ރޭގެ އަލިފާނުގެ ހާދިސާއާ ގުޅިގެން 4 ދިވެހިންނަށް ވަގުތީ ބޯހިޔާވަހިކަން ދީފި

މާލޭގެ ގެއެއްގައި ރޭ ހިނގި އަލިފާނުގެ ހާދިސާއާ ގުޅިގެން ހާލުގައި ޖެހުނު ހަތަރު ދިވެއްސަކަށް ވަގުތީ ބޯހިޔާވަހިކަމާއި ކެއިންބުއިމުގެ އިންތިޒާމު ހަމަޖައްސައިދީފައިވާ ކަމަށް ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން ބުނެފިއެވެ.

އެންޑީއެމްއޭ އިން އެކްސްގައި ކުރި ޕޯސްޓެއްގައި ބުނެފައިވާ ގޮތުގައި، މި އެހީތެރިކަން ފޯރުކޮށްދީފައިވަނީ އަލިފާން ރޯވި އިމާރާތުގެ ހަތްވަނަ ފަންގިފިލާގައި ހުރި ތިން ކޮޓަރީގެ އެޕާޓްމަންޓުގައި ދިރިއުޅޭ ތިން އަންހެނުންނާއި ފިރިހެނަކަށެވެ.

އެ ފަރާތްތަކަށް ފަސް ދުވަހުގެ މުއްދަތަށް ބޭނުންވާ ވަގުތީ ބޯހިޔާވަހިކަމާއި ކެއިންބުއިމުގެ އިންތިޒާމު އެ އޮތޯރިޓީން މިހާރު ވަނީ ފުރިހަމަކޮށްދީފައެވެ.

މި ހާދިސާ ހިނގާފައިވަނީ ރޭގެ ވަގުތެއްގައެވެ. ހާދިސާ ހިނގައިގެން ސިފައިންގެ ފަޔާ އެންޑް ރެސްކިއު ސާވިސްއާއި، ފުލުހުން އަދި އެންޑީއެމްއޭ ގުޅިގެން ހަރަކާތްތެރިވާން ފެށީ ރޭ 21:00 ކައިރިވެފައި ވަނިކޮށެވެ. އަދި ފަޔަ ފައިޓަރުން ކުރި ހިތްވަރުގަދަ މަސައްކަތުން ރޯވެފައިވާ އަލިފާންގަނޑު އެއްކޮށް ނިއްވާލެވިފައިވަނީ ރޭ 21:25 ހާއިރުއެވެ.

މި ހާދިސާގައި އަލިފާން ރޯވެފައިވަނީ ހ. ފަހިވައިގޭގެ 7 ވަނަ ފަންގިފިލާގައި ހުރި އެޕާޓްމަންޓުގެ ސިޓިންރޫމުގައެވެ. މި ހާދިސާގެ ސަބަބުން އެ އެޕާޓްމަންޓުގެ ސިޓިންރޫމަށް ވަރަށް ބޮޑަށް ގެއްލުން ލިބުނު ނަމަވެސް، އެއްވެސް މީހަކަށް އަނިޔާއެއް ލިބިފައެއް ނުވެއެވެ.

އެންޑީއެމްއޭ އިން އިތުރަށް ބުނެފައިވަނީ، މި ހާދިސާގެ ސަބަބުން އެ އިމާރާތުގެ ބައެއް އެހެން ފަންގިފިލާތަކަށް ދުމުގެ އަސަރު ފޯރި ނަމަވެސް، މީހުން ދިރިނޫޅެވޭ ފަދަ ބޮޑު ގެއްލުމެއް އެ ތަންތަނަށް ލިބިފައި ނުވާ ކަމަށެވެ. އަދި މިހާރު އެ ފަންގިފިލާތަކުގައި ދުމުގެ އެއްވެސް އަސަރެއް ނެތް ކަމަށްވެސް އެ އޮތޯރިޓީން ވަނީ ޔަގީންކޮށްދީފައެވެ.