އެމެރިކާއިން ޓައިވާނަށް ހަތިޔާރު ފޯރުކޮށްދިނުމަކީ އަލިފާނާއި ކުޅުން: ޗައިނާ

އެމެރިކާއިން ޓައިވާނަށް ހަތިޔާރު ފޯރުކޮށްދިނުމަކީ "އަލިފާނާއި ކުޅުން"ކަމަށް ޗައިނާއިން ބުނެފިއެވެ.

ޗައިނާއިން މިފަދައިން ބުނެފައިމިވަނީ، އެމެރިކާއިން ޓައިވާނަށް އިތުރު އަސްކަރީ އެހީއާއި ހަތިޔާރު ފޯރުކޮށްދޭނެކަން އިޢުލާނުކުރުމާ ގުޅިގެންނެވެ. މިކަމާއި ގުޅިގެން ޗައިނާގެ ޚާރިޖީ ވުޒާރާއިން ނެރުނު ބަޔާނެއްގައި ވަނީ ޓައިވާނުގެ ސުލްޙަވެރިކަމާއި ހަމަޖެހުމަށް ނުރައްކާވާފަދަ އަމަލުތައް ހުއްޓާލުމަށް ގޮވާލާފައެވެ.

ޓައިވާނަކީ ޗައިނާގެ ބައެއްކަމުގައި އެގައުމުން ދެކޭއިރު، އެމެރިކާއިން ވެސް ޓައިވާން ރަސްމީ ގައުމެއްގެ ގޮތުގައި ބަލައިނުގަތްނަމަވެސް، އެއީ ޓައިވާނަށް އެންމެ ގިނައިން ހަތިޔާރު ފޯރުކޮށްދޭ ގައުމުކަން ފާހަގަކޮށްލެވެއެވެ.

މިގޮތުން، ހުކުރު ދުވަހު އެމެރިކާގެ ވައިޓް ހައުސްއިން ވަނީ ބައިޑެން ސަރުކާރުން ޓައިވާނަށް 571.3 މިލިއަން ޑޮލަރަށް ވުރެ ގިނަ އަދަދެއްގެ އަސްކަރީ އެހީ ދިނުމަށް ނިންމާފައިވާކަމަށެވެ. ވައިޓް ހައުސްގެ ބަޔާނުގައި މި އެހީގެ ތަފްސީލު ހިމަނާފައި ނުވިނަމަވެސް، މިއީ 567 މިލިއަން ޑޮލަރުގެ އެހީއެއް ދިނުމަށް އެގައުމުން އިޢުލާނުކުރިތާ ތިން މަސް ނުވަނީސް ދީފައިވާ އެހީއެކެވެ.

މިކަމާއި ގުޅިގެން ޗައިނާގެ ޚާރިޖީ ވުޒާރާއިން ބުނީ މިއީ ޗައިނާގެ ސިޔާދަތާއި ސަލާމަތީ މަސްލަހަތުތަކަށް އެމެރިކާއިން އަރައިގަތުންކަމަށާއި، އެމެރިކާގެ މިއަމަލު ހަރުކަށި އިބާރާތުން ކުށްވެރި ކުރާކަމަށެވެ.

މި އަހަރުގެ އޮކްޓޯބަރު މަހުވެސް އެމެރިކާއިން ޓައިވާނަށް 2 ބިލިއަން ޑޮލަރުގެ ހަތިޔާރު ވިއްކުމަށް ނިންމިއިރު، މީގެ ތެރޭގައި މުޅިން އަލަށް ތަރައްގީކުރި ސަރފަސް-ޓު-އެއަރ މިސައިލް ދިފާޢީ ނިޒާމެއް ހިމެނެއެވެ.

ބައިޑެންގެ ސަރުކާރުން ޓައިވާނަށް އެހީވިނަމަވެސް، އެމެރިކާގެ އަލަށް އިންތިޚާބުވި ރައީސް ޑޮނަލްޑް ޓްރަމްޕް ވަނީ އޭނާގެ ދައުރުގައި ޗައިނާއިން ޓައިވާނަށް ހަމަލާދީފިނަމަ ޓައިވާން ދިފާޢުކުރުމަށް ދެކޮޅުހައްދަވާނެކަމަށް ވިދާޅުވެފައެވެ.

ޓްރަމްޕް ވިދާޅުވި ގޮތުގައި، ޗައިނާގެ ކިބައިން ދިފާއުވާން ބޭނުންވާނަމަ، ޓައިވާނުން އެމެރިކާއަށް ފައިސާ ދައްކަންޖެހޭނެއެވެ. އޭނާ މި ގުޅުން އަޅާކިޔާފައިވަނީ އިންޝުއަރެންސްއަކާއެވެ.