ރައީސް ނަޝީދު، ހެލިކޮޕްޓަރާއި ސިފައިން ގެނައީ ޤާނޫނާ ޚިލާފަށް: ޤާސިމް
ކުރީގެ ރައީސް، އަދި މަޖިލީހުގެ ކުރީގެ ރައީސް މުހައްމަދު ނަޝީދުގެ ވެރިކަމުގައި ދިވެހިރާއްޖެއަށް އިންޑިޔާ ސިފައިން ގެނައީ ގާނޫނު އަސާސީއާ ޚިލާފަށް ކަމަށް މަޖިލީހުގެ މާމިގިލީ ދާއިރާގެ މެންބަރު ގާސިމް އިބްރާހިމް ވިދާޅުވެއްޖެއެވެ.
ގާސިމް މިހެން ވިދާޅުވީ މިއަދު ބޭއްވި ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ ދެވަނަ ޖަލްސާގައި، ދިވެހިރާއްޖޭގެ އިގްތިސާދީ ކަނޑުގެ ސަރަހައްދުގައި ވަނިކޮށް، ދިވެހި މަސްދޯނި ތަކަކަށް ބޭރުގެ ސިފައިން ހަތިޔާރާއެކު އެރި މައްސަލަ ބެލުމަށް ގޮވާލާއި ހުށަހެޅުނު ކުއްލި މައްސަލައަށް ބަހުސް ކުރައްވަމުންނެވެ.
އެގޮތުން ޤާސިމް ވިދާޅުވީ ދިވެހިންގެ ސަރަހައްދުގައި އޮތް ދޯނިފަހަރަށް އެހެން ޤައުމެއްގެ ސިފައިން އަރާތިބުމާއި، އަދި އެފަދަ ކަންތައްތައް ދިމާވުމަކީ ވަރަށްވެސް ދެރަ އަދި ނިކަމެތި ކަމެއްކަމުގައެވެ.
ގާސިމް ވިދާޅުވި ގޮތުން އެ ފަދަ ހާދިސާތައް ހިނގަން މެދުވެރިވި އަސްލު ސަބަބަކީ ކުރީގެ ރައީސް ނަޝީދުގެ ވެރިކަމުގައި ބޭރުގެ ސިފައިން ގެނައުމެވެ. އެގޮތުން އިންޑިޔާގެ ހެލިކޮޕްޓަރާއިއެކު ސިފައިން ގެނައީ ޤާނޫނާއި ގާނޫނު އަސާސީއާ ޚިލާފަށް ކަމަށް ގާސިމް ވިދާޅުވި އެވެ.
"އެމަނިކުފާނު (ރައީސް ނަޝީދު)ގެ ވެރިކަމުގައި މިތަނަށް ހެލިކޮޕްޓަރު ގެނެއްސައި އޮތީ، ބޭރުގެ ސިފައިން އޭގެ ތެރޭގައި ހިމެނޭ ގޮތަށް، ޤާނޫނު އަސާސީ އާއި ޤާނޫނާއި ޚިލާފަށް. ޤާނޫނު އަސާސީއާއި ޤާނޫނުގައި ބުނަނީ ރައްޔިތުންގެ މަޖިލީހުގެ ހުއްދަ އަދި މަޖިލީހުން ފާސްކޮށްގެންނޭ އެކަން ކުރެވޭނީ. ހަމަ އެހެންމެ، ދެން އައި ސަރުކާރުންވެސް. 2013 އިން 2018 އަށް ޔާމީން ޢަބްދުލް ޤައްޔޫމްގެ ސަރުކާރުގައިވެސް ހަމަ އެހެން އެކަން ދިޔައީ. އޭގެ ކުރީގައި ދިވެހި ރާއްޖެއަށް ބޭރުގެ ސިފައިން އަރާފަކައެއް ނެތް"
މާމިގިލީ ދާއިރާގެ މެންބަރު ގާސިމް އިބްރާހިމް
ރާއްޖެއަށް ހެލިކޮޕްޓަރު ހަދިޔާކޮށް، އެ ހެލިކޮޕްޓަރު ދުއްވުމުގެ ނަމުގައި ރާއްޖެއަށް 40 ވަރަކަށް ސިފައިން ރައީސް ނަޝީދުގެ ވެރިކަމުގައި 2010 ވަނަ އަހަރު ރާއްޖެ ގެނައި ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެފައި ވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
