގެ ކުރީގެ ކޮންޓްރޯލަރ ޖެނެރަލް މުޙައްމަދު ޝަމްޢާން ވަޙީދު މީޑިއާތަކާ ބައްދަލުކޮށް ކޮށްފައިވާ ތުހުމަތުތަކަށް ރައްދުދީ އެ މައްސަލައިގެ ތަހުގީގުގެ ތަފްސީލް ދިވެހި ފުލުހުންގެ ޚިދުމަތުން ހާމަކޮށްފިއެވެ.

ފުލުހުން ނެރުނު ބަޔާނުގައިވާ ގޮތުން ޝަމްޢާނާއި އިމިގްރޭޝަންގެ ބައެއް މުވައްޒަފުން ގުޅިގެން މަގާމުގެ ނުފޫޒު ބޭނުންކޮށް ބިދޭސީންގެ އަތުން ނުހައްގު މާލީ މަންފާ ހޯދައި މަނީ ލޯންޑަރިންގެ ޢަމަލުތައް ހިންގާފައިވާ ކަމަށް ތުހުމަތުކުރެވޭ މައްސަލައިގެ ތަހުގީގު ކުރިއަށް ގެންގޮސްފައިވަނީ ރާއްޖޭގެ ގާނޫނުތަކާއި އިޖުރާއަތްތަކާ އެއްގޮތަށެވެ. އިމިގްރޭޝަނުން ހިންގި އޮޕަރޭޝަނެއް ރޭވުމުގެ މަރުހަލާއިން ފެށިގެން ތަންފީޒުކުރުމާ ހަމައަށް ހިނގި ހުރިހާ ކަމެއް ޝަމްޢާނަށް އެނގޭކަން ތަހުގީގަށް ކަށަވަރުކުރެވިފައިވާ ކަމަށް އެ ބަޔާނުގައި ބުނެފައިވެއެވެ.

ފުލުހުންގެ ބަޔާނުގައި ބުނީ 2025 ވަނަ އަހަރުގެ މާރިޗު 11 ވަނަ ދުވަހުގެ ރޭ ބިދޭސީން އިމިގްރޭޝަންގެ ބެލުމުގެ ދަށަށް ގެނައުމާ ގުޅިގެން އެ މަޢުލޫމާތު ޝަމްޢާނަށް ދިން ކަމަށާއި އެއަށްފަހު އެ ބިދޭސީންގެ ތެރެއިން އެކަކު ދޫކޮށްލުމުގެ މަސައްކަތް ކުރިއަށް ގެންދިއުމަށް ޝަމްޢާން އިރުޝާދު ދިން ކަމަށެވެ. އެ ބިދޭސީ މީހާ ދޫކޮށްލުމަށްފަހު ތުހުމަތުކުރެވޭ އިމިގްރޭޝަންގެ ދެ މުވައްޒަފަކު އެ މީހާ ގޮވައިގެން އިމިގްރޭޝަންގެ ވެހިކަލެއްގައި ދަތުރުކޮށް ދޫކޮށްލުމުގެ ބަދަލެއްގެ ގޮތުން ދޭންޖެހޭ ފައިސާގެ އަދަދު ކަށަވަރުކުރުމަށް ޝަމްޢާނާ ގުޅާފައިވާ ކަމަށާއި އެ އަދަދަކީ 500,000 ދިވެހި ރުފިޔާ ކަމަށް ފުލުހުން ބުނެފައިވެއެވެ.

ފުލުހުންގެ ބަޔާނުގައި އިތުރަށް ބުނެފައިވާ ގޮތުގައި އެ ދެ މުވައްޒަފުން ދަންވަރު ގާތްގަނޑަކަށް 3:00 ގައި ފައިސާ ހުރި ކޮތަޅެއް ހިފައިގެން ޝަމްޢާން ދިރިއުޅޭ އެޕާޓްމަންޓް އިމާރާތަށް ވަދެ ގާތްގަނޑަކަށް ތިން މިނެޓް ފަހުން ނުކުތްއިރު އެ ކޮތަޅެއް ނެތެވެ. ޖެހިގެން އައި 2025 މާރިޗު 13 ގައި ޝަމްޢާންގެ ނަމުގައި ބޭންކް އޮފް މޯލްޑިވްސްގައި ހުޅުވާފައިވާ ދެ އެކައުންޓަކަށް ޖުމްލަ 259,837.35 ރުފިޔާ ޖަމާކޮށްފައިވާ ކަމަށް ވެސް ތަހުގީގަށް ހޯދިފައިވެއެވެ.

ޝަމްޢާން ފުލުހުންގެ ބެލުމުގައި އޮތް ފޯނުގައި ކޮރަޕްޝަނާ ގުޅޭ ހެކި ހުރި ކަމަށް މީޑިއާ މެދުވެރިކޮށް ބުނި ނަމަވެސް ތަހުގީގުގެ އެއްވެސް މަރުހަލާއެއްގައި ނުވަތަ 2025 ޑިސެމްބަރު 25 ގައި ބަންދުން ދޫކޮށްލި ފަހުން ވެސް އެފަދަ މަޢުލޫމާތެއް ފުލުހުންނަށް ހިއްސާކޮށްފައި ނުވާ ކަމަށާއި ކޮރަޕްޝަން ތަހުގީގު ކުރާ އެހެން މުއައްސަސާއަކަށް ވެސް އެފަދަ މަޢުލޫމާތެއް ހުށަހެޅި ކަން އެނގިފައި ނުވާ ކަމަށް ފުލުހުން ބުންޏެވެ. މި ތަހުގީގަކީ ވަކި ނަތީޖާއެއް ނެރުމަށް ރާވައިގެން ނުވަތަ ސިޔާސީ ނުފޫޒެއްގެ ދަށުން ހިންގި ތަހުގީގެއް ކަމަށް ކުރާ ތުހުމަތުތަކަކީ އެއްވެސް އަސާސެއް ނެތް ތުހުމަތުތަކެއް ކަމަށް ވެސް ފުލުހުންގެ ބަޔާނުގައި ބުނެފައިވެއެވެ.

މި މައްސަލައިގެ ތަހުގީގު ނިންމައި ޕްރޮސިކިއުޓާ ޖެނެރަލްގެ އޮފީހަށް ފޮނުވައި ދައުވާ އުފުލުމާ ގުޅިގެން ކުރިއަށްދިޔަ ޝަރީޢަތުގައި ކްރިމިނަލް ކޯޓުން މިހާރު ވަނީ މި މައްސަލައިގައި ހުކުމް އިއްވާފައި ކަމަށާއި ނިންމުމާ މެދު ހިތްހަމަނުޖެހޭ ނަމަ އޮތް ހައްލަކީ އިސްތިއުނާފުކުރުމުގެ ހައްގުގެ ބޭނުން ކުރުން ކަމަށް ފުލުހުން ދެކޭ ކަމަށް އެ ބަޔާނުގައި ބުނެފައިވެއެވެ.